venerdì 18 maggio 2012

ALICE ARRECANATE

ALICE ARRECANATE chello ca serve pe 6 perzone ‘nu kilò e duiciento d’alice grosse fresche ‘e rezza, miezu bicchiere d’uoglio ‘auliva dunciglio, ‘na tazzulella d’acito janco, dduje spicule d’aglio ammunnate e ntretate finu fino, ‘nu cucchiaro d’arecheta spullecata, ‘nu tuppeto ‘e prutusino lavato, asciuttato e ntretato finu fino, sale duppio e ppepe janco macenato a ffrisco q.n.s. comme se fa: Lavà e pulezzà ll’alice levanno ‘a capa, ‘e mmennute e ‘a spina; arapí a llibbro ogneduna p’ ‘o lluongo, lavarle ancòra e asciuttarle; metterle dinto a ‘na cummedità ‘e purcellana cu ll’uoglio,ll’aglio ntretato,ll’acito, ll’arecheta sale e ppepe; cummiglià e lassà ‘scabbiscà (marinare) pe ‘nu paro d’ore. â fine revacà tutto dinto a ‘na prupurziunata turtiera e metterla dint’ô tiesto callentato a 200°. Lassà cocere pe ‘nu quarto d’ora e serví caude ‘e tiesto derrammate cu ‘o tuppeto ‘e prutusino lavato, asciuttato e ntretato finu fino. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cuzulàteve 'o vernecale! brak

Nessun commento: