SPEZIA- NAPOLI[8.5.21] 1 A 4 ‘A VEDETTE ACCUSSÍ

SPEZIA- NAPOLI[8.5.21] 1 A 4

‘A VEDETTE ACCUSSÍ

Tutto a pposto guagliú o quase! Ajere a ll’ora d’’a tiella ‘o Ciuccio jette ‘ncopp’ô campo d’’o Spezia e ffacette ‘o duvere suĵo: affuzzaje (vinse), ce piacette e sse levaje ‘e pacchere dâ faccia pigliate ô Maradona a ggennajo quanno abbuscaje pe ddoje a uno mentre ajere fove tutta n’ata museca i ‘o  Napule se mettette tre ppunte cauzante dint’â sacca cu ‘nu quatto a uno tunno tunno repiglianno ‘a vulata Ciampionsa; ‘e ccose jetteno accussí: ventajo  (vantaggio) ‘e Zielinski [15'] e ppareglia ‘e Caromecosta [23' e 44'] p’’o tre a zzero d’’e primme 45 minute; peccato ca a ll’arrancua (nella ripresa)pe n’arcatta zaffia (errore grossolano) d’’o Lungagnone [e ppo ve dico…] Piccoli accurtaje ll’ armafaje (distanze) (64') e cce penzaje  Lozano,appena trasuto, a  nchiudere  ‘e cunte (79')servenno ‘a quarta sfugliatella riccia ê lucale. Ora mo ‘e cuane (azzurri) ‘e Gattuso, aspettanno ‘e sapè che ttipo ‘e pastetta fanno stasera vecchia zoccola e ddiavule russe e nnire,   so’ sicunne sule  a 70 punte e ll’attocca ‘e difennere ‘o posto ‘nCiampionsa dinto a ll’urdemi tre mubbare (partite) cu  Udinese, Fiorentina e Vverona   e ssi nun veneno meno dint’ê ccuseture i’ penzo ca ‘o pponno fà asasa (soprattutto) si ‘mporta torna Pastacrisciuta.

Passammo ê ppaggelle:

MERET[‘O Lungagnone] 4,5 Pe ttutto ‘o primmo ajone (tempo) se guardaje ‘o sibbacco(match) e ssulo a ll’arrancua (ripresa)[64’]ll’arrivaje ‘na tacatarrassa (colpo di testa) d’Estevez(zo) e isso smarrunaje malamente nun fermanno ‘a palla, ma rafaddanno (respingendo) ‘a palla centralmente justo ‘ncopp’ê piere ‘e Piccoli ca trasette ‘mporta cu ttutto ‘o pallone. Nun lle pozzo perdunà ‘sta strunzata: pure ‘nu purtiere ‘e dudice, tridice anne sape ca ‘na palla nun se rafadda (respinge)  corta e ccentralmente, ma longa e  vverzo ‘a linia laterale! Sperammo ca torna Pastacrisciuta, giacché è ‘na jastemma menata: cu ‘o Lungagnone ‘mporta, allimmeno n’addaffa (rete) se piglia!

 

DI LORENZO 7  Se vedette ca sta sempe cchiú ‘mpalla e ffacette n’atalossa (prestazione) ‘e sustanza; ‘o ventaje (vantaggio) nascette da tatacalla  (sovrapposizione) soja.

 

MANOLAS[Chitelassa] 6,5  Ce mettette ‘o nnicessario cegna: (grinta) e  mestiere!

 

RRAHMANI 6,5  Se facette rispettà jucanno a ccentro d’’a trasera  (al centro della difesa).

 

HYSAJ[Mezacucchiara ] 6  Sulo p’’e primme minute sufferette a  Vverde, ma po lle pigliaje ‘e mmesure e lle mettette ‘a musarola! [dô 69’ RUI 6,5 Facette ‘na bbona fijura facenno tutt’’o duvere suĵo.]

 

FABIAN[Anemalonga] 5,5 Me dispiace, ma ajere nun ce piacette: perdette cchiú ‘e ‘nu pallone e spisso se chiammaje fora dô juoco.

 

DEMME 6,5  Sempe taminno (prezioso)spisso currette a ddà ‘na mano ê cumpagne addó fove nicessario.

 

POLITANO 6,5  Lle mancaje sulo ‘o stuco (gol) pecché p’’o riesto mettette  ‘ndifficultà a  Mmarchizza.[ dô76’ LOZANO 6,5 Trasette e subbeto mette a ffrutto ‘o missiddo (assist) ‘e Caromecosta! Applavuso.]

 

ZIELINSKI 7 Nicessario, nun sulo  truvaje sempe ‘o spazzio justo ‘nfra ê llinie facenno juoco, ma  ssignaje ll’addaffa (rete) d’’o ventajo (vantaggio)sbluccanno ‘a facenna. (dô 69' MERTENS[Ciruzzo]s.z. Scalugnato, jucaje pochi minute e sse facette male; dô 76' ELMAS[‘O Turco s.z.]]

 

INSIGNE 6,5 Taminno (prezioso) pur’isso asasa (soprattutto) a ll’arracua  (nella ripresa) quanno, capitano overo, fove presente annante i arreto.

 

OSIMHEN[Caromecosta] 8,5   Apprimma ‘na pareglia  da mettere ‘ncurnice e ppo ‘o missiddo (assist) pell’addaffa (rete) ‘e Lozano: overamente mammarrejo (devastante) [da ll’84' PETAGNA s.z.]

E bbasta accussí. Fermammoce cca e mmo, si ‘o Cuielo ‘o vvo’ ce sentimmo miercurí ca vene pe ccuntareve che succede marterí contro a ll' Udinese. Facimmo corne. Ciuccio fa’ tu e staveti bbe’!

Raffaele Bracale Brak