NAPOLI-SAMPDORIA 30.01.2011 – 4 A 0 LL’AGGIU VISTA ACCUSSÍ

NAPOLI-SAMPDORIA 30.01.2011 – 4 A 0
LL’AGGIU VISTA ACCUSSÍ

Che bbella jurnata guagliú chella d’ajere:Milanno e Lazzio ll’autriere avevano chiammato,e ajere ‘o Napule rispunnette comme meglio nun se puteva alluccanno cu ‘nu quatto a zzero da alliccarse ‘e mustacce dimustranno a tutte quante ca ‘a squatra ce sta e nun le mettono paura ‘e troppi staglie (impegni). ‘A pòvera marcapitata Sampdoria d’ajere nun ce poteva fà assaje, ma p’ ‘a verità manco tentaje ‘e fà coccosa. Nfra ‘e duriani sí e nno se salvajeno appena appena Mannini e Palombo,ma niente a ccunfronto d’ ‘o trebbeto d'attacco napulitano ca fuje fantastico pe nun esaggerà! Cavani,cu n’ati ttre purpette doppo chelle servute â juventussa se jette a piazzà ‘ncimma â classifica d’ ‘e cannuniere d’ ‘o campiunato.E mmo nun mettimmo lemmete â Pruvverenza! Cu ‘stu Napule cca ‘ncantevulo,fascinuso,ca fuje salutato dâ 'sciarpata' ‘e ‘nu San Paolo cu ‘o core dint’ ô zzuccaro, cu ‘nu Napule accussí tutto è ppussibbile; ce putimmo aspettà qualunqua cosa! Passammo ê ppaggelle:
DE SANCTIS 6 - Maje seriamente chiammato ‘ncausa,firmaje ‘o cartellino ‘e presenza cu ‘na bbona parata ‘ncopp’ a ‘nu tiro ‘ncunsistente ‘e Macheda!

SANTACROCE 7 - Cuncentrato e priciso dinte a ll’anticipe, parette ‘o Santacroce d’ ‘e tiempe bbelle. Assemplare,cuncreto , cu ‘e contrasciocche cassaje dô campo a Maccarone, ‘o spauracchio, senza farcela vedé praticamente maje!

CANNAVARO 6+ - Dint’â festa ggenerale pure culo’echiummo facette avvedé ca se sta ‘mparanno a essere asciutto e assenziale, cose ca ati vvote ll’erano difettato; mettette ‘a musarola a Macheda e facette caputià (ripartire) ll’azzione senza perdere tiempo e facennose sèntere.
(dô 24° s.t. CRIBARI 6 Dètte ‘o cagno a culo’echiummo e s’ ‘a spicciaje a dduvere sotto a ll’uocchie ‘e Ruizzo ca steva ‘ntribbuna! )
CAMPAGNARO 7 - Contro a ll’ecchesa squatra soja nun êtt’ ‘a faticà esaggeratamente pe ffà bbella fijura. Se cuncedette cchiú ‘e ‘na smestuta d’ ‘e ssoje:’na roccia, sdradecaje ‘o pallone dê piede ‘e chiunque lle capitaje a ttiro e ripartette cu straurdinaria scetatezza (energia) e fforza.


ZUNIGA 6- – Smestaje (spinse) custantemente ‘ncopp’â curzia ‘e dritta, ma cu pocu zuco....

YEBDA 7 – ‘Stu marcantonio algerino nun perdette ‘nu pallone manco a pavarlo e se prupunette spisso annante p’accumpagnà ‘a manovra. Furnito ‘e granna acutezza tattica e de presenza ‘a cummannaje isso ‘mmiez’ ô campo.S’ à dda tené cchiù ‘ncusiderazzione: ‘o vulesse vedé ‘ncocchia cu Pazienza ô posto ‘e Gargano.
GARGANO 5,5 ‘O solito casinista ‘e sempe, sbagliaje ‘nu tummolo ‘e passagge e cchiú ‘e ‘nu stoppo... Corre, corre e ccorre, ma aíza póvera!
DOSSENA 5,5 – Quaccosa facette, ma poco; stammo ancóra aspettanno ‘o vero Dossena. Sempe ca esiste!
HAMSIK 7,5 - Aiutato dê (dalle) praterie scunfinate ca lle s’arapevano annante purtaje a cciammiello (finalizzò alla perfezione) n’ assisto ‘e Lavezzi e ppo apparicchiaje a ppe isso ‘o terzo gollo ‘e Cavani. Unico, prezziuso(insostituibile) pe ‘sta squatra; cumminfatte se sente e ccomme ca ce manca coccosa quann’isso nun ce sta...). Facette tanta fatica senza palla danno qualità â manovra e realizzaje ‘nu granne gollo.
(dô 13° s.t. SOSA 6 – Saranno state ‘e spazzie larghe cuncesse dê duriane, ma ajere me parette assaje cchiú ’mpalla d’ ‘o ssolito. Se prupunette ‘nu paro ‘e vote a dduvere e, sentite, sentite, assummaje ‘nu pare ‘e cuntraste ‘mpurtante!)

LAVEZZI 8 – Accuminciaje a gghiucà doppo bbuoni vinte minute, e â fine però lle mancaje sulo ‘o gollo; ma ‘a cumbattività (generosità) e ‘a qualità ca ce mettette ajere fujeno straordinarie.’E cuntinue scatte suĵe e ‘e dribblinghe giurgiante (ubriacanti) mannajeno ô manicomio ‘e pòvere difenzure duriane e facettero addecrià ‘e tifuse napulitane; v miraculuso cu ‘a palla azzeccata ô pede, servette dduje assiste magnifiche doppo ddoje smestute (scorribande) ‘ncopp’â dritta ca ‘nzallanettero cumpletamente mandano al manicomio ô scajenzato (malcapitato) Zauri. Po continuaje a cercà ‘o gollo ‘nzistentemente macenanno chilometri e chilometri. E menu male ca teneva ‘o ppoco d'infruenza...A ‘nu certo punto (‘a chillu granne figlio ‘e ‘ndrocchia ca è) se jette a cercà ll’ammunizzione p’essere squalificato cu ‘o Chievo o cu ‘o Cesena e nno p’ ‘a partita cu ‘a Roma... E i’ crero ca ‘a penzata fuje ‘e Mazzarri!

CAVANI 9 - Nun ce stanno cchiú aggettivi pe cummentà a mmestiere ‘ e ffatiche (le prestazioni) ‘e ‘stu zengariello nuosto. ‘O primmo gollo fuje tutto d’ ‘o suĵo, risultato ‘e ‘nu muvimento ‘e centrattacco ‘e sfunnamento, â faccia ‘e chi nun penzava ca fosse ‘nu centrattacco overo! Me piacette ‘a fermezza dimustrata quanno afferraje ‘o pallone, senza darlo a Marekiaro, pe trasfurmà ‘o ricore ca isso stesso s’era procurato. E ppe ‘nchiudere mettette ‘a terza purpetta ‘mporta cuncludenno a mmestiere proprio n’azzione ‘e Marekiaro e se purtaje â casa n’atu pallone; si jammo ‘e chisti passe De La s’ à dda fà ‘nteresse ‘na cifra p’accattà pallune. Signaje tre golle, e che ato vulite ‘a n’attaccante? Ch’ ato lle se po’ dimannà? Eppure, se dannaje pure pe correre arreto a ll’avverzario e ppe gghí a difennere: attaccante muderno, quase ‘e scola ulandese,utile, energico e viguroso pe cquant’ è luongo e llargo ‘o campo!
(dô 18° s.t. LUCARELLI 6 – Me parette ‘nu poco ‘nchiattuto ma comunque se muvette abbastanza,pe ccuje s’ammereta ‘o seje ‘e ‘ncuraggiamento ca ll’aggiu miso. Sta tornanno e certamente se sta appruntanno pe ddà ‘na mana!

All. MAZZARRI 8 - Nun è ‘na scuperta d’ajere, ma ‘o livurnese è riuscito a custruí piezzo pe piezzo e cuoncio pe ccuoncio ‘na squatra quadrata ca però sta dint’ ô ssuĵo quanno tène spazzie larghe, squatra quadrata ca mo, comme à dimustrato ajere, à truvato ll’assennatezza (maturità) nicessaria p’ arrivà ê piane àvete.
arbitro ROCCHI 6 – ‘Sta vota niente ‘a dicere:’sta meza cazetta ati vvote mannato a spezzà ‘e passe napulitane (pure senza riuscirce), ajere facette tutt’ ‘o duvere suĵo.
Ajere ‘a jurnata nun puteva ferní meglio ca vedenno ‘a faccia ‘e cestunia ‘e Del Neri ca teneva ‘o veleno ‘mpont’ô musso doppo ca ll’Udinese êva dato dduje panesiglie â juventussa... E ffósse sempe accussí! Si ‘o Signore ce ‘o fa vedé ce sentimmo ggiovedí ca vène!
Bbona salute!
R.Bracale Brak