CAPPELLETTO RUSSO

NCE STEVA ‘NA VOTA

Cunte a mmanèra mia.

[Si Perreault nun fósse stato frangese,  e ffósse nato ‘mmiez’ô Mercato a Nnapule  i avesse scritto a llengua napulitana…]

 

CAPPELLETTO RUSSO

Nce steva ‘na  vota ‘na piccerella ca campava cu ‘a mamma dint’a ‘na casarella a ll’àfreco d’’o vuosco: ‘sta  piccerella se chiammava Cappelletto Russo pe bbia ca  ‘a mamma ll’êva fatto ‘na mantellina cu ‘nu cappelletto russo i ‘a piccerella s’’a metteva sempe pecché lle piaceva assaje.

Cappelletto Russo teneva ‘na nonna,  vecchia cumm’ô cucco,ca steva ‘e casa  dint’a ‘na casarella doppo d’’o vuosco e ‘nu juorno cadette malata; venuta a ssapé ‘e ‘stu fatto, ‘a mamma ‘e Cappelletto Russo penzaje ‘e mannarla a dd’’a nonna pe lle purtà cierti ppezzelle ch’êva fatto, cchiú ‘nu poco ‘e bbutirro  e ‘nu bbuccaccio ‘e  marmellata.

Primma ‘e moverse ‘a piccerella prummettette â mamma ca nun se fósse fermata dint’ô vuosco pe nnisciunu mutivo, nunn’êsse parlato cu nnisciuno e avesse cammenato lesta pe gghí mmerzo  â casa d’’a nonna.

 Asciuto dâ casa soja Cappelletto Russo s’ abbiaje ma, quanno se truvaje dint’ô vuosco se lassaje ‘ncantà dê sciure dê ppalomme e da quacche animaluccio e sse fermaje  a ppazzià.

‘Nu  lupo, ca steva ‘e casa proprio dint’ô vuosco vedette ‘a piccerella, s’accustaje e sse mettette a cchiacchierà cu essa ca sbruvugnaje addó steva jenno; allora isso lle cunzigliaje ‘na strata cchiú llonga pe pputé arrivà primm’isso â casa d’’a  nonna.E sse mettette a ccorrere p’’a strata cchiú ccorta.

Quanno arrivaje, se facette arapí ‘a porta facenno ‘a vucella  ‘e Cappelletto Russo; trasette e ffacette unu muorzo d’’a nonna e ppo se ‘mpezzaje a llietto sott’ê ccuperte cu ‘a scuffia d’’a nonna ‘ncapo e  aspettaje ca  ‘a piccerella arrivasse diciso a mmagnarese pure a essa.

Cappelletto Russo  quanno arrivaje, guardaje a cchella ca credeva fósse ‘a nonna e lle dicette: “Nunnarè, che uocchie granne ca tiene!” e ‘o lupo rispunnette: “È ppe te guardà meglio.”

“E che rrecchie grosse ca tiene!”

“È ppe sentirte meglio.”

“E che vocca granne tiene!”.

“È per magnarte meglio!!!” i ‘o lupo zumpanno fora dô lietto se ll’agliuttette sana sana.

‘Nu  cacciatore, ca se truvava passanno lla vvicino sentette ll’allucche ‘e Cappelletto Russo, currette dint’â casarella , vedette ‘o lupo ca durmeva a scialacore cu ‘a panza chiena e ce ‘a tagliaje cu ‘nu curtellaccio.

Cappelletto Russo e ‘a nonna zumpajeno fora facenno festa ô cacciatore tanto curaggiuso  e ppe ricanuscenza ‘a nonna dicette â piccerella ‘e dà ô cacciatore quacche ppezzella ch’êva purtato.

‘O fatt’è ca quanno ‘a mamma ‘e Cappelletto Russo êva ‘mpastato ‘e ppezzelle doce s’era sbagliata e ‘mmece d’’o zzuccaro nce aveva miso ‘o ssale, cusicché appena ‘o caccitore ll’assaggiaje ll’avutaje ‘o stommaco, sputaje e ddicette: “E cchesta è ‘a ricanuscenza? Chisto è ‘o cumplimento vuosto? Si càpita n’ata vota, âte voglia d’alluccà, i’ nun ve sento!” Aizaje ‘ncuollo e sse ne jette.

Stretta ‘a fronna, larga ‘a via, dicite ‘a vosta ca chesta è ‘a mia.

R.Bracale Brak