‘A PUPATELLA I ‘O PAPPAGNACCO 4ª parte

NCE STEVA ‘NA VOTA

Cunte a mmanèra mia.

[Si Perreault nun fósse stato frangese,  e ffósse nato ‘mmiez’ô Mercato a Nnapule  i avesse scritto a llengua napulitana…]

‘A PUPATELLA I ‘O PAPPAGNACCO

[La bella e la bestia] 4ª parte

A ‘nu certo punto, guardanno ‘nfunno a ‘na filèra d’arbere, vedette ‘na granna luce ca lle parette luntana luntana.

S’abbiaje mmerz’â luce e s’addunaje ca chellu sbrennore asceva da ‘nu granne palazzo tutto allummato.

 Ringrazziaje ‘o cielo p’’o succorzo avuto i allungaje ‘o passo p’arrivà ô castiello, però arrivato e trasuto d’int’ô curtiglio  rummanette assaje stupetiato datose ca nun ce truvaje n’anema viva.

‘O  cavallo suĵo ca lle jeva passo passo arreto abbistaje ‘na scicca remessa aperta e sse mmuccaje dinto; ce truvaje vrenna e sciuscelle i ‘o povero animale ca se puzzava ‘e famma, se ne magnaje ‘nu cuofeno abbremmatamente. ‘O ciràulo ll’attaccaje â magnatora  e ssagliette ‘nu scalone trasenno   dint’â fraveca, ma manco lla truvaje a nnisciuno.Arapette ‘na porta tutta ‘ndurata e sse truvaje dinto a ‘nu salone addó steva apparicchiata ‘na tavula chiena ‘e cacciate  e sciampagna,ma cu unu posto.

Datose ca steva nfuso cumme a ‘nu purpetiello  p’’a neve i ‘a tant’acqua pigliate s’accustaje ô fucone pe s’asciuttà penzanno : “’O padrone ‘e casa i ‘a servitú, mo ch’arrivano ‘e certo  me scusano si sto’apprufittanno d’’a situazziona!”

Aspetta, aspetta ma  nisciuno se faceva vedé…, però passate ll’unnece sunate ‘o ciràulo ca teneva assaje famma pigliaje ‘nu pullasto  e ‘na forma ‘e pecurino e, tremmanno ‘e paura, se magnaje tutto cosa ‘int’a dduje vuccune.Spilaje pure ‘nu paro ‘e bbutteglie ‘e sciampagne e s’’e bbevette piglianno curaggio; ascette dô salone e, traverzate paricchi stanze tapezzate e ammubbigliate cu sfuorgio nsi’ a cche  nun se truvaje dint’a ‘na scicca cammera cu ‘nu lietto appruntato e ddatose ca s’era fatto cchiú ‘e mezanotte e sse senteva stracco muorto nzerraje ‘a porta, se spugliaje e sse ‘nfilaje dint’ô fodero.

Erano ‘e ddiece d’’a matina quanno se scetaje e se facette assaje maraviglia truvanno pronto ‘ncopp’â pultruncina d’’o lietto ‘nu custume ‘e velluto nuovo ‘e trinca e ttutto ricamato ô posto d’’o suĵo strutto i arrepezzato.

“Cumme se vede”,penzaje, “ca ‘int’a ‘stu palazzo nce sta ‘e casa ‘na fata ‘e core bbuono ca m’à visto i à avuto pietate de me puveriello!”

S’ affacciaje â fenesta e vvedette ca nun ce stevano cchiú né arbere, né nneve, ma pergulate ‘e bbelli ppiante e dde giesummine mprufumate   ca sulo a gguardarle t’annammuravano.

Riturnaje allora dint’ô salone addó êva magnato e cce truvaje appruntato ‘nu tavulino  cu ‘nu tazzone ‘e purcellana chino ‘e ciucculata cauda e ‘nu cabbarè cu viscuotte ‘mbuttunate.

“Grazzie tante”, dicette aizanno ‘a voce, “grazzie assaje, signora fata, d’’a gentilezza vosta ch’à penzato pure a chesta marenna sapurita!.”

Pigliata ‘a cioccolata cu ‘nu paro ‘e viscuotte ‘mbuttunate, ascette pe se jí a ppiglià ‘ô cavallo suĵo, ma passanno sotto a ‘nu pergulato ‘e rose janche s’arricursaje ca   Pupatella ce n’aveva addimannata una pe ccuje tagliaje ‘nu ‘nzertone addó nce ne steveno tre o quatto ggià schiuppate. N’attimo doppo  sentette ‘nu schiasso forte e vvedette ca lle veneva ‘ncontro ‘nu schiantuso  Pappagnacco ch’isso pe ppoco nun venette meno; “ Overo ca site ‘ngrato”, dicette  ‘o Pappagnacco cu ‘na voce ‘e mammone, “v’aggiu  salvato ‘a vita accugliennove dint’ô  castiello mio, v’aggiu sazziato e vvestuto  e vuje pe rricanuscenza, vuje v’arrubbate ‘e mmeglio rose mie ca so’ ‘a cosa ca cchiú mme sta a ccore a ‘stu munno. Nun ve pozzo perdunà e nnun ve rummane ato ca murí; ve cuncedo ‘nu quarto d’ora ‘e tiempo pe ddimannà a Ddio perdono d’’e peccate vuoste!”

‘O ciràulo se jettaje addenucchiato ‘nnante ô Pappagnacco e lle dicette:

“Munzignó, ja’ , perdunateme: overo nun me penzavo d’offennerve cuglienno ‘stu ‘nzertone p’una d’’e ffiglie meje ca me ll’aveva addimannato!”

“Nun songo ‘nu   Munzignore”, rispunnette ‘o mammone, “ ma ‘nu Pappagnacco i ‘e  cumplimente nun fanno pe mme; i’ voglio ca ogneduno parla cumme ‘a penza; pirciò nun ve mettite ‘ncapo ‘e ‘ntennerirme cu ‘e cchiacchiere voste . âte ditto ca tenite cchiú ‘e ‘na figlia, mbe’ ve pozzo perdunà sulo una ‘e sti figlie vene cca a mmurí ô posto vuosto. Basta accussí! Mo jatevenne e ssi nisciuna figlia vosta vo’ vení a mmurí pe vvuje, ggiurateme ca ‘ncapo ‘e tre mmise cca turnate.”

 

‘O pover’ommo nunn’era ‘ntenziunato  a sacrificà una d’’e ffiglie a cchillu mammone, ma penzava: “ P’’o mumento nun foss’ato  allimmeno aggio ‘a consulazziona di puterele abbrazzà  n’ ata  vota.”e prumettette juranno ca fósse turnato e ttanno ‘oPappagnacco  ‘o cungedaje dicenno ca se ne puteva jí. “ Però nun voglio”, dicette ancòra, “ca te ne vaje a mmane vacante. Torna pirciò dint’â cammera addó hê durmuto e lla nce truove ‘nu buaglio vacante, miettece chello ca vuò ca i’ po t’’o faccio purtà â casa toja.”

A ‘stu punto ‘o Pappagnacco se ne jette i ‘o  ciràulo dicette ‘nfra sé e ssé: “Allimmeno, si aggi’’a murí pozzo lassà ‘nu muorzo ‘e pane â figliulanza mia.”

Turnaje dint’â cammera addó êva durmuto e vve truvaje munete d’argiento e oro a ccofane e sporte; ne rignette ‘o bbauglio ca truvaje lla cumme  ll’êva ditto ‘o  Pappagnacco ‘o nzerraje, se pigliaje ‘o  cavallo lassato ‘int’â remessa i ascette dô palazzo dsufferenno mentre quanno nc’era trasuto era tutto cuntento. ‘O cavallo, cumme si fósse stato felice ‘e turnà â casa, a ppe isso pigliaje una d’’e vviarelle d’’o vuosco e dinto a ppoch’ore ‘o ciràulo se truvaje â casarella soja.Figlie mascule e ffemmene lle jetteno vicino abbrazzannolo e accarezzannolo, ma isso  ‘mmece d’essere cuntento d’’e carizze avute ‘e gguardava stupetiato chiagnenno a ttanto  ‘e lacreme. Teneva ‘mmano ‘o ‘nzertone ‘e rose e ‘o dette a Pupatella dicennole: “Bbella ‘e papà, Pupatella mia pígliate ‘sti rrose ca so’ ffresche  ma costano assaje care a ‘stu   povero pate vuosto!”

E accussí raccuntaje pe ffilo e ppe signo chello ca ll’era capitato.

Sentenno ‘o fatto  ‘e ddoje sore cchiú ggrosse se mettetteno a sbraità a mmaleparole  contr’â sora piccerella  ca però nun rispunneva né cchiagneva.

“’ E vvi’ lloco -dicevano -  ‘e risultate  “d’’o sfarzetto ‘e sta capa fresca! Pecché pur’essa nun facette cumme a nnuje e nnun addimannaje quacche ccustume? Chi t’’o ddà?! ‘a signurina vuleva squinternarese. E mmo essa è ‘a causa d’’a morte d’’o pate suĵo e nnun lle fa né ccaudo, né ffriddo.”

 ‘Sta vota Pupatella rispunnette: “E pecché êsse ‘a chiagnere? Papà nun more ‘na vota ca ‘o pappagnacco s’accuntenta d’una d’’e ffiglie soje e i’ so’ ppronta a gghí ô posto ‘e papà anze ne songo felice pecché accussì pozzo pruvà ‘a cuntentezza e salvà ô vicchiariello nuosto dimustrannole  pure tutt’’o bbene ca ll’aggiu sempe vuluto!”

“No, Pupatella nosta ”, lle dicetteno ‘e tre frate, “tu nun hê ‘a murí pe mmano d’’o pappagnacco, nce jammo nuje a ttruvarlo e mmurimmo nuje si nun fóssemo capace d’acciderlo.”

“Guagliú, levatavello ‘a capa ”,lle dicette ‘o  ciràulo, “’a putenza ‘e ‘stu Pappagnacco è accussí scunfinata, ca nunn’ è ppussibbile acciderlo. Certo me fa piacere sapé ca Pupatella me vo’ tantu bbene, ma nun voglio mannarla a mmurí; i’ so’ vviecchio e ppoc’ato me rummane ‘a campà;tutto summato nce pozzo refonnere quacche mmese o anno ‘e vita, ma nun me ‘mporta pecché ‘o ffaccio p’’o bbene vuoste guagliune e ffiglie mĵe .”

“Ve dongo ‘a parola mia, papà” dicette Pupatella, “ca vuje nun ghiate a cchillu palazzo senza ‘e me e vvuje nun me putite ‘mpedí ‘e venirve appriesso. So’ ggiovane sí, ma nun so’ tanto attaccata â  vita, e preferisco essere cianculiata da chillu mammone ‘mmece ca murí p’’o dulore d’averve perzo! ”

Aje voglia ‘e parlà…  Pupatella vulette partí pur’essa p’’o palazzo d’’o pappagnacco i ê ssore nun lle parette overo pecché se fragneveno ‘ncuorpo ‘e ggelusia p’’e cqualità d’’a sora piccerella.

‘O ciràulo era accussí stunato dô penziero ‘e perdere ‘a figlia ca nun lle venette ‘ncapo ‘o bbauglio ch’isso êva nzeppato ‘e munete ‘argiento e oro.

Ma appena arrivaje dint’â cammera ‘e lietto ‘o truvaje ‘nnante ô lietto e rrummanette maravigliato, però risulvette ‘e nun dicere ‘ncasa cumm’era addivintato ricco pe ppaura ca  ‘e ffiglie grosse se  mettesseno ‘ncapa ‘e vulè turnà ‘ncittà , addó ca isso êva fatto cunto ‘e murí ‘ncampagna. Sinamparco cunfessaje ‘o sicreto  a Ppupatella, ca lle cuntaje ca mentr’isso steva luntano cierti cavaliere erano jute â casa lloro e ce ne steveno dduje ca se sgargïavano  cu ‘e ddoje sore cchiú ggrosse e essa se raccumannaje cu’o pate ca ‘e ffacesse ‘mmaretà giacché ‘e vvuleva bbene, ‘e vvuleva sapè cuntente e lle perdunava tutto ‘o mmale ca ll’êvano fatto.  A ‘stu punto, mentre Pupatella parteva chelli ddoje matèleche se ‘mbruscenajeno ll’uocchie cu ‘a cepolla pe cchiagnere a ccumanno; ‘mmece ‘e frate chiangevano overamente: e ppure  ‘o ciràulo nun riusceva a ttrattenè ‘e llacreme;’a sola ca nun chiagneva  era Pupatella ca nun vuleva aggravà ‘o delore ‘e ll’ate.

‘O cavallo attaccato ô calessino cu ‘o pate e Ppupatella se ‘ncammenaje ‘mmerz’ô palazzo e appena scuraje notte ‘o vedette da luntano tutt’allummato. Mentre s’accustavano ô palazzo tecchete ca ‘nnant’ô calessino accumparette ‘na vicchiarella cu ‘nu sacco chino ‘e castagne ‘ncopp’ê spalle. Pupatella dicette ô pate ‘e fermà ô cavallo  pe ffà saglí ‘a vicchiarella can un ce ‘a faceva a ccarrià ‘o sacco; ‘o pate accunzentette e Pupatella ‘mmitaje â vicchiarella a mmuntà ‘ncopp’ô calesse. Sagliuta,  ‘a vicchiarella ringrazziaje e sse facette accunoscere: era ‘a fata d’’o vuosco  ca saputp ‘e fatte cumme steveno dicette aummo aummo â guagliona: “ Pupatella, i’ so’ ccuntenta d’’a bbuntà vvosta e dd’’a bbona azziona ca vulite fà dànno ‘a vita pe cchella d’’o pate vuosto. State sicura ca ve mmeretate ‘nu premio e i’ nnun v’’o faccio mancà!”

Arrivate ô castiello’o cavallo se ne jette a ppe isso dint’â remessa mentre ‘a vicchiarella s’alluntanaje cundicenno ca jeva a ppusà ‘e ccastagne. Allora ‘o ciràulo e Ppupatella trasetteno dint’ô salone addó truvajeno ‘na tavula apparicchiata a mmestiere pe dduje;‘o ciràulo, ca teneva famme,nun sapeva deciderse a mmagnà, ma  Pupatella, sfurzannose ‘e paré cuíeta s’accustaje â tavula servennolo mentr’isso diceva:“Aggiu capito: ‘o  Pappagnacco me vo’ ‘ngrassà  primma ‘e cianculiarme! Me n’addono da cumme me tratta!”

Doppo  cenato,sentetteno ‘nu granne scassascasso i ‘o ciràulo, cu ‘e llacreme a ll’ uocchie,dicette addio â figlia soja pecché sapeva ca steva p’arrivà ‘o Pappagnacco ca cumminfatte arrivaje; vedennolo Pupatella,se sentette ggelà ‘o sanco ‘int’ê vvéne, ma cercaje ‘e nnun ddarelo a vvedé   e cquanno ‘o mammone lle spiaje si era venuta  lla cu ppiacere rispunnette ‘e sí  cu ‘nu tremmuliccio ‘int’â vocia.

“Overo  ca site ‘na bbrava figlia”, dicette ‘o Pappagnacco, “e i’ ve ne  songo ricanuscente. A vvuje mio signó.. Dimane ve ne putite partí e cercate ‘e nun turnà cchiú da ‘sti pparte. Pupatella,tu ‘mmece va’ te cocca e ddimane mmerz’a ll’otto fatte truvà lloco quanno i’  vengo!”

“D’accordo,’Ccellenza” rispunnette essa. I ‘o mammone sparette, proprio mentre accumpareva ‘a Fata d’’o vuosco cu ‘o sacco ancòra chino.

 

“Oh ! figlia mia”, dicette  ‘o ciràulo abbrazzannola e vvasannola, “nun voglio lassarte cca; vattenne tu e rrummango i’. Stamme a ssèntere!”

“No, papà, no!”, rispunnette   Pupatella cu ffermezza, “vuje dimane mmatina jatevenne e llassateme stà. Forze ‘o Cielo ave pietate ‘e me e mm’ajuta!…”

A ‘stu punto ‘a Fata d’’o vuosco aummo aummo lle dicette senza ca ‘o pate sentesse: “’O Cielo t’à ‘ntiso e tt’ajuta; pe mmo vatte  a ccuccà e ddimane se ne parla”.

‘O ciràulo i ‘a figlia se ne jetteno a ccuccà penzanno ca nunn’êsseno nchiuso uocchio tutt’’a notte, ma ‘mmece cumme se cuccajeno s’addurmetteno  E Pupatella ‘nsuonno penzaje ê pparole ca ll’êva ditto ‘a vicchiarella.

Pirciò se scetaje arbanno juorno, appruntaje ‘o ccafè p’’o pate e nce ‘o ppurtaje  e ppo, mentre ‘o pate se priparava pe ppartí, lle cuntaje ‘o fatto d’’a vicchiarella i ‘a prumessa avuta.

‘A cosa ricunfurtaje ‘nu poco  ô ciràulo  ca però partenno se facette ô stesso ‘nu mare ‘e lacreme staccannose dâ figlia ca fradintanto scennette addó s’era ‘ncuntrata cu ‘o pappaggnacco e ttruvaje ‘a Fata d’’o vuosco ca ammunnava ‘nu tummulo ‘e castagne sbacantanne ‘o sacco. “Ve pozzo ajutà?” dicette Pupatella. “Certo ca sí - rispunnette ‘a Fata – primma facimmo e pprimma te risolvo ‘a facenna toja”. ‘Ncapo ‘e ‘nu quarto d’ora ammunnajeno tutt’’e ccastagne e assaje primma d’’e ll’otto ‘a Fata ‘e mmettette a vvollere e nne facette allesse; po mentre Pupatella ‘a guardava stralunata, scafacciaje tutte ll’allesse,  ‘e ‘mpastaje cu ‘o zzuccaro e ccu cchillu ‘mpasto facette ‘nu pupazzo gruosso suoccio a Ppupatella, ‘o vestette cu ‘nu custume d’’a guagliona e ll’assettaje vicino ô fucone; po ‘a Fata e Ppupatella s’annascunnetteno arreto a ‘na tenna pe vedé che succedeva quanno arrivava ‘o pappagnacco, ca ‘mpunto a ll’otto trasette  cu ‘o solito scassascassa e ccumme vedette ‘o pupazzo subbeto s’’o cianculiaje vestuto e bbuono dicenno: “Nun sulo era ‘na bbrava guagliona, ma pure sapurita.” A ‘stu punto se sculaje ‘nu paro ‘e perette d’aglianeco e ss’addurmette sott’ô colpo. Allora Pupatella i ‘a Fata ascetteno dâ tenna e sse ne jetteno passianno p’’o castiello; capitajeno dint’a ‘na bbibbluteca cu ttante e ttanti libbre; ‘a guagliona, ‘mmezziata dâ Fata scigliette  ‘nu libbro ‘ntitulato a llettere d’oro: “Pretennite e ccummannate; ca vuje site  signora e ppadrona!…”.

“Mare a  mme!”, penzaje essa, “i’ voglio sulo vedé a ppapà e ssapé qua’ fine à fatto a ‘stu mumento! ” Chesto penzanno guardaje dint’a ‘nu specchio e vvedette ‘mmiez’ô vuosco addó se truvava a cchillu mumento ‘o pate ca s’era fermato a pparlà cu ‘nu scicco cavaliere, tale Rigginaldo, ‘ncuntrato pe ccaso, ca -tenite mente! – era ‘nu nepote d’’o pappagnacco i ‘o steva jenno a ttruvà.

‘O ciràulo  ch’era trafechino ‘o vulette accumpagnà pe vvedé qua’ fine êsse fatta Pupatella e arrivato ô castiello avette ‘a surpresa ‘e vedé ‘o pappagnacco ancòra ‘mbriaco ca durmeva stiso ‘nterra e a ggioja ‘e vedé a Pupatella ca lle jette ‘ncontro currenno e rredenno. S’abbrazzajeno tutte  felice i ‘a guagliona  lle cuntaje tutto chello ch’era succieso cumpreso ‘o fatto ca ‘a Fata primma ‘e sparí ll’êva rijalato ‘nu sacchetto ‘e perne e bbrillante.

‘O ciràulo  presentaje ‘a figlia Pupatella a Rrigginaldo ca cumme ‘a vedette restaje surpreso dâ bbellezza d’’a guagliona e nun se spiecava cumme maje ‘o zio durmesse ‘nterra ‘mbriaco dato ca ‘o sapeva pe bbevitore ca maje s’era arracchiato. Allora Pupatella lle spiecaje ca ‘o zio s’era fatto ‘na magnata ‘e paricchi chile d’allesse nzuccarate vevennose ‘a coppa dduje periette ‘e vino. “Ah- alluccaje Rigginaldo – mo capisco! Nuje ‘e famiglia, nun putimmo parià ‘e ccastagne e ppure si ne magnammo tre o quatto ce sentimmo male. Figurateve cumme s’à dda sèntere ‘stu poveru zio mio  cu ttutte ‘e ccastagne ca s’è mmagnate… Chisto mo, è ccapace ca nun se repiglia primma ‘e ‘nu paro d’ore…” E ccumminfatte justo doppo ddoje ore ‘o pappagnacco arepette ll’uocchie facenno ‘nu rutto, vedette ‘o nepote e ddicette: “ Guaglió, hê fatto bbuono a vvení… I’ sto’ mmale e mme sento ‘e murí!” “ O’ zi’ nun parlate accussí – dicette  Rigginaldo – ‘nfra poco ve sentite meglio!” “No, no, guaglió, lassame parlà – luteniaje ‘o pappagnacco – i’ me ne sto’ gghienno e tte lasso tutto a tte  ca sî stato ll’unicu nepote a rricurdarese ‘e me!” E nchiudette ll’uocchie arricettannose.

‘O nepote lle facette ‘nu spanfiante funnarale facennose cunziglià, pe ll’aparatura dô ciràulo pigliaje pussesso d’ògne sustanza d’’o zio e vvulette ca Pupatella i ‘o pate restasseno cu isso dint’ô castiello spesate ‘e tutto. Pate e ffiglia accunzentetteno e ppassajeno dduje bbuoni mise ‘e villeggiatura; ògne ttanto ‘a Fata d’’o vuosco se faceva vedé da Pupatella cunzigliannola p’’o mmeglio   e accussí quanno   Rigginaldo oramaje ‘nnammurato, addimannaje ô ciràulo ‘a mana ‘e Pupatella, ‘a Fata dicette â guagliona d’azzettà dicennole: “Pupatella, è vvenuto ‘o mumento ca v’attocca ‘a ricumpenza d’’a bbuntà vvosta  , e vve  mmeretate pe cchesto d’essere premiata  cu ‘nu bbuonu matremmonio ca ve fa addivintà  Riggina ‘e tutt’’e tterre cca ttuorno!” Súbbeto Rigginaldo urganizzaje ‘o spunzale e mmannaje pure a cchiammà ‘e ssore ‘e Pupatella Quanno arrivajeno, ‘a Fata se facette vedé chiammannose ‘e ddoje sore ‘e Pupatella cundicenno: “Quanto a vvuje, signore mie,  cunosco ‘o core vuosto  e cquanto site mateleche… ca pirciò, senza perdere ‘o lume d’’a raggiona, site cundannate a ddiventà  ddoje statue ‘e preta una a ddritta e n’ata a mmanca d’’o purtone ‘e ‘stu palazzo ca mo addiventa ‘e Pupatella; e vvuje âte ‘a essere ll’attestante d’’a felicità soja, e pputite turnà a essere ddoje perzone ‘ncarne e ossa sulo quanno v’ arresurvite a rricanoscere’e sbaglie vuoste: però tengo paura ca rummanite statue pe ssempe ggiacché se ponno accuncià sfarzetto, ‘nzirie, cannarutizzia,  e sfattezza, ma p’adderezzà ‘nu core ‘mmediuso e mmateleco nce vo’ sulo ‘nu  miraculo.” I accussí ‘e ddoje sore foveno custrette a ddivintà ddoje statue ‘e guardia ô palazzo addó Pupatella rignava e ccampava felice cu Rigginaldo avenno prummiso ca maje ll’êsse dato a mmagnà castagne!*

Stretta ‘a fronna, larga ‘a via, dicite ‘a vosta ca chesta è ‘a mia.

R.Bracale (fine)