NAPOLI PARIS SAINT GERMAIN amichevole (11/8/14) 1-2 ‘A VEDETTE ACCUSS

NAPOLI PARIS SAINT GERMAIN amichevole (11/8/14) 1-2 ‘A VEDETTE ACCUSSÍ E accussí ajeressera ô san Paolo atu scicco fullè ammestuso (lussuoso match amichevole), ‘sta vota ‘nfra ‘o Napule e ‘o Paris Saint Germain , fullè ca però fenette cu ‘a primma scunfitta cuana d’’a tempurata (stagione) currente cunzentette a don Rafele ‘e fà ‘a prova ggenerale p’’o fullè d'annata d’’o prevío (del preliminare) ‘e Ciampionsa contro l'Atletico Bilbao, mannanno ‘ncampo ll’unnice titulare cchiú vvicino a cchillo ca marterí diciannove austo quase certamente don Rafele manna ‘ncampo si nun se tene conto ‘e Michu e Zapata ca contr’ô Bilbao o fenesceno ‘mpanca o ‘ntribbuna...Sinamparco (comunque) che piacere ajere vedé n’ata vota ‘nterr’ ô san Paolo a Llavezzi e a Ccavani e cche dispiacere vederle cu ‘na maglia ca nun fove chella luvarda! Ma ‘o dispiacere cchiú gruosso nun fove chillo ‘e sentí ‘e sische ca subbissajeno a cCavani, addó ‘o Pocio nn’ avette sulo applavuse..., ma fove chillo vedé ascí scunfitte ‘e guagliune cuane pure si sulo p’uno a ddoje e vederle perdere addó ‘na vota passate ‘nvantaggio, comm’era stato, si don Rafele nun êsse levato a cCulibalí, se fósse pututo vencere e cuntinuà ‘a striscia pusitiva ‘e ll’amichevole ‘nvista d’’o prevío (del preliminare) ‘e Ciampionsa contro l'Atletico Bilbao... Ma don Rafele nun se discute e ppure quanno stona ll’âmm’’a sbattere ‘e mmane! Passammo ê ppaggelle: RAFAEL: 6 Peccato pe cquacche ‘ndecisione ‘ncopp’ê ppalle aute e ‘ncopp’a cquacche cruzzo periculoso comme a cchillo ‘nnaccasione d’’o pareggio ‘e Ibra, ca libbero e ffranco recugliette ‘a palla sfresata (sfiorata) dô purtiere e ‘a mettette dinto; p’’o riesto urdinaria amministrazziona. (da ll’ 89° ANDUJAUR:6 Comme trasette fove chiammato a devià ‘na periculosa cabbesera (colpo di testa) ‘e Davíddo Luízzo, ma nun putette fà niente pe ffermà ‘a cunchiusiona ‘e Pastore. Salvaje ‘ncopp’ a lLucàs(se).) MAGGIO:5,5 Fove ll'esterno ch’êss’ avuto ’appressurà (spingere),ma nun ‘o facette troppo cuntentannese ‘e luttà contro a mMaxwell(o) e dde ffurní a mMarekiaro ‘na sapurita accasiona; troppo poco, pure si – tutto summato – costringette ll’avverzario diretto a rrummané vascio. (Dô 65°MESTO: 5 Ajeressera nun me piacette pecché nun se muvette ‘nsintunia cu ‘e cumpagne ‘e sezziona (reparto)e ffove respunzabbile ‘e troppe sfregazze (sbavature) e quacche peccatuccio ‘e presumenzia (presunzione).) KOULIBALY: 7 Che granna fessaria chella ‘e don Rafele ‘e nun farlo jucà ll’arrancua (ripresa); ‘stu guaglione oramaje è ‘na certezza: s’accucchiaje cu Albiollo e ppe ttutto ‘o primmo ajone nchiudette ògne chésema (varco) centrale mettenno ‘mmostra forza e granna tecnica. Nun sbagliaje niente e so’ cunvinto ca si don Rafele ll’êsse lassato ‘ncampo êsse miso ‘a musarola pure a cchillu zingaro d’Ibra...Aggio sulo paura ca si cuntinua accussí, chillo Dela s’’o venne súbbeto e sse mette n’ata cosa ‘e sorde dint’â sacca! (Dô 45° GHOULAM: 5.Pruvaje a appressurà (spingere) ‘ncopp’â curzia ‘e mancina, ma jette dint’ê chiavette dint’a ll’epata ‘e cupertura (andò in difficoltà in fase di copertura) lassanno libbero e ffranco a Ibra ca nn’ apprufittaje súbbeto!) ALBIOL: 6 Nfi’ a cquanno rummanette ‘ncampo, ‘a scuatra nun ghiette maje ‘nsufferenzia; isso urchestraje ‘a tràsera (difesa) cumannannola a bbacchetta e facenno arremarrà (ripartire) ll’azziona ascenno palla ô pere. (Dô 65° HENRIQUE: 6 Mancava ‘a tantu tiempo, ma trasette súbbeto dint’ô juoco salvanno ‘e suoje dô tre a uno,cu ttutto ca nun fove facile cu tutt’’a tràsera cagnata.) BRITOS: 5 Cose ‘e pazze: meglio comme terzino ca comme centrale. Nun sfiguraje quanno restaje 'bluccato' comme quarto a mmancina; asciuto Culibalí turnaje a ffà ‘o centrale e ffacette ‘na grezza senza fine ‘nnaccasione ‘e ll’uno a ddoje quanno Pastore s’’o facette comme a ‘nu pupazzo e ghiette a ssignà! JORGINHO: 6 Contr’ê mammune pariggine ca ‘a mettetteno súbbeto ‘ncopp’ô “chi songh’i’ e cchi sî tu”, ‘o guaglione fove cumbattivo, accarezzanno ‘o pallone e risulvenno cchiú ‘e ‘na bagarra (mischia) ‘mmediana; êsse avut’ urtizzà (verticalizzare) ‘e cchiú, ma se spaventaje tenenno ‘e faccia ttanti campiune; peccato! (Dô 65° DZEMAILI: 5.5 Se vedette poco o niente accuntentannese ‘e fà ‘na pagginetta ‘e mazzarelle... addó m’êsse aspettato ‘e vederlo cercà ‘a porta cu quacche ccagliosa d’’e ssoje.) GARGANO: 5.5 Nun se facette quase nutà pe ttutt’ ‘o fullè (match) dànno sulamente ‘na mano â besagra (cerniera) ‘e centrocampo.Me piacette ‘nu cuntrato tuosto, ma pulito ‘ncuollo a cCavani [ca pe pparta soja, comme aggiu ditto fove giustamente subbissato ‘e sische da ‘e cinquantamila, quanno facette ‘o nnacchennello pruvucanno a zZapata e ttante se ne zucaje ‘e sische e pernacchie ca nun tenette ‘o cuorio ‘e trasí ‘ncampo a ll’arrancua (ripresa)] . (Dô 45° INLER: 5 Serata no p’’o turco-napulitano ca pruvaje quacche cunchiusione ‘a luntano, ma quase tutte ‘a scurdarsene; dint’a ll’epata ‘e cupertura (in fase di copertura) s’addurmette cu ‘a zizza ‘mmocca e cquanno fove ‘o mumento, ‘mmece ‘e ‘ntervení restaje a gguardà ‘a luntano comme Pastore faceva ‘o fenomeno e lle dètte via libbera pe ll’uno a ddoje!) CALLEJON: 6.5 Tanta pressiona (pressing) e ttanta corza: cu tanti pallune ricuperate, avanzanno e ricuperanno comme quanno se chiammaje ll’applavuso d’’e cinquantamila riunquistanno ‘na palla doppo ‘na corza ca nun ferneva maje! (Dô 45° MERTENS: 6- Fove isso ca accumminciaje ll’azziona ‘e ll’uno a zzero e ppo cuntinuaje crianno quacche preoccupazziona ê pariggine però chianu chiano se ne scennette ‘e posa; po’ sulo migliurà!) HAMSIK: 6 Overamente bbuono ‘o primmo ajone d’’o capitano ca truvaje sempe ‘o spazzio ‘ncopp’â trecquarte, riuscenno a essere ‘mpurtante dint’ê ddoje epate (fasi) ‘e juoco e cunfermanno ca ‘e difficultà d’’a passata tempurata (stagione) songo superate; jette pure vicino a mmettere dinto ‘o pallone cu ‘na cunchiusione viulenta e ‘mpruvvisa, ma chello ca cuntaje fove ‘e vederlo n’ata vota antídruso (reattivo) e ppimpante. (dô 45°MICHU 6 Sicuramente, a ppietto ‘e ll’urdemi asciute, cchiú dint’ô vvivo d’’o juoco; sfresaje (sfiorò), cu ‘na cagliosa ‘e primma ‘ntenzione ‘a luntano, ‘na granna rredda e cupuliaje (dialogò) a mmestiere cu ‘e cumpagne, pure si è ancòra a ccurto ‘e priparazziona.) INSIGNE 6.5: Ô primmo ajone (Nel primo tempo) jucaje largo quase ‘ncopp’â linia d’’e centrocampistee ssulo ‘na vota lle riuscette ‘e zumpà cchiú ‘e n’avverzario e mmancaje quanno se trattaje ‘e cunchiudere.Meglio a ll’arrancua quanno jucaje cchiú vicino â cammma ‘e ricore (l'area di rigore) e criaje quacche ppericulo; da ‘nu tiro suĵo, respinto ‘a Duscez(zo) nascette ‘a rredda d’’o vantaggio cuano e ssempe Duscez(zo) cchiú ttarde, cu ‘nu miraculo nun le permettette ‘e signà. )Dô 79° RADOSEVIC: S.v. Jucaje troppo poco pe pigliarlo ‘ncunziderazziona.) Zapata: 5 Se facette rispettà fisicamente, cercanno ‘nu paro ‘e vote ‘e favurí ll’inzerimento ‘e Marekiaro, ma fove troppo braduso(lento) e spisso ‘mpriciso cu ‘e gghiucate soje; cercaje ‘na vota ‘a porta cu ‘na cabbesera (colpo di testa), ma truvaje ‘nu franciso appustiato ‘ncopp’â linia ‘e porta e ‘o matarazzo ‘e sbreglie rummanette cu ‘na vranca ‘e mosche ‘mmano! (Dô 45° HIGUAIN: 6.5 Si quaccheduno avesse tenuto quacche anfibulía (dubbio) si utilizzarlo o meno contro a ll’Atletico Bilbao, s’’a po’ llevà: ‘o Pipita sta ggià ‘ncundizziona, ajere se muvette a mmestiere e tentaje spisso ‘a jucata;’nnaccasione d’’o vantaggio cuano, apprimma lanzaje a Insigne e ppo sfruttanno ll’uosemo suĵo se facette truvà lla addó Duscez(zo) respingette ‘o pallone e, ffuttenno a Luízzo,dètte ‘o vantaggio ê cuane. Unu prano (errore) facette e ffove quanno sbaglianno ‘nu cagno ‘e juoco, a mmità ccampo, unoicaje (propiziò) ll’azziona vantaggiosa ‘e Pastore. BENITEZ:5,5 Miezu punto mancante a don Rafele p’avé levato a cCulibalí e avé miso a bBritosso a ffà ‘o centrale, cosa ca ce custaje ‘o fullè. P’’o riesto, allimmeno pe ttutto ‘o primmo ajone, se vedetteno spazzie stritte ‘nfra ‘a linia ‘e tràsera e cchella d’’o centrocampo; se vedette ‘na scuatra cumpatta e cquadrata ca assicuraje pressiona (pressing) ‘nnattacco; po facette troppi cagne ca scumbussulajeno e cumplicajeno ‘a facenna. Mo mancano sulo otte juorne p’’a sfita cu ‘o bBilbao. Speriamo bbene! E cu cchesto ve saluto e ve dongo appuntamento, si dDi’ vo’, â prossima vota ca avesse ‘a essere miercurí vinto ! R.Bracale Brak