NUN TE MERAVIGLIÀ!

NUN TE MERAVIGLIÀ! I Core t ‘ ‘o ddico: ‘Un farte meraviglia... Rassígnate ca ‘a vita è cchiena ‘e sbaglie è cchiena ‘e delusione, chiena ‘abbaglie e cquanti, quanti zzarre ce se piglia... ... Cu ‘estranie?No! Cu chi t’ è de famiglia ma te carfetta e tte ll’appronta n’aglio pe ffarte ‘na surpresa cu ‘o sunaglio ca nun te dico a cche s’arrassumiglia, ma t ‘ ‘o ppuó ‘mmagginà! Pe ccuje c’accuoglie si smucenianno a fforza cu ‘na suglia dint’ â matassa ca nun te se sbroglia t’accuorge ‘e tené mmane a tte ‘e ppampuglie ca t’ à lassato chi proprio ‘int’ ô mmeglio pe mmano t’ à sperduto dint’ â neglia!?.. II C’accuoglie? Niente! E te ne faje ‘na croce ma staje cchiú ppejo e nnun ne cacce niente... e nnun te salve maje, tiénelo a mmente neppure si cumbatte o aize ‘a voce... C’è poco ‘a fà! ‘A vita ‘un è maje doce e spisso sott’ô zzuccaro, pugnente scuopre ll’amaro ca t’ammorba ‘e diente facennote ‘a pazzía ‘a cchiú fferoce quanno viene a scuprí ca ‘a curtellata t’ ‘à dato proprio chi t’ è cchiú vvicino e maje e ppo maje ll’avisse suspettato ca te putesse dà ‘na bbotta ê rine... e arruvinarte ll’esistenza sana! Pirciò t’avviso: nun ‘o fà ‘o bbabbano, III e nun farte truvà privo e spruvvisto credenno a ttutte e specie a cchi te dice ca lle sî ccaro e vvo’ ca sî ffelice... No, bbellu mio e cquanno maje s’ è vvisto sincerità a ‘stu munno? ‘O munno è ttristo è ffavezo da mettere ‘ncurnice e ttu tu statte leso e ffa’ ‘o schifíce pe nun te fà piglià dint’ô canisto o nn’essere cugliuto sott’â scella si no rummane cu tantu ‘nu naso o – ch’è cchiú ppejo – nce pierde ‘e ccerevelle quanno te succedesse puta caso ‘e averla ‘a ‘nfamità ‘a cchiú mmalegna ‘a ‘nu parente o da n’amico ‘e ‘nzegna... IV Pecché chest’è, è proprio chisto ‘o fatto ca nun è ‘o ‘stranio a mmetterte ‘o sgambetto e nun è isso a darte guaje! ‘O carnetta ca te cumbina ‘o ‘mpiccio all’intrasatta è ssempe ‘nu parente e tte dà ‘o sfratto lassannote scaruso e ‘ncazunetto e ttu te ll’hê ‘a chijartela a llibbretta stànnote zitto e mmuto e scuntraffatto; giacché si aizasse ‘a voce p’ ‘o dderitto pe rizzelarte d’esse’ stato rutto nisciuno te credesse e dint’ ô stritto stisse a penà, mentre ca ‘o frabbutto ca t’avesse ‘nguajato, ciuotto ciuotto se facesse ‘e rraggione e santanotte! V E ‘o munno – che te pienze? – lle credesse e ccurnuto e mazziato tu restasse ca p’’o parente è pproprio chisto ‘o spasso: è ffarte ‘o mmale, ma purtarse appriesso ‘a bbona nnummenata; ... tené ‘a sghessa ma fà ‘a ffijura ‘e chi nun ammatassa e chi ‘nt’â vita soja nun fa maje scasso mentre ca ‘mmece fa cose ‘e pruciesso! Oj core, co’ tiénelo bbuono affisso ca chesta è verità e ‘un se disgrossa: ‘a cattiveria è ttanta e cchiú ca spisso te vène ‘a ‘nu cugnunto ca d’aliosso te tratta nfino a cche nun spute ‘o rrusso e nun te vede d’ ‘a saluta scusso! VI Pe ccuje – si puó – tu cerca d’ appararte... t’ ‘o ddico, sí, ma nun t’ avesse ‘a dirte pecché c’è ppoco ‘a fà : puó ‘ncutenirte te puó ‘mpuntà, alluccà e verdiarte piglià ciento mesure e cquartiarte ma pe cquanto tu faje pe te n’ascirte ‘o ‘nfamo ce ‘a fa sempe a acceppechirte o pure a tte passà ‘a parte a pparte... e mmaje e ppo maje puó suppurtarne ll’urto! Tu sî cchiú bbuono e nun te rieje allerta, mentr’ isso fa ‘o gialante...Sí è ccurto... ma è ‘nfamo e s’appadrona d’ ‘a cuperta... ‘A ‘nfamità ahimmé è assaje cchiú fforte e è destinata a ddarte ‘e ccose storte! Nun puó scanzarte... Chiaro t’ ‘o dico pecché ne so’ ccerto: cu ‘a ‘nfamità nun c’è partita aperta! accuoglie= metti insieme, ricavi schifice= schizzinoso, qui in senso figurato accorto, scettico, incredulo aliosso= osso del tallone,usato anticamente come dado in giochi di bambini acceppechirte= stremarti, ridorti a mal partito Raffaele Bracale (dal vol. CANZONA MUTA Ed. f. c. Napoli 2012 )