SAN CRISTOFORO

SAN CRISTOFORO (cu ‘o munno ‘ncuollo) I. C’è poco ‘a fà, ormaje nun ce so’ ssante.../, te mine dint’ê vvrache ore e mmumente;/ nun tiene ggenio ‘e fà ‘o riesto ‘e niente/ e‘a peggia fessaria pe tte è ggravante!...// Pure ‘o mmenà sulo ‘nu père annante,/ o aizà ‘na seggia è ggruosso patimento:/ sî sfaticato ggià ‘a ‘int’â placenta/ e t’allamiente sempe a cquanto a cquanto// ca tutto t’ è de piso e cchist’ è ‘o punto/ ca sî fuceto ‘ncuorpo ‘nfino a ddinto/ e nun se nn’esce,o’ fra’! Sciazzo riunto// ‘a sciauratezza ormaje t’ à bbello e vvinto/ e ‘o ppuorte scritto chiaro chiaro ‘nfronte/ ca sî ‘nu stracquachiazze e ‘un metto jonta!// II./ Ma ‘a colpa nun è ‘a toja pecché ‘a guaglione/ mmece ‘e pigliarte a ccauce dint’’ ê rine/ ‘mmece ‘e te fà ‘na bbona vertulina/ pe ffà ascí ‘o serpe ‘a dint’ê manecone...// t’ànno civato a llatte e zzampaglione/ arracquànnote ‘e vizzie e llevantino/ tu nc’ hê azzuppate taralle e ccrissine/ e ll’hê pigliato overo pe ccanzone// a nun fà niente pe gghiurnate sane/ dànno a vvedé d’avere pe sfurtuna/ ‘o ‘mpiccio ‘e ‘na tiroida babbana// ca te ‘mpedisce e nnun ce po’ nisciuno/ pe te curà ‘stu male ca tu tiene/ ca leva ‘a forza e ‘o ggenio ‘a dint’ê vvene!// III.// Ma a mme nun puó cartiarme... nossignore!/ Fósse stato pe mme ‘na bbona cura/ i’ ll’avesse truvata sta’ sicuro/ e t’avesse grattato addó te prore/ e a bbotte ‘e panesiglie ‘int’a poch’ore/ te ll’êsse adderezzata ‘sta sturtura/ ca ‘a vista d’ ‘a fatica t’appaura/ comm’era da guaglione e ancòra ancòra...// Ancòra dura e nun te pare overo/ ‘e te scanzà qualunque sia cucchiara/ o cardarella e ffósse ‘a cchiú liggera// ca sî ‘nu sfaticato senza paro/ ggià cunusciuto a ll’uorto mio pe ppiro/ e a mme Titò tu nun me piglie ‘ngiro!// IV.// Chesta tiroida toja cóntala a n’ato/ Nun è ‘na ccosa seria e ss’è capíto/ ca chesta malatia ...a tte è servita/ pe te scanzarte no ‘e ‘na faticata,/ ma pure d’ ‘a cchiú ffessa vraccïata/ dànno a qualunque sfuorzo ‘o benzervito/ cu chesta scusa d’essere culpito/ da chesta malatia accussí ‘ngrata/ ca te custringe, pure ‘nterramoto,/ a stà fremmo a ‘nu pizzo ore e mminute/ senza spustà ‘na seggia e bbazzarioto/ tu faje ‘o strujachiazze buzzacchiuto/ custretto a starte eternamente cuieto/ addó arrevutasse arena e pprete!// V.// Buffone! Oj ni’ a mme nun me faje fesso:/ a tte te piace ll’arte ‘e Michelasso/ e vvaje strujenno ‘e vvie passo pe ppasso/ senza fà niente maje e tt’ è permessa// ‘sta vita cu cavallo e ccu calesse/ giacché t’è capitato ‘e magnà ‘e grasso/ e ‘ncuollo a cchi te sbroglia cchiú ‘e ‘na gassa/ tu t’ abbarruche; essa s’ammonna ’allesse// mentre tu vaje facenno spisso spisso/ ‘o don Nicola e te llu spuorpe ll’uosso/ e nun t’alluogge maje, maje ‘nu cerisso/ cu ‘a scusa ca tu saje, bruttu catriosso,/ ca te pigliasse a bbòtte ‘nfacci’ô musso/ e tte facesse ascí dô naso ‘o rrusso!/// Raffaele Bracale/Brak (dal vol. CU ‘E MMANE ‘NSACCA Ed. f. c. Napoli 2011 )