TERRA SCUNTRAFFATTA

Terra scuntraffatta


I

Oj core mio quanto songo luntane
chelli sserate llà d’ ’o tiempo allero,
fora a ’na luggetella ’e quinto piano
â strata d’ ’e Miracule… Cenèra

te stupetiava ll’ aria e si ’na mano
tu ll’ avisse stennuta – e ffaccio overo! –
accarezzanno ’a luna chianu chiano
t’ îsse tignuto ’e janco… Ah, chelli ssere

quanno Napule mia nun s’ era fatta
comme s’ è fatta mo: ’na pucuntria,
terra ’e nisciuno, terra scuntraffatta

addó è assummata tutta ’a fetenzia:
mariuole, ricuttare, cammurriste,
zuzzimma d’ ogni specie e ppezze ’e scisto!…

II

E songo ’e cummannante d’ ’a quadriglia;
se portano ’a bbattuta e ffanno ’e maste…
Me pare ’e stà ô chiano ’e Cinchemiglia
tra accesetorie, arruobbe, accrasta-accrasta,


scippe, rapine… e nun ce sta famiglia
ca nun se chiagne guaje… nun c’ è rimasto
nisciuno ca nun tène quacche figlio
ncopp’ a ’na strata amara e salimasta

ca porta, poco â vota, a ffunno ’e mare…
Chiagnono ’e mmamme e cumme a lloro ’e pate
ca nun sanno che ffà… ’Sti mmorze amare,

ca ’o Cielo o chi sa chi cca ce à mannato,
chesta città s’ ’e scenne: agliotte e zzitta
tuorto p’ ’o ttuorto e tuorto p’ ’o dderitto…

III

Mo si t’ affacce ’a chesta luggetella,
t’ astregne ’mpietto ’a vista ’e ’stu paese…
Che ’mbriacamiento, che putecarella:
’stu casalone sta ’ncopp’ a ’na scesa

’ncopp’ a ’nu precipizzio e a scianchinella
penza ’e jí annanze… ma sa’ che surpresa
ca ’o sta aspettanno! E quanno vène ’o bbello,
quanno è ’o mumento ’e cunzignarla ’a resa,

s’ accurgiarrà ’e quanto s’ è sbagliato
cercanno ’e nnuvità d’ ’e furastiere,
ascianno ’e cagnà vita e cunnutate,

scurdannose ’o ppassato e ’e juorne ’ajere…
E se ne pentarrà amaramente,
ma niente ’o tirarrà a salvamiento!


IV

Ca quanno ’nu paese à rinnegato
’a storia soja facenno ’o traditore…,
quanno – comme a ’nu fesso! – à cancellato
tutto ’o ppassato ca ’o facette onore…,

pe correre e truttà assieme a ll’ ate
(assieme a cchi è nnato â parte ’e fora
e parla n’ ata lengua…) s’ è ’nguajato:
à perzo tutto: faccia, anema e ccore

ma a ccagno ’e niente, oj co’!… E ’a fregatura
ca s’ è ppigliata, è ggrossa, grossa assaje…
e, a ll’ abblativo, è chesta ’a rennetura:

nun sape cchiú chi è… sta ’mmiez’ ê guaje,
se sbatte comme a ttenca dint’ â nassa,
ma ’o munno se ne fotte: guarda e passa!

V

Pecché s’ êsse ’a fermà?… Nun ’o facette
chi ll’ êva ’a fà, giacché figlio ’e ’sta terra,
crisciuto sott’ ô sciato ’e chi le dette
’na dignità, ’nu nomme… ’mpace e ’nguerra…

Ggià, sto’ parlanno ’e nuje… ’e chi sapette
’a verità overa e pe ’nu perro
chijaie ’e spalle e se ne strafuttette
o, pejo ancora, ne facette cierre

’e tutto ’o bbuono e anfino d’ ’e penziere
e d’ ’a parlata soja… Sí, proprio nuje
simmo state ’e cchiú ppegge!… E ’o furastiero

s’ è sentuto ’nderitto – arranca e ffuje… –
’e farne ’e ’stu paese ’na mmunnezza,
sciarmarlo e macenarlo piezzo piezzo!

VI

E mmo, mo che vuó fa?… Tutto è perduto
e manco ’o Pataterno pô appararce…
Chi à dato à dato e chi à avuto, à avuto
avimm’ ’a sulamente rassignarce…

Chesto âmmo asciato, chesto îmmo vuluto,
e ch’ ato maje putevamo aspettarce?
Avimmo voglia mo ’e chiammà ajuto…
nisciuno ce risponne e avimmo ’a starce!

L’ îmmo distrutto ’stu paese bbello,
ll’ avimmo scuntraffatto malamente…
E mmo c’ îmm’ ’a zucarce ’a caramella:

e a nniente serve ’o chianto e ’o pentimento…
E’ mmorta ’sta città… ll’ avimmo accisa
e mmo ll’ îmm’ ’a pavarlo chisto aggriso!
Raffaele Bracale
(dal vol. 'E CCOSE D''O PPASSATO ed. Graus Napoli 2006)