NAPOLI – UDINESE [11.5.21] 5 A 1 ‘A VEDETTE ACCUSSÍ

NAPOLI – UDINESE [11.5.21] 5 A 1

‘A VEDETTE ACCUSSÍ

Vatte ‘o fierro nsi’ ca è ccaudo e ddalle ‘nfaccia, guagliú! Ajeressera ô Maradona fove ‘na serata  overamente pusitiva p’’o Ciuccio; voglio dicere ca ajeressera  ‘nu Napule  tuosto, cuncreto  e zzucarrone (cinico) se mettette dint’â sacca tre ppunte ‘mpurtante p’’a Ciampionsa i ‘o  sibbacco(match) d’’a trentasejesima jurnata se cunchiudette cu ‘nu retissante (clamoroso) cinche a uno p’’e nuoste ca saitarrajeno (dominarono) dô primmo a ll’urdemu minuto  e nemmeno ‘o stuco  (gol) d’Okaka[41’]riuscette a mmettere  ‘ndescossione l’artafavucca (superioritá) d’’e cuane (azzurri) ca mettetteno ‘e ccose ‘nchiaro ggià ‘int’ê primme quarantacinche minute signanno  cu Zielinski[28’] e Anemalonga[31’] e cce mettetteno ‘a jonta a ll’arrancua cu Lozano[57’], Di Lorenzo[66’] e Insigne[91’] facenno ascí ‘ncopp’â rota ‘e Napule ‘na scicca cinquina e ll’unica cosa storta d’’a serata fove chell’addaffa (rete) d’Okaka ô 41’arrivata ‘ncopp’a ll’unicu tiro ‘mporta ca ll’Udinese facette. Cumme aggiu ggià ditto cu chesta arnassa (vittoria) ‘e cuane  (azzurri) stanno vedenno assaje vicina ‘a qualificazziona â Ciampionsa. Nun rummanono ca dduje ‘mbarazze (ostacoli): Fiorentina e Vverona ca penzo ce ponno lassà pure lloro ‘e ppenne!

Passammo ê ppaggelle:

 MERET[‘O Lungagnone] 5: Nunn’êtte ‘a fa niente pe ttutto ‘o sibbacco (match) e sse facette passà ll’unicu tiro arrivato ‘mporta dô lemmeto ‘e muntaca (area di rigore); è overo ca ‘o tiro d’ Okaka fove forte e ‘mpruvviso, ma si ‘o purtiere nuosto êsse liggiuto meglio ll’azziona se fósse pututo menà primma e nno quanno ggià ‘o pallone steva trasenno ‘mporta.È ‘na jastemma menata: cu ‘o Lungagnone ‘mporta, allimmeno ‘nu stuco (gol) se piglia

DI LORENZO 6.5: Cuntrullaje ‘a ferza ‘e dritta cu ammanna (sicurezza) Se mangnaje ‘nu stuco  (gol) a ll’unnicesimo, ma po se facette perdunà ô 66’ ‘o quatto a uno. Cumplimente!

RRAHMANI 6.5:  Forze êsse pututo levà ‘o demmo  (l’appoggio) a Okaka ‘naccasione d’’o stuco  (gol),ma p’’o riesto fove priciso, sicuro e ppulito.

 MANOLAS[Chitelassa] 6.5: Atalossa (prestazione) pusitiva d’’o creco sempe cuncentrato dô primmo a ll’urdemu minuto.

 HYSAJ[Mezacucchiara] 6: Nun facette nisciuna fatica a ccuntrullà ‘a ferza ‘e mancina e ttutto summato p’isso fove ‘na mubbara (partita) senza prubbleme.

[Da ll'84'  RUI s.z.]

BAKAYOKO[‘O Mammone] 6.5:Fove n’aculla (diga) ‘nnanteâ trasera (difesa) e risultaje taminno  (prezioso), muvennose a mmestiere p’attallà (occupare) ‘e ppusizzione lassate libbere da Anemalonga.

[Da ll'84'  DEMME 6:Poche minute pe farlo cuntento e ppiglià parte â festa.]

 RUIZ[Anemalonga] 7: Muttazzo (eccellente); ‘o stuco  (gol) suĵo fove ‘na vera perna, ‘nu  capulavoro, ma fove sulo ‘a cerasella ‘ncopp’â pizza doce ‘e ll’atalossa (prestazione) soja cunnita cu cchiú ‘e ‘nu centenaro ‘e pallune tuccate e quase tutte assaje pricise!

 INSIGNE 7:  Granna atalossa (prestazione) d’’o capitano: venette dint’ô campo, cumannaje ‘a munavara (manovra) dittanno ‘o tiempo e signaje mettenno dinto ‘o stuco (gol) 108 cu  ‘a maglia d’’o Napule. Applavuse!

LOZANO 6.5.  Criscette chianu chiano truvanno pure ‘o stuco (gol), fósse partuto meglio Gattuso nun ll’êsse avut’’a martellà d’allucche ca però servetteno!

[Dô 75'  POLITANO 6: Ce mettette cegna (grinta) e azzaja (impegno) cercanno ‘nu stco ca nunn’arrivaje.Peccato!]

ZIELINSKI 6.5: Purtaje â casa n’ata bbona atalossa (prestazione) cunnita dô stuco ca sbluccaje ‘a facenna; p’’o riesto faticaje a llibberarse dô cuntrollo ‘e  Walace.

[Dô 75'  ELMAS [‘O Turco] s.z.Vinte minute scarze jucate senza ggenio.]

 OSIMHEN[Caromecosta] 7: N’ira ‘e Ddio, uno d’’e meglio ‘ncampo: carimmo (generoso) ‘mpressione, stataffaje  (propiziò)  ‘o stuco  (gol) di Zielinski e ffove periculuso e mmammarrejo (devastante) a ccampo apierto.  Gattuso ‘o levaje sulo pecché  íattico (diffidato) .

[Dô 70'  MERTENS 6 ’e stima : ma facette overo poco.]

all. GATTUSO 7:’O Napule visto ajere, cagnanno purtiere, s’ammereta ‘a Ciampionsa: l’atalossa (prestazione) d’’a scuatra soja fove ‘e granna mistaua   (grande livello), pure pecché doppo ‘o doje a uno Rino ll’avutaje a bbriscula cummannata chiammanno dâ panca ògne muvimento ‘e palla.

arb. CALVARESE 5 Grossi fetenzie nun ce ne facette, ma spisso  vedette ‘na cosa pe n’ata o nchiudette ll’uocchie dicenno: “Nun so’ cacchie d’’e mie!”lassanno correre cchiú ‘e ‘nu sgammetto miso ê nuoste.

E ffermammoce cca cuntente d’’a strazziona asciuta ajeressera ô Maradona e ssi ‘o Cielo ‘o ccunzente ce sentimmo lunnerí pe ccuntareve che facimmo dummeneca  a Ffirenze contr’ê lucale all’ora sconceca ‘e ll’apritivo.Facimmo corna, staveti bbe’ e Cciuccio fa’tu! Raffaele Bracale Brak