NAPOLI – UDINESE (7/12/13) 3 A 3 ‘A VEDETTE ACCUSSÍ

NAPOLI – UDINESE (7/12/13) 3 A 3 ‘A VEDETTE ACCUSSÍ Cose ‘e pazze guagliú! I’ ancòra nun ce pozzo credere, ma ce aggi’’a credere pe fforza pecché ‘o vvedette cu ll’uocchie miĵe chello ca succedette ajere a nnotte ô san Paolo addó ascette ll’icchese ‘ncopp’â strazzione ‘e Napule e cu cchille d’ajere foveno sette ( dduje cu ‘o Sassuolo, tre cu ‘o Parma e n’ati dduje cu ll’Udinese..), dico sette ‘e punte perdute ‘ncasa dô Napule. E che saciccio! ‘A Juve êva chiammato jenno a vvencere a bBologna, ma ‘o Napule[mannaggia chello ca nun se po’ ddicere...] nun rispunnette! Ê cuane nun avastaje ‘na pareglia (doppietta) ‘e Goran Pandèvvo e ‘na rredda ‘e Dzemailí p’ avé raggiona ‘e ‘na cratista (un'ottima) Udinese, dimustratase quatrata e divertente proprio comme dint’ô fullé perduto a tTurino contro ê campiune d'Itaglia.’Ntribbuna divano ce aspettajemo ca a ffà ‘o fullé fósse ‘o Napule e mmece p’’a primma mez’ora fove ll’Udinese a ttené ‘mmano ‘o pallino d’’o juoco cu Bruno Fernandèsso e cu ll'uruguajano Nico Lopèzzo (chiammate a tèné allerta ll'attacco ‘e Guidolínno visto ca mancajeno ‘ncuntempuranea Di Natale e mMurièllo) e ffoveno proprio lloro a ccercà ‘e mettere ‘ndifficultà ‘o nuvizzio (esordiente) Rafaèllo, ca se facette nutà súbbeto p’’a troppa cunfianza (eccessiva fiducia) a trattà ‘o pallone cu ‘e piere... Soprattutto ‘o fantasista purtuchese se facette nutà pe ccierti bbelli ghiucate e ô 28°,favurito ‘a ‘nu paro ‘e rimpalle furtunate e ‘a ‘na meza deviazziona ‘e Reveillere – (â primma asciuta) – mettenno ‘ndifficultà ‘o purtiere cuano custretto ô tiro ‘e squina (al calcio d'angolo). ‘O Napule (forze pecché mentalmente ggià penzava â sfita ‘e Ciampionsa contro a ll'Arsenàllo) pe ‘na bbona mez’ora stette a gguardà ‘o pussesso palla ‘e ll’uommene ‘e Guidolínno senza reaggí; po’ finalmente se scetaje dô suonno e riuscette a ppurtarse ‘nvantaggio: tiro ‘e squina d’ Insigne, palla ‘ncapa a Federico Fernandèzzo e sponna pe Goran Pandèvvo, ca girannose dint’a ‘nu fazzuletto, comme sape fà isso, casticaje a bBrkic. ‘O Napule ce accumminciaje a ccredere e ll'Udinese sbandaje, tanto ca ‘ncapo ‘e n’atu paro ‘e minute ‘a scuatra ‘e don Rafele redubblaje (raddoppiò) sempe cu Goran Pandèvvo ca cunchiudette a mmestiere ‘na granna travulgente azziona ‘ncopp’â dritta ‘e Higuaínno, ca resistette a dDomizzi e mettette a ccentro camma ‘na scicca palla proprio pe Pandèvvo,ca jette a ccarne e mmaccarune casticanno p’’a siconna vota a bBrkic. Fullé fenuto? Manco pe nniente! Sí, è overo: ll’Udinese parette tramurtita, ma a ll’urdemo siconno d’’o primmo ajone succedette ‘a disturbata e ll’Udinese accurciaje ‘e ddistanze cu ‘a maniera cchiú ‘nzipeta pussibbile;p’’o siconno fullé cunzecutivo doppo chillo ‘e Behrami contro â Lazzio, fove n’ato utobbutto (autogol) a casticà ‘o Napule e ‘sta vota fove Fernandèzzo a ffà ‘a fessaria quanno cercanno d’anticipà a dDomizzi mannaje ‘a palla ê spalle ‘e Rafaèllo mentre ll’arbitro siscava ‘a fine d’’o primmo ajone. A ll’arrancua (Nella ripresa) fove ‘o Napule a ffà quaccosa ‘e cchiú però Brkic nun venette quase maje ‘mpignato. Guidolínno jucaje allora ‘a carta Maicosuel pe vvedé ‘e adderezzà ‘a varca e lle jette dint’a n’uosso pecché a vvinte minute d’ô prazzo (termine) ll'Udinese truvaje ‘o pareggio (ringrazzianno a Inlèrro cva êva perzo ‘na palla ‘ncredibbile) cu ‘nu granne tiro ‘a trenta metre ‘e Bruno Fernandèsso, tiro ca Rafael restaje a gguardà e lassaje passà senza fà niente, addó ch’êsse pututo tentà quaccosa! Passajene duje minute e ‘o Napule turnaje ‘nvantaggio e ffove Higuaínno ca, servuto ‘a Dzemailí, se purtaje a spasso ‘a difesa ‘e ll’Udinese e facette parttí ‘nu bbellu tiro nun trattenuto ‘a Brkic e mmiso dinto‘a Dzemailí ca aveva seguíta ll’azziona. Fullé finalmente fenuto? Manco pe nniente! Chi t’’o ddà?! ‘Ncopp’ a ‘nu tiro ‘e squina ce penzaje Basta [lassato sulo sulo ‘a Behrami (‘a poco trasuto)] a ‘ntussecarce ‘a serata e a ddà ‘o pareggio a all'Udinese, ca ô finale cu ‘nu paro ‘e repartite (ripartenze) ‘e Maicosuèllo êsse addirittura pututo vencere e ll’êsse fatto si Maggio, facenno ll’unica cosa bbona d’’o fullé, nun ll’avesse stuppato cu ‘nu granne ricupero assicurannoce allimmeno ‘o pareggio ca sinamparco (comunque) è acqua ca nun leva sete! A ‘stu punto i’ penzo ‘ncopp’ô campiunato ce avimmo ‘a mettere ‘nu crucione,speranno ‘e mantènere allimmeno ‘o terzo posto ‘ncrassifica e se ne parla â tempurata ca vene... P’ajere nun vale ‘a pena ‘e fà ‘e ppaggelle: salvo a Pandevvo (7) e a hHiguaínno(6,5) e p’’o riesto mecco cinche a ttutte quante, arbitro Gervasoni cumpreso (ca n’aggiu scaurate strunze, ma isso m’ascette cu ‘e piede ‘a fora) e quatto e mmiezo a Inlèrro! E bbasta accussí.Si ‘o Signore ‘o vvo’ ce sentimmo â prossima vota,doppo d’’o fullé ‘e Ciampionsa ch’êssem’’a vencere pe ttre a zzero! Staveti bbe’! R.Bracale Brak