venerdì 18 maggio 2012

VERMICIELLE D’ ‘O SCIUMMO SAFRUNATE.

VERMICIELLE D’ ‘O SCIUMMO SAFRUNATE. Chello ca ce vo’ pe sseje perzone: 600 gramme ‘e vermicielle, 600 gramme (piso lisso) ‘e puparuncielle ‘e sciummo ammunnate dô streppone, lavate e asciuttate, 100 gramme ‘e sulumiglie d’alicesalate sott’uoglio, 50 gramme ‘e pignuole arruscate ô tiesto 50 gramme ‘e passulille ammullate, dduje spicule d’aglio ammunnate e ntretate finu fino, ‘nu bicchiere e mmiezo d’ uoglio ‘aulive dunciglio, ddoje bustine ‘e safrone accumpliate cu miezu bicchiere d’acqua vullente, ‘nu tuppeto ‘e prutusino lavato, asciuttato e ntretato, sale fino e ppepe janco mmacenato a ffrisco q.c.n.v. sale duppio ‘na vrancata Comme se fa Dinto a ‘na prupurziunata tiella ricà ll’uoglio e ‘e duje spicule d’aglio ammunnate e ntretate finu fino e a ffuoco allero fà piglià culore a ll’aglio e appena è succieso agnadí ‘e sulumiglie d’alicesalate sott’uoglio e farle accumplià e súbbeto doppo agnadí ‘e pignuole arruscate e ‘e ppassulille ammullate; tené pe cinche minute a ffuoco allero e agnadí ‘e puparuncielle ‘e sciummo ammunnate dô streppone, lavate e asciuttate e farle cocere accuncianno ‘e sale e ppepee mantènere ncaudo. Fraditanto àrvere teniente teniente ‘e vermicielle dinto a ‘na caurara d’acqua vullente salata (vrancata ‘e sale duppio); scularle asciutte asciutte e revacarle dint’ â tiella cu ‘o zuco,agnadí ‘e ddoje bustine ‘e safrone accumpliate cu miezu bicchiere d’acqua vullente e tuiglià pe dduje minute a ffuoco allero,stutà ‘o ffuoco e derrammà cu ‘o tuppeto ‘e prutusino lavato, asciuttato e ntretato,ammiscà e ‘mpiattà servenno súbbeto ‘sti sfezziuse vermicielle d’ ‘o sciummo safrunate. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale . .

Nessun commento: