martedì 26 ottobre 2010

NAPOLI – MILAN 1 -2 LL’AGGIU VISTA ACCUSSÌ.

NAPOLI – MILAN 1 -2 LL’AGGIU VISTA ACCUSSÌ.

Che ddicere d’ ‘a partita d’ajeressera? Ca avesse avuto ‘a essere ‘a mamma ‘e tutte ‘e ppartite e ‘mmece fuje ll’ennesima delusione: ‘o Milanno vincette ô san Paolo contro ô Napule e rummanette sulo ô siconno posto d’ ‘a classifica ‘e serie A addereto â Lazio ca (cose ‘e ll’atu munno) nun se trova chi ‘a ferma! E tutto chesto pecché pe ‘na bbona mez’ora all’inizzio d’ ‘o primmo tempo, ‘a squatra napulitana, cuntratta e futtuta ‘e paura, nun ghiucaje proprio ma ‘e chesto è responzabbile Mazzarri ca nun sapette addestrà psicologicamente ‘e guagliune suje e po pecché nun è possibbile ca fa jucà sempe ‘e stesse, ca ormaje so’ stanche: doppo d’ ‘e ppartite ‘e Catania e cchella cu ‘o Liverpullo, allimméno Gargano, Pazienza, Maggio e forze pure Cavani se fossero ammeretato ‘e tirà ‘o sciato e arrepusarse ‘nu turno. E ppo vulesse sapé pe qua’ mutivo pure ‘ncasa ‘e ffà jucà cu ‘a difesa a ttre?? Nun fosse stato meglio ‘nu difenzore mancante e Dumitro a ffianco ‘e Cavani e cumminfatte ’o Napule jucaje meglio quanno Mazzarri fuje custretto a sguarní ‘a difesa e a ffà jucà Campagnaro avanzato fisso, pe bbia ca Rizzoli (po ne parlammo) aveva jettato fora a Pazienza... Comunque comme è gghiuta e ccomme è vvenuta, ‘o Napule à perzo ‘a siconna partita ‘e campiunato e tutte ‘e ddoje ‘ncasa addó ca ‘o san Paolo era ‘o furtino d’ ‘o Napule e ‘e squatre ca venevano a Forerotta fort’era si se purtavano â casa ‘nu punto! E venimmo ê ppaggelle meje:


DE SANCTIS: 7 Cu tre o quatto parate eccezziunale scanzaje ca ‘o Milanno scrufuniasse (dilagasse) e permettette ô Napule ‘e rummané a ggalla nsino â fine. Nun putette fà niente ‘ncopp’ê duje golle d’ ‘e milanise...

GRAVA: 6 Bbona ‘a partita ‘ndifesa d’ ‘o surdatiello visto ca teneva ‘a marcà a ‘nu certo Ibrahimoviccio ca nun è ll’urdemo arrivato; s’ ‘o perdette sulo ‘na vota quanno ‘ndifesa rummenettero sulo isso e Aronica giacché Campagnaro êtte ‘a dà ‘na mano primma ô centrocampo e ppo a ll’attacco.

ARONICA: 7,5 Jucanno ‘a centrale ô posto ‘e culo’echiummo-Cannavaro facette ‘na bella partita ‘e quantità e ce mettette pure qualità! Vuó vedé ca âmmo truvato ‘o centrale bbuono!

CAMPAGNARO: 6 Bbuono ‘ndifesa finché stette a ffà ‘o difenzore, ma po êtte ‘a dà ‘na mano primma ô centrocampo e ppo a ll’attacco facenno ‘o straurdinario...

GARGANO: 4,5 S’à dd’ arrepusà... Accussí comme sta nun è pruduttivo; ajere currette, currette senza custrutto e anze ogni passaggio fuje ‘nu suggerimento a ll’ avversarie.
(Dumitru: 6+ Assaje risuluto dinto a cchilli pochi minuti ca Mazzarri lle cuncedette. Ll’avesse fatto trasí primma!).

PAZIENZA: 4 Me dispiace ‘e dà quatto a Michelino, ma ajere sbagliaje tutt’ ‘a partita!‘Na partita scarugnata! Po ce se mettette pure Rizzoli (mo ve dico...). Tene ‘ncopp’â cuscienza ‘o gollo d’ ‘o vantaggio milanese...Po se facette ammuní comme a ‘nu nuvellino ca fosse appena asciuto ‘a sott’ô mantesino..
MAGGIO: 4 ‘e stima (pe comme sta a ‘stu mumento...) Ascette subbeto pe sbentura apprennetiva (infortunio preoccupante): capata cu Antonini, ma fino a cchillu mumento aveva fatto poco o niente!
(YEBDÀ: 6 Nun era chillo ‘o posto sujo, ma l’algerino ‘ntreppetaje a dduvere ‘o juoco ‘e cuntrasto!).

DOSSENA: 5,5 M’aspettavo ‘e cchiú, specie cu chillu campo pesante: ‘e ssolite scavallate ‘ncopp’ô curridore mancino ma troppi crosse sballate!

HAMSIK: 5 Pure ‘a isso me fosse aspettato ‘e cchiú. Nun ce simmo ancòra: forze è stanco;sentette ‘a fatica ‘e ll'impegno europeo e facette avvedé ca ‘o fatto nun era d’ ‘o sujo;tutto chello ca facette fuje ‘nu granne tiro ‘a luntano riuscenno a ‘mpignà ‘o purtiere Abbiati.Troppo poco! (SOSA: 4,5 Nun cumbinaje quase niente e nun riuscette a ffà sentere ‘a presenza soja!).

