NAPOLI- SALISBURGO (ciampionsa 05/11/19) 1 A 1 ‘A VEDETTE ACCUSSÍ

NAPOLI- SALISBURGO (ciampionsa 05/11/19) 1 A 1

‘A VEDETTE ACCUSSÍ

E che ce vulite fa, guagliú: è ‘na caracuddamma (stagione) storta e cce ll’âmm’’a chiejà a llibbretto…. Ajere ssera ‘ntribbuna divano ce fóssemo aspettate ‘e vedè ‘o Napule d’’a Ciampionsa e ‘mmece, che delusione!,  ce tuccaje ‘e vedé chillo d’’o campiunato cunfuso, apprussimativo, ‘mpriciso e ssenza ficre(idee) ca, pe gghionta ‘e ruotolo, êtt’’a fa ‘na mubbara (partita) difficultosa custretto – cumme fove – a mmatabbià (rincorrere) ‘o natiggio (risultato) d’’o russimmo (pareggio) datose ca ‘o Salisburgo s’era abbiato annante cu ‘nu ricore ca ‘o Ggialante rialaje a ll’austriache trasenno a ccapa ‘e saciccio ‘ncuollo a Hwang a ll’unnicesimo e ssulo ô quantaquattresimo cu ‘na rasulata ‘a fora ‘e Lozano riuscettemo a rrussimà (pareggiare); è overo ca po ce fove tutta ll’arrancua (ripresa) pe ttentà d’ affuzzà (vincere)…, ma chi t’’o ddà? Pure a ll’arrancua (ripresa) ‘o Napule fove troppo ‘mpriciso, sbagliaje troppe accasione e ss’êtt’’a stà attiento a nnun abbuscà pecché ‘o Salisburgo fove assaje periculuso asasa (soprattutto) cu ‘e tire ‘e squina (corner). Pirciò niente ‘a fa! Certo si se fósse affuzzato (vinto) ‘o Napule êsse angappata ll’artairra     (qualificazione) riadía (matematicamente) a ll’artamannaje (ottavi) ‘e Ciampionsa cu ddoje jurnate d’ancerca (anticipo), pe se cuncentrà ‘ncopp’ô campiunato, ma ce sbagliajemo ‘e cunte e vvedettemo ‘nu sibbacco (match) cu ddoje addaffe (reti), una pe bbanna, e ppo tante e ttante accasione  da ‘na bbanna e dda ll’auta  cu ‘nu  Salisburgo bbello, marrajo (pimpante),muscicco (brillante) e cu ‘o solitu  Napule marbacchejo (confusionario), ma pure  jellato:ajere aumentajemo ‘a ddosa d’’e pale cuovete ‘int’ a ‘sta (stagione)cu n’ati dduje:uno cu Peppe ‘a ‘nguenta e n’ato cu Lorenzigno.E nniente, nunn’’e ffanno benericere! Mo  ‘ncrassifica ‘e ll’javallo (girone) ‘o Liverpul(lo) ce à surpassato i ‘o Napule è ssulo siconno cu quatto punte cchiú ‘e ll’austriace e ttene a ddispusizzione ddoje mubbare (partite), si ne affuzzammo (vinciamo) una è ffatta. Certezze nun ce ne stanno e pputimmo sulo sperà. 

Passammo ê ppaggelle:

 MERET[‘O Lungagnone] 6 Nun lle faccio n’itimma (colpa) d’esserse menato n’ata vota dâ bbanna sbagliata facennose fottere cu ‘o ricore d’Haaland; p’’o riesto arresecaje ‘e piglià n’ata addaffa (rete)senza però essere custretto a ggranni tacculle (interventi).

DI LORENZO 6,5  Sicuro e mmuttano (propositivo) dimustraje granna perzunalità e nnun smarrunaje ‘na jucat

 MAKSIMOVIC [‘O ‘Ntontero] 6,5  Sulo ‘na vota se perdette a Hwang a mmancina e ffove custretto a ffà ‘nu carì (fallo); p’’o riesto fove priciso e ssicuro quase cumme a Cchitelassa. Manolas.

 KOULIBALY[‘O Ggialante] 5,5  Me dispiace, ma ll’attocca  miezu zifo (voto) mancante pecché nun è ancora isso i ‘o ddimustraje cu cchella fessaria a ll’unnicesimo trasenno malamente ‘ncuollo a Hwang e ffove ‘nu ricore sacrusanto ca  Haaland mettette a ffrutto  chesceffanno  (spiazzando) ‘o Lungagnone. Menu male ca po se ripigliaje.

Mario RUI 5  Ll’attocca  ‘NU zifo (voto) mancante pecché facette  Tanti, troppi arcatte (errori) ‘e mesura; ascette dopp’ô primmo ajone (tempo) pe ‘nu mpiccio adilaro (muscolare).  [dô 46'  LUPERTO 6 Jucaje ‘ncopp’â curzia addó nunn’è abbituato, ma facette ‘o duvere suojo senza smarrunà.]

 CALLEJON[Peppe ‘a ‘nguenta] 5,5  Me dispiace, ma ll’attocca  miezu zifo (voto) mancante pecché  pure avenno spazzio ne apprufittaje poco; addirittura qauann’avette ‘a palla ‘e ll’uno a uno, centraje ‘o palo. Peccato!

RUIZ[Anema Longa] 5,5  Pure a isso ll’attocca  miezu zifo (voto) mancante pecché me parette assaje’impacciato i a ccurto ‘e ficre (idee) e ppo ce mettette troppa frennesia  ca cumplicaje ‘a facenna.

 ZIELINSKI 5,5 Me dispiace, ma ll’aggi’’a dà  miezu zifo (voto) mancante pecché nun fove maje priciso latuzzianno (distribuendo) ‘o juoco e ‘ncopp’ô zzero a zzero se magnaje n’addaffa (rete) ca êsse pututo cagnà faccia ô sibbacco (match).

 INSIGNE [Lorenzigno] 6  Nce ‘o mecco pe nnunn’’o fà piglià collera, ma nun s’’o mmeretasse pecché si pe ‘na bbanna fove ‘na spina ‘int’ô scianco ‘e ll’austriace pe ll’auta nun riuscettemaje a ccentrà ‘o parlà‘nfaccia d’’a porta menanno ‘a palla fora o  luntano senza maje manco ‘mpignà ô purtiere.  

LOZANO 7 Ajere, finalmente, facette vedé ca nunn’ è ‘nu pacco addivintanno chianu chiano ‘o prutacunista d’’a scuatra ‘mpignannose cu ttanta taccheja  (energia) e ccegna (grinta) nsi’ a ttruvà ô quarantaquattresimo ‘a rasulata ‘e ll’uno a uno.Poco mancaje ca a ll’arrancua (nella ripresa) nun signasse ancòra! [da ll'86'  LLORENTE[‘O Spetaccuso] 4,5 – Mammuoccelo cumm’è dint’ê pochi minute ca stette ‘ncampo avette ddoje palle da mettere ‘mporta , ma  ‘e sciupaje  tutt’’e ddoje!]

MERTENS[Ciruzzo] 5,5  Me spiace, ma pure a isso ll’attocca  miezu zifo (voto) mancante pecché nun riuscette a ccercà o a  ttruvà bboni accasione da mettere a ffrutto e ccuntinuaje sulo a arapí ‘a strata pe Llorenzigno o p’ Anema Longa ca però nun ne cacciajeno niente. [dô 73'  MILIK[Sant’Arcadio] 5,5  Me chiagne ‘o core, ma pure a isso ll’attocca  miezu zifo (voto) mancante pecché abbandunato dê cumpagne facette  sulo chello ca fove pussibbile senza però maje essere periculuso.]

all.  ANCELOTTI[‘O Jancone] 5,5 Miezu zifo (voto) mancante pecché si è overo ca nun fove itimma   (colpa) soja  si ‘e suoje sciupajeno tanti ppalle e accasione centranno palo e afachía (traversa) ‘mmece ‘e signà, isso êsse avuto raffurzà ‘a linia ‘e mità ccampo cu ggente capace ‘e tirà ‘a fora e  dde dà ‘na mana â trasera (difesa) ‘ncopp’ê tire ‘e squina (corner); però, pure ‘ncampiunato ‘a musica è ssempe ‘a stessa: se sbaglia troppo e  ccu ‘e gruosse o ‘e piccerille isso s’ êsse ‘mmentarese coccosa pe mmettere a ffrutto ‘e ttanti accasione avute.

arb: S. MARCINIAK 6 Finalmente n’ucummo (arbitro) decente! Vedette quase tutto  e siscaje a mmestiere quase tutto, ricore cumpreso.

E ffermammoce cca. Pacienza si ajere ‘e cuane (azzurri) se facetteno stuppà da ‘e guagliune   austriace ‘ncopp’a ll’uno a uno. Nun ce penzammo cchiú e ricurdammoce ca sapato se torna a gghiucà p’’o campiunato cu ‘o Genoa ca a ttard’ora vene ô san Paolo e i’ spero, si ‘o Cielo ‘o vvo’, ca dummeneca ve pozzo cuntà ‘e n’arnassa (vittoria) cuana (azzurra). Staveti bbe’.

R.Bracale Brak