NAPOLI - AZ ALKMAAR [E.L.22.10.20] 0 A 1 ‘A VEDETTE ACCUSSÍ

NAPOLI - AZ ALKMAAR [E.L.22.10.20] 0 A 1

‘A VEDETTE ACCUSSÍ

Mannaggia ê cane ‘e canciello guagliú, che ddelusione e cche ccollera! Ajere ‘mmerz’ê ssette ô san Paolo ‘nu  Napule bbatiejo  (lento), scuntato e ppoco cumminto  ll’avette ‘ncopp’ê rrecchie p’uno a zzero  da ll’ulandese  ‘e ll’ Az Alkmaar(re) addó nujaute ‘ntribbuna divano nce fóssemo aspettate ca ‘o Ciuccio n’êsse fatto carna p’’e ppurpette…. Ma chi t’’o ddà? ‘E nuoste tuzzajeno cu ‘a capa ‘nfacci’ô muro aizato da ll’ulandise e ô 57’ ‘ncopp’a ll’unica azziona d’attacco ca facetteno nce ‘o mettetteno a ppitoffio i ‘e nuoste pure mantenenno cumplessivamente ‘o pussesso ‘e palla pe quase tutto ‘o sibbacco (match) nun foveno capace manco ‘e russimà (pareggiare)… E ppe fforza, pe fforza! Me dispiace d’’o ddicere, ma ajere Gattuso sbagliaje quase tutto: nun sfucuniaje (motivò) a dduvere ‘e suoje, sbagliaje quacche ccagno e asasa (soprattutto) nce facette sentí ‘o defàuto (mancanza) ‘e Pastacrisciuta ‘mporta, ‘e Chitelassa  ‘nchietta cu ‘o Ggialante e dde Lorenzigno ‘nnante. ‘Nzonmma ‘na cosa e n’ata jette a fferní ca ‘o Ciuccio  accumminciaje cu ‘o pere sbagliato ‘a strangusciata soja dint’â Cuppetta aiurupea e mmo è ttutta ‘nsagliuta. Che delusione e cche ccollera! Basta va’ passammo ê ppaggelle.

MERET[‘O Lungagnone] 5 Nun tenette che ffà nsi’ ô 57’ quanno fove chiammato a ffarese vedé, ma  facette troppo poco e ffove futtuto. Penzo ca Pastacrisciuta êsse fatto ‘e cchiú.

DI LORENZO 6,5 Currette appressuranno (spingendo)e racabbannose (sovrapponendosi) e cce pruvaje sempe.  MAKSIMOVIC [‘O Ntontero]  5 Stutecato (distratto) ogne palla ca lle dette ‘o Ggialante nce ‘a turnaje a ddà e mmaje accumminciaje n’azziona uffenziva, arreto [quanno Kalidú ascette a ddà ‘na mana a Mmezacucchiara]  se perdette a  Dde Wit(te) ‘int’ô  muvimento ca purtaje ‘nnante ll’ulandese.

 KOULIBALY[‘O Ggialante] 5,5  Sulo ‘nu sfregazzo (sbavatura) durante ô primmo ajone (nel primo tempo); ‘nnaccasione d’’o stuco (gol) ascette p’ajutà a Mezacucchiara  ‘mpignato cu  Svensson(no), speranno ca ‘o Ntontero cuntrullasse  a Dde Wit(te), cosa ca ‘mmece nun succedette.

 

 HYSAJ[Mezacucchiara] 5,5  Urdinato e attinto a mmancina però  ô 57’ smarrunaje e sse facette   sorprennere da Svensson(no) a jabbraje (crossò) pe DdeWitt(e) cu ssette parme ‘e saciccio… Peccato! [Dô 59' MARIO RUI 5,5 Facette poco e nun carraje ‘nu jabbro (cross)].

 

 RUIZ[Anemalonga] 6  Jucaje assaje ‘mmiez’ô campo tante e ttanti pallunne spisso urtizzanno (verticalizzando), ma nun se vedette annante, né ttiraje maje dô lemmeto.À dda fa ‘e cchiú, visto ca ‘o ppo’ ffà.

 

LOBOTKA 6  Nun facette cape d’angelo ma cacciavino d’ Anemalonga, currette e urdinato e priciso cummigliaje e ddette palla.  [Dô 66' DEMME 6  Facette ‘o ssuĵo, ma niente ‘e cchiú stuppanno ‘e repartite (ripartenze) ulandese.]

 

POLITANO 6  Meno pronto d’ati vvote, ma quanno azziunaje ‘o mancino tagliato fove periculuso. [Da ll’ 83' BAKAYOKO[‘O Mammone] s.v.]

MERTENS[Ciruzzo] 5,5  Serata  appannata. Lle capitaje ‘na bbona accasione durante ô primmo ajone (nel primo tempo) e nnun ‘a sfruttaje.Nun fove capace ‘e truvà spazzio ‘nfra ‘e llinie Tra le linee e nnun cupuliaje (dialogò) cu Ccaramecosta!

 

LOZANO 5  Pure pe isso serata no, troppo ‘mpriciso, se vedette poco e nniente e spisso s’annascunnette chi sa’ ‘o ppecché!  [Dô 59' INSIGNE[Lorenzigno] 5,5 Ce aspettavemo assaje ‘e cchiú, ma ce furnette sulo quacche jabbro (cross) e cquacche ttiro rispinto subbeto.]

 

 OSIMHEN[Caromecosta] 5,5   Sempe appustato, ma facette sulo quacche cusarella, sprecaje ‘nu paro d’accasione e sse scunfurtaje… È guaglione! [Dô 66' PETAGNA 5,5  Cu ‘na cabbesera (colpo di testa) sfresaje ll’addaffa (rete), ma p’’o riesto fove sempe tacatammato.(anticipato)]

 

all. GATTUSO 5  Quanno s’abbusca ‘o primmo respunzabbile è ‘o mutarribbo (allenatore); êva sunato ll’allarme, ma senza truvà remmerie; v’aggiu già ditto ca sbagliaje paricchio  i ‘a scuatra soja ajere ne suppurtaje ‘e cunsequenzie nun riuscenno a sfunnà  ‘o muro ulandese.

arb.:  STEFANSKI 4 isso i ‘a chenca soja Nun vulette vedé nisciuno d’’e tre ricure ca ce fosseno spettate a ffavore, spisso nchiudette ll’uocchie o s’avutaje da ll’ata parta pe nun vedé ‘e carí (falli) ‘e ll’ulandese e ne nutizziaje (ammoní) sulo uno e ssulo a ll’uttantesimo addó ll’êss’avuto ‘a fa ggià a mmità d’’o primmo ajone (tempo).

E ffermammoce cca cu ‘o ttuosseco ‘mmocca e sse ne parla, si ‘o Cielo ‘o vvo’ llunnerí pe ccuntarve chello ca succere dummeneca a Bbeneviento all’ora d’’a tiella.

Staveti bbe’. R.Bracale Brak