LAVEZZI: 8 Facette vedé ‘e surice russe e vverde a tutta ‘a difesa milanese: nfente e dribblinghe a nun ferní cunnite cu ‘nu gollo maje visto: ‘a mettere ‘ncurnice. LLe fosse pure attuccato ‘nu ricore ca però ll’arbitro nun vulette vedé!

CAVANI: 6 Cu ttutto ca chiuveva a ddelluvio e ca steva stanco, currette a tutto campo,pure si lassato troppo sulo lla ‘nnante; pure isso regalaje quacche gghiucata spettaculare, ma, sfurtunatamente, senza zuco e ssale!


MAZZARRI: 5- Sbagliaje a ffà ‘a formazzione: avesse avuto dà cchiú spazzio ê siconne linee soprattutto a centrocampo addó – comme aggiu ditto e me ripeto pe chiarezza - allimmeno Gargano, Pazienza, Maggio se fossero ammeretato ‘e tirà ‘o sciato e arrepusarse ‘nu turno. E ppo vulesse sapé pe qua’ mutivo pure ‘ncasa ‘e ffà jucà cu ‘a difesa a ttre?? Nun fosse stato meglio ‘nu difenzore mancante e Dumitri a ffianco ‘e Cavani e cumminfatte ’o Napule jucaje meglio quanno Mazzarri fuje custretto a sguarní ‘a difesa e a ffà jucà Campagnaro avanzato fisso, pe bbia ca Rizzoli (mo ne parlammo) aveva jettato fora a Pazienza... L’arbitro RIZZOLI 4 e l’aggiu trattato bbuono! Vulette a fforza fà ‘o prutagunista cu cchella aria ‘e rre cummannascoppole!; comme ‘a vecchia abbitudine soja d’arbitro ca s’ ‘a tira cu ‘e squatre nurdistiche, fuje apertamente ‘nsuggezzione murale rispetto ô Milanno (destinata dô Palazzo, a gghí a ffà allimmeno ‘a Champions…) E pirciò Rizzoli trasette ‘ncampo deciso a non vedé ’o modo ‘e fà pruvucatorio e viulento d’ ‘e milaniste e siscaje sistematicamente e pe partito pigliato contro ê napulitane, favurenno a Ibrahimoviccio & socie ca sistematicamente,soprattutto ‘o svedese, ‘a chillu granne figlio ‘e ‘ndrocchia ch’è, faceva ‘e sceneggiate se menava ‘nterra ô minimo cuntrasto o si appena appena uno lle diceva:”che bbell’uocchie ca tiene!”Nun le parette overo ‘e ammuní a Pazienza (ca comme a ‘nu nuvellino tuccaje sí e nno ‘nu poco ‘o pallone cu ‘a mano sott’â porta milanista, senza cunzeguenze però ) e cchiú ttarde mettennose ‘o regolamento sott’ê piere, ‘o turnaje a ammuní jettannolo â via ‘e fora pecché Michelino era caduto tuccanno involontariamente ‘o pallone cu ‘a mana, ma senza ‘mpedí ll’azzione d’ ‘o Milanno... Quanno po (ô finale ‘e partita) Papastadopulosso (o n’ato, mo nun me ricordo!) stennette ‘nterra in area ‘e ricore a Lavezzi, isso pe nun vedé, s’avutaje ‘a chell’ata parte e facette signo ‘e continuà neganno ‘o ricore ô Napule ca avesse pututo pariggià. ‘O fatt’è ca chisto architetto ‘e Mirandola (ca nun saccio chi ll’à priato ‘e fà ll’arbitro ‘e pallone...) nun è ‘a primma vota ca danneggia ‘o Napule: jate a cuntrullà ll’anno passato Sampdoria – Napule, Napule – Roma, Ce prova gusto! E ppure ajere ssera se spassaje; siscaje a ssenzo unico piglianno p’ ‘o culo ê cinquantamila d’ ‘o san Paolo.
Cu ‘a moviola ‘ncampo forse fosse stata ‘na partita cchiú gghiusta e fforze ‘o risultato nun fosse stato negativo,Lavezzi avesse avuto ‘o ricore e fossero state jettate â via ‘e fora Papastopulosso già ammunito e Robihno pe simulazzione,(mo voglio proprio vedé si ‘a fanno ‘a prova TV!) e nun se fosse nemmeno criato ‘ncopp’ê spalde tutto chellu bburdello succeduto ca puteva ascí a ppisce fetiente! E fósse!Ati pperle ‘e Rizzoli: nisciuna ammonizione pe Bonera ca menaje ‘nterra a Lavezzi ogni dduje minute, nesciuno milanista jettato fora doppo ‘na scazzuttiata, ma n’ammunizzione (po pe furtuna ritirata) pe Campagnaro ca nun ce traseva ‘mmezo.....).
‘Nconcrusione n’arbitro overo ‘na meza cazetta (comme a ttutte ll’arbitre taliane)! ‘O bbello ca me diceno ca Rizzole è n’internazzionale; nun vo’ dicere niente: è ‘na meza cazetta internazzionale!
GUARDALINEE (di ds. e sn.) 4 cecate , mute e ssurde!
E ve lasso dicènnove ca aggiu apprezzato assaje ca â fine d’ ‘a partita ‘o pubblico ‘mpurpato d’acqua à ‘o stesso sbattuto ‘e mmane ê jucature napulitane...
Granne pubbrico pe ‘nu Napule piccerillo!
 prossima!
Brak

Nessun commento: