lunedì 24 novembre 2014

NAPOLI – CAGLIARI (23.11.2014) 3 A 3 ‘A VEDETTE ACCUSSÍ

NAPOLI – CAGLIARI (23.11.2014) 3 A 3 ‘A VEDETTE ACCUSSÍ I’ nun ce pozzo credere, guagliú!Ajere a ll’ora ‘e parià, ‘nnante a pparicchia ggente ô san Paolo, ‘o Napule upposto ô Cagliari, doppo averme fatto fà ‘o cuollo luongo pe cquinnece juorne pe vvia d’’a sosta ‘nternazziunale, me ‘ntussecaje ‘a diggestiona nun riuscenno a vvencere e cullezziunanno ‘nu scartellato pareggio ca fove veramente poca rrobba pure pecché ‘a scuatra ‘e don Rafele era riuscita a ppurtarese ‘nvantaggio ‘e duje stuche (gol) e s’era fatto arrivà ‘ncopp’ô doje a ddoje e quanno po riuscette a mmettere dinto ‘o terzo stuco, crediteme facette ‘o terzo rijalo e se facette arrivà p’’a terza vota! Mannaggia chello ca nun se po’ ddicere! Nun me spieco proprio ‘o ppecché ‘e ‘sti ‘nferte natalizzie ‘e contratiempo. C’è ppoco ‘a fà: a nnuje ’a sosta ‘nternazziunale nun ce porta bbuono, comme nun ce porta bbuono chella jettatoria divisa ‘nu ginso e ‘na pugnetta! Eppure s’êsse avut’ ‘a vencere pe ddà ‘na risposta a rroma e juve! Ma chi t’’o dà?! Accussí nun ffove; nun se vincette e se perdette ‘na granna accasione visto ca stanno ‘nvantaggio, ‘e cuane se facetteno arrivà! ‘Sta vota nun ‘e ppozzo perdunà; lassàteme ‘o ddicere: ll’ànn’ âccidere e nun ll’ànn’ ‘a pavà! Passammo ê ppaggelle: RAFAEL 6,5 ‘Ncopp’ô primmo e ‘o terzo stuco nun tenette sfarme (colpe), ma êsse pututo fà coccosa ‘e cchiú ‘ncopp’ô doje a ddoje quanno ‘ a palla attraversaje tutta ’a camma (area) piccerella primma ‘e arrivà ‘ncopp’ô siconno palo addó Fariàsso, nun guardato ‘a De Guzmanno, mettette dinto; sinamparco (comunque)assaje bella ‘a rispinta a mmana aperta sempe ‘ncopp’a fFariàsso, rispinta ca salvaje ‘o risultato e ca lle fà abbuscà miezu punto ‘e cchiú. MAGGIO 5,5 ‘A primma cosa bbona ca facette fov ‘o cruzzo (cross)p’ ‘o stuco ‘e De Guzmanno;se facette apprezzà quanno appressuraje (spinse),ma ‘e diacunale difenzive nun se putetteno guardà; nun riuscette quase maje a avé raggiona ‘e Fariàsso e s’’o perdette sistematicamente. HENRIQUE 5,5 Poco priciso e ppoco attiento: ‘e muvimente ‘e Cossu ‘o disturbajeno e lle levajeno sicurezza. KOULIBALY 4,5 Jurnata no. Po’ capità e ssuccedette ajere Bruttu passo arreto; tenette ‘ncopp’â cuscienza allimmeno ‘nu paro ‘e stuche d’’o Cagliari o forze tutt’ ‘e ttre: Ibarbo ‘o cartiaje ‘naccasione d’’o primmo stuco, ‘ncopp’ô terzo fove prutacunista negativo cu ‘na fessaria grossa quanto ‘na casa e ppure ‘ncopp’ô siconno stuco fove ‘nritardo. GHOULAM 5,5 – Quanno Ibarbo ‘o puntaje, nun ce capette niente. Durante ô primmo ajone (nel primo tempo) lle riuscette