lunedì 23 maggio 2011

JUVENTUS – NAPOLI (22/05/11) 2 A 2 LL’AGGIU VISTA ACCUSSÍ

JUVENTUS – NAPOLI (22/05/11) 2 A 2
LL’AGGIU VISTA ACCUSSÍ


Guagliú fósse stato overamente primmuruso (magnifico) nchiudere chistu granne campiunato jenno a vvencere a Ttorino....e menanno ‘na vrancata ‘e turreno ‘ncopp’ô tavuto d’ ‘a zoccola janca e nnera. Ma ‘o Cielo, ‘o palazzo e Rizzoli nun ànnu vuluto e simmo state custrette a cuntentarce ‘e ‘nu pareggio... e i’ me songo ‘ncazzato assaje quanno Rizzoli à fatto vedé ca ‘o fatto nun era ‘o suĵo e ‘nchiudette uocchie e rrecchie e pe nun vedé s’avutaje ‘a chell’ata parte facenno signo ‘e continuà lassanno ca Boniperti (o n’ato ca mo nun me ricordo!)cauciasse a Gargano a centro campo, le levassee ‘o pallone e lanzasse a Matri ca ‘ncopp’ô filo d’ ‘o fora ‘e juoco, se facette a Ccribari e futtette a De Sanctis signanno ‘a saggèna d’ ‘o pareggio finale.

Dich’ i’: “E tu fusse n'arbitro?Ma te ne vaje o no?”
E fósse stato overamente primmuruso (magnifico) pe Lucarelli , cu ‘na cabbesera (un colpo di testa) spettaculare....rijalà ê tifuse ai tifosi ‘a vittoria a Torino... Nun è stato pussibbile. Pacienza! Passammo ê ppaggelle.

DE SANCTIS 6.5 ‘Ncopp’ô primmo gollo quacche respunzabbilità ‘a tenette, ma p’ ‘o riesto se dimustraje sempe all’altezza d’ ‘a situazzione.
ZUNIGA 6 Abbastanza bbona ‘a prova d’ ‘o laterale culumbiano. N’ata d’ ‘e scummesse vinciute ‘a Mazzarri
SANTACROCE 6 Aggriuso (agguerrito) dimustraje granna cegna (grinta) ‘ncampo, ê vvote pure troppa, ma riuscette a frenà a Del Piero che – pe parta soja – fuje ‘o solito malu carnetta ca va truvanno chi ‘accide!
ARONICA s.v. Catalca (passerella) finale p’uno d’ ‘e prutaguniste d’ ‘a granna tempurata (grande stagione) luvarda.
CRIBARI 6- All'inizio mettette ‘a musarola a Toni pigliannolo súbbeto bbuono ‘e mmesure; ‘a stessa cosa nun le riuscette cu Matri, ca (dinto a ll’azzione però ammagagnata, comme v’aggiu ditto, ‘a ‘na falta (da un fallo) ‘ncuollo a Garagno e ca Rizzoli, pe dà ‘na mana â juventussa, nun siscaje....) ‘o futtette e signaje ‘a saggèna (il gol) d’ ‘o pareggio. Peccato!
RUIZ 5.5 Ajere ssera ‘o difenzore spagnuolo fuje paricchio discuitato(distratto),arresecaje cchiú ‘e ‘na vota ‘e fà ‘o pasticciotto comme succedette quanno lisciaje ‘nu pallone facile e cuncedette ‘nu cornerro ‘a do’ ne nascette ‘a saggèna (il gol) d’ ‘o primmo pareggio juventino. Po se facette perdunà levanno ‘a copp’ô pere ‘e Boniperti, a ‘nu passo d’ ‘a linia ‘e porta, ‘na palla periculosa assaje.
GARGANO 5.5 Oramaje ‘a tiempo nun è cchiú chillo ca era l'anno passato a mmità campo. Faticaje nun poco quanno avette ‘mpustà ll’azzione.Me fósse piaciuto ‘e vedé Yebdà ch’êsse pututo cardà ‘o pilo, ‘mparannolo a ccampà ô nepote ‘e Marisa ca appena trrasuto ‘ncampo cauciaje pe ddereto a Majello e cuntinuaje a ffà falte ‘ncopp’ a ffalte ‘a chillu bribbone(mascalzone) frabbutto ca è senza ca Rizzoli ‘o dicesse niente, dimustranno chiaramente ca ‘a juventussa si nun so’ delinquente nun ‘e tessera!
MAIELLO 6,5 – ‘E cqualità ce stanno tutte e se vedettero; tanta sustanza ma pure tanta qualità pe ‘nu centrocampista ca ‘nfuturo s’ammereta d’essere sfruttato bbuono comme vice-Marekiaro.
MAGGIO 7.5 ‘Nu primma mmità ‘e partita mareata (stratosferica). Saggèna e velocità. ‘Na vera cuèta (un vero razzo) ‘ncopp’â curzia ‘e dritta.Dint’ô siconna parte cumm’era previsibbile (prevedibile),s’ammusciaje ‘nu poco.
HAMSIK 6 Pure isso facette ‘o ssuĵo dànno ‘na pulitelica (una preziosa) contribuzzione quanno trasette ‘ncampo. Mo, a pparere mio ll'operazzione cchiú pressante p’ ‘o Napule è cchella ‘e fà ‘e tutto pe trattenerlo sott’ô Vesuvio p’ ‘a tempurata ca vène (per la prossima stagione).
SOSA 6 ànno voglia ‘e dicere... pe mme ‘stu ggiuvinotto argentino sape ‘o fatto suĵo e tène ngigno (à talento), ma manca ancòra ‘e diatelía (di continuità). Soja ll’aiúda (suo l'assist) p’ ‘a saggèna ‘e Maggio.

MASCARA 5.5 Uno d’ ‘e poche d’ ‘e siconne e terze linie ca me piacette poco. Tanta corza ma sulo ‘nu tiro, ‘mprovviso,’a luntano ca spaventaje a Buffon ca però ce mettette ‘na pezza.

LAVEZZI 6 - Trasette e tentaje ‘e fà cagnà ‘a partita: assicuraje ê suoje tanta vivacezza (grande dinamismo), servenno n’aiùda pantèlesa (un assist perfetto) p’ ‘a capa ‘e Lucarelli. Ll'argentino cu ttutto ca pure ajere fuje uno d’ ‘e punte ‘e forza d’ ‘a squatra luvarda â fine d’ ‘a partita se magnaje ‘na saggèna ch’êsse pututo farce vencere ‘a partita...Pirciò nun se mmereta cchiú assaje.
LUCARELLI 7 Primma partita cu ‘a maglia ‘e titolare e primma saggèna d’ ‘a tempurata (della stagione). Oramaje è ppassato ‘e còveta, ma pe furtuna nun à perduto ancòra ‘o vizzio ‘e signà! Forze pure si cu ‘o contagocce po’ vení bbuono pure pe ll’anno ca vène.

MAZZARRI 7 À cuncluso ‘na tempurata cu ‘e sciocche mettenno ‘a cerasella ‘ncopp’â pizza doce cu ‘nu pareggio ca si nun è proprio ‘o mmassimo è ssempe meglio ‘e ‘nu caucio ‘nculo o ‘e ‘na carocchia. Cu ttutto ca ajere fuje custretto a servirse d’ ‘e siconne e terze linie se purtaje â casa coccosa!Mo s’à dda decidere a ffà ll’ommo e cchiarí ‘na vota e ppe ssempe chello ca vo’ fà!
L’arbitro RIZZOLI 4 e l’aggiu trattato bbuono! Vulette a fforza fà ‘o prutagunista cu cchella aria ‘e rre cummannascoppole!; comme ‘a vecchia abbitudine soja d’arbitro casalingo e ca s’ ‘a tira cu ‘e squatre nurdistiche, fuje apertamente ‘nsuggezzione murale rispetto â juventussa (bisugnosa ‘e nun piglià n’urdema paccariata…) E pirciò Rizzoli trasette ‘ncampo deciso a non vedé ’o modo ‘e fà pruvucatorio e viulento d’ ‘e delinquente janche e nnire e siscaje sistematicamente e pe partito pigliato contro ê napulitane, favurenno soprattutto a Del Piero ca sistematicamente, ‘a chillu granne figlio ‘e coperativa ch’è, faceva ‘e sceneggiate, se menava ‘nterra ô minimo cuntrasto o si appena appena uno lle diceva:”Che bbell’uocchie ca tiene!” Quanno po ‘a juventussa se truvaje ‘nsotto pe ddoje a uno isso ‘nchiudette uocchie e rrecchie e pe nun vedé s’avutaje ‘a chell’ata parte facenno signo ‘e continuà nun vedenno ca Boniperti (o n’ato ca mo nun me ricordo!)cauciaje a Gargano a centro campo, le levaje ‘o pallone e lanzaje a Matri ca ‘ncopp’ô filo d’ ‘o fora ‘e juoco, se facette a Ccribari e futtette a De Sanctis signanno ‘a saggèna d’ ‘o pareggio finale.
Comunque comme è gghiuta e ccomme è vvenuta ‘stu campionato è ffernuto e ‘o Napule s’è piazzato abbastanza bbuono ô terzo posto, pure si êsse pututo fà coccosa ‘e cchiú, si Mazzarri nun avesse fatto ‘o chiachiello... ; sperammo ca jesse meglio ll’anno ca vène quanno ce aspettano campiunato, coppa Italia e soprattutto Ciampionsa! E scusate si è ppoco. Cu ‘na bbona salute!
Raffaele Bracale Brak

Nessun commento: