LL'ARILLE

Ll’ arille


Dinto a ’sta notte ’austo, cu ’o calore
ca, poco â vota, m’ à quase squagliato,
e tu che vuó durmí?… Stongo scetato
zucannome st’ arille ’a cchiú ’e doje ore!

Sientele sié!… All’ anema e dd’ ’o coro!
E ’ncasa ’a mana sa’… ’Sta serenata
ll’ à ’nzallanuta ll’ aria,… ’à stupetiata.
Nfrunfú, nfrunfrú, nfrunfrú… e che malora!

Ciuncate ’a lengua! Dateme arricietto!
I’ nun ce ’a faccio cchiú cu ’stu turmiento…
Ma n’ ’o tenite ’nu… santanna ’e lietto?

E ghiateve a cuccà! Nun è pe nniente:
’nu poco ’e cuncertino è ppure bbello,
ma, troppo a lluongo, …te ll’ ammorba ’a pelle!

Raffaele Bracale
(dal vol. 'E CCOSE D''O PPASSATO ed. Graus Napoli 2006)