sí e nno ‘na chiusura,e a ll’arrancua (ripresa) a ll’epata (in fase) difenziva facette troppi fessarie; meglio quanno se spustaje ‘ncopp’â trecquarte; ll’unica cosa bbona fove chella rimessa laterale longa ca ce fruttaje ‘o primmo stuco. GARGANO 5’A riggia soja fove apprussimativa e ‘mpricisa (cuntaje addirittura nove pasiglie (passaggi) sbagliate e avettemo ‘a dimustrazzione ca ‘o Napule manca ‘e ‘nu reggista overo comme dichiaraje pure Zemànno). INLER 6,5 – Avette’o preggio ‘e tirà ‘a fora ‘na bbotta ‘mpressiunante ca ce furnette ‘o siconno stuco; p’’o riesto jucaje ‘na partita ‘e trancara (interdizione),lassanno ‘a riggia a gGargano, cosa ca fa discutere! (Dô 64° DAVID LOPEZ 6+ Tuosto e resistente; trasette e se piazzaje cu ccuraggio lla ‘mmiezo a ffà chello ca sape fà: ll’epata( fase) ‘e cupertura) Sfresaje (sfiorò) pure ‘o quarto stuco cu ‘na bbotta ‘a fora. CALLEJON 4,5 Jurnata no d’’o spagnuolo ca quase nun se vedette nè sentette, risultanno ‘o cchiú scadente. HAMSIK 5 Me parette ‘o ciuccio ‘mmiezo ê suone, dànnome ‘a ‘mpressione ca nun sapesse ch’aveva ‘a fà; spaisato e ‘mpaurito se muvette partenno da mancina senza maje quaglià; se magnaje pure ‘nu stuco dànno ‘a sensazziona ‘e nun essere cchill’ommo ‘e cchiú d’’o Napule, ma ‘nujucatore nurmale.Peccato! DE GUZMAN 6,5 Cunfermaje ca s’ammeretasse cchiú spazzio. Jucaje centrale addereto ô Pipita dimustranno ‘e puté stà ô posto ‘e Marekiaro; senza cuntà ‘o stuco fove prutacunista ‘e tante ‘nserzione (inserimenti) e ttanti cupuliamiente (fraseggi) ‘nteressante.’Na macchia sola, chella d’avé lassato sulo a fFariàsso ô mumento d’’o siconno stuco ‘e ll’isulane. (Da ll’82° BRITOS sv) HIGUAIN 7 ‘O solito Pipita; facette tutto ‘o duvere suojo:signaje ancòra [e ffoveno sette ‘e fila dinto a ll’urdemi ccinche fullé (gare)],faticaje p’’a scuatra, luttaje senza sparagnarse, se ‘ncazzaje e ffove ll’urdemo a mmullà. ALL. BENITEZ 5,5 Scurdammoce ll’idea d’’o scutetto; ‘a Roma à pigliato sette stuche, ‘a juve sulo quatto ; e ‘o Napule? Quinnice! Cu ‘sti nummere nun se po’ maje vencere ‘o titulo! S’à dda vedé che se po’ ffà p’accuncià ‘a varca arreto e me piacesse ‘e sapé pecché don Rafele à deciso ca quanno manca Giorgigno, ‘a prima palla ‘nriggia spetta a cKoulibalý o a gGargano e nno a Inlèrro! Vallo a ssapé. Arbitro: TOMMASI 5 Scadente, siscaje pe ppartito pigliato sempe contr’ô Napule caputianno ‘e falte (falli) o ‘nventannosele comme succedette ‘naccasione d’’o doje a ddoje. E cu cchesto ve saluto e si ‘o Signore ‘o vvo’ ce sentimmo â prossima vota, ca êss’ ‘a essere viernarí ca vene doppo d’ ‘o fullè d’E.L. Staveti bbe’! R.Bracale Brak

Nessun commento: