UDINESE - NAPOLI (03/04/16) 3A 1 ‘A VEDETTE ACCUSSÍ

UDINESE - NAPOLI (03/04/16) 3A 1 ‘A VEDETTE ACCUSSÍ Mannaggia chello ca nun se po’ ddicere guagliú!Che peccato! Che peccato! Ajere a Udine ce jette tutto stuorto, tutto! E i’ m’’o ssentevo ‘e scennere pe ddereto ê rine ca ‘na vota o ll’ata ll’uocchie d’’e tanti cestarielle (accumincianno ‘a ggiggino uocchie-stuorte) ca ‘o Ciuccio tene ‘ncuollo, m’’o ssentevo ‘e scennere ca ll’avesseno cuóveto e ffósse succieso ‘o llutto … E cumminfatte succedette ajere ‘ncopp’ a cchella latrina ‘e campo ‘e cucozze ‘e Udine addó ‘o Napule jucaje ‘a peggia mubbara (partita) d’’a tempurata (stagione) pigliannose tre ppallette tre, refunnennoce tierze e ccapitale pecché oltre a pperdere ‘o fullé (match) perdette pure ô Pipita jettato fora ‘a ll’arbito Irrati [2] ca, comme m’aspettavo, ce ajutaje p’’a scesa e cce dette ‘na bbona mana a pperdere ‘a mubbara (partita), proprio ô mumento meno adatto ciovè quanno ‘a vecchia zoccola vincenno pe scagno sapato contro a ll’Empoli êva allungato ‘o passo. Mannaggia chello ca nun se po’ ddicere! Nun ce vuleva proprio. Pacienza! Se vede ca nunn’êv’’a essere sciorta nosta ‘e acchiappà ‘a vecchia zoccola. Pacienza! A ‘stu punto sperammo sulo ca d’’e vintune punte ca restano ne cunquistammo allimmeno diciannove, mantenenno ‘o siconno posto ‘ncrassifica, sempe speranno ca fraditanto Aurelione se decide a ddivintà quaccheduno dint’ô Palazzo addó, p’’o mumento conta comme ‘o doje ‘e coppe a bbriscula [quanno ‘o triunfo è a mmazze]i ‘o Napule fenesce d’essere maltrattato e scamazzato dê putere forte, comme càpita mo! P’ajere cunzulammoce sulamente cu ‘o trentesimo stuco (gol) miso a ssigno dô Pipita cu ‘na cagliosa ‘a vinte metre. Passammo ê ppaggelle: GABRIEL 4,5 Media affinata ‘nfra ‘o 7 p’’o siconno ricore parato i ‘o 3 p’’a granna puttanata fatta ‘nnaccasione d’’o doje a uno quanno abbandunaje ‘a porta e sse ne jette a spasso, senza rientrà cchiú,cercanno inutilmente ‘e cuntrastà n’avverzario senza levarle palla. Nun m’aspettavo ‘e vederlo ‘mporta, ma quanno ‘a sciorta ce se mette nun ce stanno fose ‘appenere e rReina, pure presente, comme terzo, ‘mpanca avette ‘nu prubblema nun saccio a cqua’ muscolo e nnun putette jucà! HYSAJ 6 Nun fove sfarma (colpa) soja si’e cumpagne nun ‘o cercajeno e nnun putette appressurà (spingere) ‘ncopp’’â curzia ‘e dritta e ss’accuntentaje ‘e vedersela cu bBruno Fernandesso ca pruvaje, senza riuscirce, a a mmetterlo ‘ndifficultà. ALBIOL 5,5 Miezu zifo (voto) mancante pecché si durante ô primmo ajone (tempo) jette assaje meglio d’’o cumpagno ‘e sezziona (reparto),a ll’arrancua (ripresa) ‘ncappaje pure isso dint’ ô prano (errore) ca nun ce fósse vuluto capitato ô mumento meno adatto quanno se facette surpassà dô pallone ca ‘mpattanno ‘ncopp’ô pere ‘e Theró jette a ffení ‘mporta e cce custaje ‘o terzo stuco (gol) ca ‘nchiudette ‘a mubbara (partita). KOULIBALY 5,5 P’’a primma vota ‘ncampiunato avette a cche ffà cu uno comme a cchillu matarazzo ‘e sbreglie ‘e Zapata ca fisicamente ‘o putette cuntrastà e mmetterlo ‘ndifficultà, comme succedette; pigliato quase ‘ncontratiempo ‘a Badú nun putette ca stennerlo e Irrati siscaje ‘o ricore i ‘o nutizziaje (l’ammoní) e vvisto ca era iatíco (diffidato) ll’attocca pure ‘e zumpà ‘o Verona! Quanno se dice ‘a sciorta ‘e Cazzetta! GHOULAM 4,5 - Juranata no pe ll’algerino ca ggià dâ partenza jette ‘nsufferenzia cu Widmerro ca ‘o mettette ‘ncroce dô primmo minuto, senza ca isso fósse capace ‘e repigliarse e ppe tutta ‘a mubbara (partita) fove uno ‘e chille ca aizaje porvere senza scurdarce cchiú ‘e ‘na fessaria cumpreso ‘o cruzzo (cross) d’’o tre a uno e ccumpresa chella ca dette ll’aggio a Irrati a ssiscà ‘nu ricore ca pe furtuna Gabriello fermaje. ALLAN 6 A ddiferenza ‘e ll’ate allimmeno ce pruvaje pe ttutt’ ‘a mubbara e tturnato ‘ncopp’ô campo ca ‘o vedette prutacunista p’’o ppassato mettette ‘mmostra tutta ‘a dennammechía (dinamismo) soja, pure si ô pprincipio faticaje a ppiglià ‘o passo e ffove custretto a cquacche ccarí (fallo). JORGINHO 5,5 Se ritruvaje cu tTheró ca ‘e secutaje e gghiette ‘nsufferenzia ggià dô pprincipio senza truvà ‘o spazzio justo pe sustàtere (impostare) e s’êtte accuntentà ‘e ‘na cinquantina ‘e pasiglie (passaggi) ‘nduvinate; poche pe uno comme a isso abbituato a ffarene ‘nu centenaro! [Dô 73' EL KADDOURI s.v.] HAMSIK 4 Che bbrutta mubbara (partita) chella d’’o capitano ca nun n’azzeccaje una e ffove prutacunista ‘e ‘nu primmo ajone (primo tempo)senza sale e ssenza zuco, spustato a ddritta visto ca manco da chell’ata parte steva facenno niente; piezzo e ppejo a ll’arrancua (ripresa) quanno addirittura sparette e nnun fovemo crestiano ‘e vederlo cchiú! CALLEJON 5,5 m’aspettavo assaje ‘e cchiú, ‘mmece sí e nno Peppe ‘a ‘nguenta trasette ‘int’ a ll'azziona d’’o pareggio, cu ‘nu bbuonu muvimento ca libberaje ‘o Pipita.[Dô 58' MERTENS 5,5 – Putette fà poco , ma allmmeno se sbattette o ce pruvaje] HIGUAIN 7 Soprattutto p’’a cegna (grinta) ca ce mettette jenno ‘ncerca ‘e ttruvanno, appena nn’avette ll’accasiona, cu ‘na granna cagliosa ‘a vinte metre, ‘o stuco (gol) nummero 30!Troppo sulo annante,cumbattette comme a ‘nu lione nsi’ a cquanno, maltrattato da ll’avverzarie e ‘a Irrati êtte abbandunà ‘o campo, chiagnenno p’ ‘arraggia, nutizziato ‘na primma vota pe pprutesta e ‘na siconna pe cquaccosa ca vedette sulo ll’arbitro, ma nuje ‘ntribbuna divano no! Nurmale ca ‘o Pipita se n’ascesse mannanno tutte quante a ffà cchiú ddinto ‘e dint’ô prozo! INSIGNE 4 Aizaje porvere pe ttutt’ ‘a mubbara (partita) senza maje fà coccosa ‘e custruttivo e ssenza maje cupulià (dialogare) cu ‘e cumpagne ‘e sezziona (reparto)! Ô posto ‘e Sarri ll’êsse mannato ‘mpanca ggià dô prazzo (dalla fine) d’’o primmo ajione (del primo tempo). [Dô 72' GABBIADINI sv] ALL. SARRI 4 pecché quanno se perde ‘a primma sfarma(colpa) è pproprio d’ ‘o mutarribbo (trainer)e ajere Sarri ne avette tante ‘mprimmose pecché se nfessette a ffà jucà ggente ca , comme v’aggiu ditto, aizaje sulo porvere e nnun tenette ‘o cuorio ‘e cagnarle súbbeto e ppo pecché sbagliaje a lleggere‘o fullé (match) giacché se sapeva ca Di Canio êsse jucato cu ccinche centrocampiste o pe mmettere ‘nu pulmmanne ‘nnante â porta o ppe ‘mpedirce ‘e jucà, comme puntualmente capitaje e isso nun riuscette né pprimma, né durante ô fullé (match) a ttruvà ‘e mmesure nicessarie p’adderezzà ‘a varca. Doppo ‘sta scunfitta, pe cchello ca succedette, pe gghionta ‘e ruotolo, mo ce attocca pure ‘e repiglià senza Koulibalý, Mertenso, addirittura ‘o Pipita e a sseje punte dâ vecchia zoccola! E vva' te lava, va'! Arbitro IRRATI 2 ‘Ncopp’ a ll’almanacche diceno ca è dde Pistoia, ma ajere dimustraje d’essere ‘e Turino e ppricisamente d’’o Cottolengo: tutto scemo siscaje puntualmente ad capocchiam e cchiú ca spisso ‘ndanno d’’o Napule e cchesto nun tanto p’’e duje ricore assignatece contro [pure si forze sí e nno ce steva ‘o primmo]tanto ‘o siconno Gabriello ‘o paraje… quanto p’’e troppe cartelline jalizze (gialle)sventulate sotto ô naso d’’e cuane e pparicchie a spruposite cumpreso ‘o siconno contro ô Pipita ca nun êva fatto assulutamente niente mentre sistematicamente era stato pruvucato e mmazzuliato, senza ca isso ‘o pruteggesse! E ccu cchesto ve saluto guagliú, ddannoce appuntamento, si dDi’ vo’, a llunedí ca vene quanno spero ‘e cuntareve cose bbone doppo d’’ a visita ca dummeneca diece ce vene a ffà ‘o Verona. E arrricurdammo ‘ncoro a mMassimiliano Allegri ca, p’’a favetta ca ce menaje, cugliennoce, à dda fà ‘na mala morte, assettato ‘ncopp’ a ‘nu cesso, affucato dint’ê sciorda soja stessa! E a Gonzalo voglio arricurdà ca lle vulette bbene da 'o primmo mumento, ma da ajere, pe cchelli llacreme soje, lle voglio ancòra cchiù bbene; mo overo ca è uno 'e nuje i è ppe cchesto ca - comme si fosse figliemo - lle cunziglio 'e cagnà aria e gghirsene a gghiucà dint'a 'nu campiunato cchiù sserio 'e chillu tagliano, dint'a 'nu campiunato addò nun se fanno pastette a ffavore d''a vecchia zoccola!Stamme a ssèntere Pipita e vvattenne addò te mmeretano! I a vvuje, guagliú, dico staveti bbe’! R.Bracale Brak