lunedì 17 maggio 2021

FIORENTINA – NAPOLI[16.5.21] 0 A 2 ‘A VEDETTE ACCUSSÍ

FIORENTINA – NAPOLI[16.5.21] 0 A 2

‘A VEDETTE ACCUSSÍ

Che surisfazziona guagliú! Ajere guagliú, che bbella cosa: ‘o Ciuccio, a ll’ora sconceca ‘e ll’apritivo, jette ô Franchi ‘e Firenze, cunzignaje ddoje purpette[56’ e 67’] â viola, se mettette tre ppunte ‘mpurtante dint’â sacca e tturnaje a surpassà ‘ncrassifica chella mariola d’’a vecchia zoccola ca, pe pparta soja sapato, cu dduje ricure[uno cchiú favezo ‘e ll’ato] s’era fatta accumpagnà p’’a mana da ll’ucummo (arbitro) Calvarese e ddâ varra pe vvattere ‘a Bbisciona e ppe passarece mumentaniamente ‘nnante. Però ‘e nuoste ajere scennetteno ‘ncampo dicise a dd’ affuzzà (a vincere) e cce riuscetteno mantenenno ‘a porta acrata (inviolata) e lle detteno, â vecchia zoccola, ‘a risposta ca se mmeretava. Bbuono accussí!

Passammo ê ppaggelle:

MERET[‘O Lungagnone] 6  P’’o primmo ajone (tempo) urdinaria  itarra (amministrazione); a ll’arrancua (nella ripresa) sulo ‘na vota s’êtte ‘a spurcà ‘e guante.

 

DI LORENZO 7 Atalossa (prestazione) ‘e sustanza muvennose cuntinuamente e arrivanno a jabbrà (crossare) cchiú ‘e ‘na vota; fósse a Mmancini lle désse ‘a maglia ‘e titulare  pe  ll’Airupeje.

 

MANOLAS[Chitelassa] 7 Cu ttanta ‘sperienzia e ccegna (grinta) sapenno sempe addó mettere ‘o pere mettette ‘a musarola a  Vlahovic(cio) e nnun facette mancà ‘na bbona dose ‘e strille pe cumannà ê cumpagne.

RRAHMANI 7 Truvaje sempe ‘e cchiusure juste e sse jette a pprucurà ‘nu ricore funnamentale! Applavuse.

 

HYSAJ[Mezacucchiara ] 7  Se magnaje ‘a ferza mancina difennenno e attaccanno cu bboni ghiucate. Pe mme ll’êssen’’a rinnuvà ‘o cuntratto!

 

FABIAN RUIZ[Anemalonga] 6,5 Tuccaje ‘na cifra ‘e pallune quase tutte cu pricisione i a ll’arrancua (ripresa) facette ggirà ‘o pallone cu ‘a sverdezza nicessaria.

 

BAKAYOKO[‘O Mammone] 6.5 Facette aculla (diga) ‘mmiez’ô campo, se muvette cchiú d’ati vvote truvanno tanti antijsse (recuperi) ‘mpurtante.

 

POLITANO 6.5  Tutto summato, pe cchiú de n’ora e mmeza  facette ‘na bbona atalossa (prestazione) currenno e mmettenno  ‘ndifficultà a Ccaceres; se facette vedé pure arreto. [dô76′ LOZANO 6 – Ce mettette ‘a solita sverdezza.]

 

ZIELINSKI 6.5  P’’e primme quarantacinche minute nun se vedette troppo, ma a ll’arrancua (nella ripresa) sagliette ‘e tuono e  riuscette a essere cchiú prisente; ‘e cchiú mettette dinto ‘o pallone d’’o doje a zzero apprufittanno ‘e n’artifaffa (deviazione) ‘e Venuti. Ascette stracquato. [dô76′ MERTENS[Ciruzzo] 6 Se dètte da fa raccurdanno ‘o juoco cu ‘o mediane  e pruvanno a ttené palla pe ffà passà ‘e minute.]

 

INSIGNE 7  Jurnata sí d’’o capitano ca però jellato sott’â mez’ora cu ‘nu granne  tiro ‘e timmurria (punizione) cugliette justo ‘o  ‘ncrucio d’’e pale; se pigliaje ‘a respunzabbilità ‘e sbluccà ‘a facenna tiranno ‘o ricore, ‘o sbagliaje, ma po mettette a frutto ‘a raffadda (respinta) d’’o purtiere. Nun cuntento cugliette pure n’atu palo. S’êss’’a fà bbenericere!

 

OSIMHEN[Caromecosta] 7 –Se muvette cuntinuamente prupunennose sempe cumme stella pulare p’’e cumpagne, currenno a ccapa sotto mentre Pezzella  nun riusceva a gghirle appriesso! ‘O cagno ‘e curzia p’Insigne p’’o doje a zzero fove ‘na perna taminna (preziosa)! [da ll’84′ PETAGNA sv]

 

all. GATTUSO 7.5  Oramaje manca ll’urdemu passo, chillo cu ‘o Verona  e ppo nce aspetta ‘a Ciampionsa! A ‘stu punto si Rino se nne va, ‘ntribbuna divano nce rummanimmo malamente e sperammo ca nun succere.

 

arb. ABISSO 6  Tutto summato siscaje cu pperzunalità; ‘ncarraje quase tutte ‘e ddicisione, ‘mprimmose ‘o ricore assignato ô  Napule,però sbagliaje a nnun ghiettà fora  a Mmilenkovic(cio) ca nun sulo strattunaje e carriaje ‘nterra a Rrahmani, ma facette un’arta a ttirà p’’a maglia a Ccaromecosta!

E bbasta accussí. Mo, si ‘o Cielo ‘o ccuncede ce sentimmo llunnerí ca vene pe ccuntareve ‘a chiusura ‘e campiunato ‘e dummeneca vintitrè ô Maradona contr’’e pariente ‘e Giulietta! Ciuccio fa’ tu! Staveti bbe’! R.Bracale Brak

 

Nessun commento: