RICATUNE CU ‘E VRUOCCOLE

RICATUNE CU ‘E VRUOCCOLE
chello ca serve pe sseje perzone
600 gramme ‘e ricatune,
600 gramme (piso lisso =peso netto) ‘e cemmetelle ‘e vruoccole ‘e fronne ammunnate e lavate,
‘nu bicchiere d’uoglio ‘auliva dunciglio,
dduje spicule d’aglio ammunnate e ntretate finu fino,
‘nu cucchiaro ‘e pignuole,
‘nu cucchiaro abbunnante d’uva passa ammullata,
,100 gramme ‘e sulumiglie d’alicesalate sott’uoglio,
‘nu cerasiello percante (piccante)lavato, asciuttato e grabbato (inciso) p’ ‘o lluongo,
100 gramme ‘e pecurino rattato finu fino.
50 gramme ‘e pane rattato,
100 gramme ‘e cosce ‘e quaglie (gherigli di noci) spezzettate.
sale duppio ‘na vrancata,
sale fino e ppepe janco macenato a ffrisco q.n.s., Comme se fa
Mettere a vollere ‘na caurara cu otto litre d’acqua salata e appena ll’acqua jesce a vollere, àrvere pronte pronte ‘e cemmetelle ‘e vruoccolo, scularle e tenerle a pparte astipanno ll’acqua ‘e cuttura; dinto a ‘na prupurziunata tiella a sponna auta ricà ll’uoglio, agnadirve ll’aglie ntretate, ‘nu puparunciello pirciante (piccante)lavato, asciuttato e grabbato (inciso) p’ ‘o lluongo, ‘e sulumiglie d’alicesalate sott’uoglio, e farle sciogliere a ffuoco allero; a chistu punto agnadí ‘e cemmetelle arvate e farle ‘nzapurí pe diece minute accuncianno ‘e sale fino e ppepe macenato a ffrisco.
Fraditanto fà vollere n’ata vota ll’acqua ‘e cuttura d’ ‘e cemmetelle e appena ll’acqua jesce a vollere, àrvere pronte pronte ‘e ricatune; scularle e revacarle dint’â tiella cu ‘e ccemmetelle e ‘a cunnimma. Tuïglià pe tre minute a ffuoco miccio;ammiscà ‘o ppane rattato cu ‘e ccosce ‘e quaglie spezzettate e agnadirle ‘ncopp’â pasta assieme ô ppecurino rattato; tuiglià pe n’ati ttre minute, ‘mpiattà e serví caude ‘e fuculare chisti ricatune sabruse!
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale











P