lunedì 25 giugno 2012

RICCE ‘E FURETANA SAFRUNATE CU ZAMPUGLIATA ‘E RICOTTA

RICCE ‘E FURETANA SAFRUNATE CU ZAMPUGLIATA ‘E RICOTTA Chello ca ce vo’ pe sseje perzone 600 gramme ‘e ricce ‘e furetana, ‘na cepolla ndurata ‘e Muntoro ammunnata e ntretata finu fino, dduje puparuncielle pircante (piccanti)lavate, asciuttate e grabbate (incisi) p’ ‘o lluongo, ‘nu bicchiere d’uoglio ‘auliva dunciglio, 100 gramme d’aulive janche desciussate, 300 gramme ‘e ricotta ‘e pecura dellajate cu ‘nu bicchiere ‘e latte retunno caudo, ddoje bustine ‘e safrone accumpliate cu miezu bicchiere d’acqua vullente, 100 gramme ‘e caso pecurino grattato finu fino, sale duppio ‘na vrancata, sale fino e ppepe janco mmacenato a ffrisco q.n.s. ‘nu tuppeto ‘e prutusino lavato, asciuttato e ntretato. comme se fa Ntretà ll’aulive janche desciussate e tenerle ‘e parte . Dinto a ‘na prupurziunata tiella ricà ll’uoglio cu ‘o ttrigliato ‘e cepolla e tenerlo a ffuoco miccio nfi’ a cche ‘a cepolla piglia culore; a ‘stu punto agnadí ‘e dduje puparuncielle pircante (piccanti)lavate, asciuttate e grabbate (incisi) p’ ‘o lluongo e fà cocere pe cinche minuti, avascianno ‘o ffuoco e ammiscanno spisso; agnadí ll’aulive ntretate e‘e ddoje bustine ‘e safrone accumpliate cu miezu bicchiere d’acqua vullente; fà ‘nzapurí ‘o zuco pe ddiece minute; agghiustà ‘e sale fino e ppepe janco mmacenato a ffrisco e mantené ‘ncaudo. Dellajà dinto a ‘na prupurziunata zuppiera ‘e 300 gramme ‘e ricotta ‘e pecura cu ‘nu bicchiere ‘e latte retunno caudo e tenerle a mmanese. Àrvere teniente teniente ‘e ricce ‘e furetana dinto a otto litre ‘e acqua vullente salata (vrancata ‘e sale duppio), scularle e revacarle dint’ â zuppiera cu ‘a ricotta dellajata, ammiscà dellicatamente e all’urdemo agnadí ‘o zuco mantenuto ncaudo. Ammiscà e derrammà cu ‘o ccaso pecurino grattato finu fino,cu ‘nu tuppeto ‘e prutusino lavato, asciuttato e ntretato e cu abbunnante pepe janco mmacenato a ffrisco . Ammiscà, ‘mpiattà e serví súbbeto ‘ntavula ‘sti sabruse ricce ‘e furetane safrunate. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale

Nessun commento: