lunedì 23 marzo 2015

NAPOLI - ATALANTA (22/03/15) 1 A 1 ‘A VEDETTE ACCUSSÍ

NAPOLI - ATALANTA (22/03/15) 1 A 1 ‘A VEDETTE ACCUSSÍ Mannaggia ê cane ‘e canciello, guagliú! Stongo avveluto. Scurdammoce trezziole, bbotte a mmure e ffuja-fuje; ‘o Napule nun sape vencere cchiú e ajeressera ô san Paolo addizziunaje n’atu pareggio scatobbio, ata acqua ca nun leva sete addó ‘o Ciuccio avesse avuto ‘a scennere ‘ncampo diciso a tturnà a vvencere ‘ncampiunato pe llevarese ‘a faccia ‘e pacchere pigliate dô Verona e ppe ‘ndammà (arginare) ‘a crise ‘e risultate [ddoje scunfitte e ‘nu gramo pareggio dinte a ll’urdeme tre antraffe (gare) ‘e campiunato]. Ma nun ce riuscette e ce jette ‘e lusso si riuscettemo a nnun perdere! È overe ca ajeressera Calvarese ce ajutaje pp’a scesa, ma ‘o ttroppo è ttroppo! Purtroppo ‘a rialtà nun è cchella ca dice don Rafele: nun è overo ca ‘o Napule nun abbandona nisciuna cumpetizziona! Pe mme ‘ncopp’ô campiunato don Rafele e ‘o Napule ce ànnu miso tantu ‘nu crucione! Nun se po’ spiecà diverzamente ca ce se fa fermà ‘ncasa ‘a n’atalanta cualuque ridotta ‘ndiece. E cche saciccio! Quanno vincimmo, quanno? Passammo ê ppaggelle: ANDUJAR 6 Gomezzo le facette ‘na grazzia, Piniglia ‘o futtette.P’ ‘o riesto ‘e ll’antraffa (partita) nun êtte ‘a fà quase niente ‘a fora ‘e farese male ‘na mana tuzzanno ‘nfacci’ô palo. MAGGIO 4,5 – ‘O pubblico ‘ncopp’ê bbemate (spalti) e cchille ‘ntribbuna divano lle chiammajeno ‘e muorte a ògne cruzzo (cross) sballato e a ògne ppalla perza... e nun avetteno tuorto; ll’atalossa ‘e ll’ècchese treno cuano [ca mo è ‘nu papunciello sfiatato] fove overamente scadente proprio comme a mMosca. HENRIQUE 5 Druigliaje (dormicchiò) bastantamente quanno ‘a palla arrivaje dê pparte soje; ‘o ffacette pure ‘nnaccasione d’’o vantaggio atalantiso, quanno nun se libberaje d’’a palla dànno aggio a pPiniglia primma d’’o secutà e ppo d’’o sbrunzulià vuttannolo ‘nterra, cosa ca Calvarese nun vulette vedé; tentaje ‘e farese perdunà jenno a ccunchiudere cu ‘na cabbesera (colpo di testa), ma Cigarini,comme ggià êva fatto ‘o Tanke nun se facette ‘e cacchie suoje e ssalvaje ‘ncopp’â linia ‘e porta. KOULIBALY 6,5 Tuosto e ccuraggiuso ‘o nnicessario jette a ttampunà pure addó nun lle fósse spettato; pruvaje a ffà ‘nu miraculo ‘ncopp’ô tiro ‘e Piniglia, ma arrivaje tarde sciulianno a vvacante. BRITOS 6 – Sfresaje (sfiorò) subbeto ‘o stuco (gol),ma, comme v’aggiu anticipato, ‘o Tanke nun se facette ‘e cacchie suoje e salvaje ‘ncopp’â linia. P’ ‘o riesto cumplessivamente facette chello ch’êv’ ‘a fà cu ttutto ca ‘e mestiere è ccentrale e nno terzino. LOPEZ 5,5 – Partecipaje ô ggiro ‘e palla cercanno ‘o spazzio, ma lle mancaje ‘a pricisione d’’o lanzo fatto sempe a bbienetenne. (dô 79° ZAPATA 7 – Salvaje ‘o Napule cu ‘na bbella cabbesera (colpo di testa),mettenno dinto ‘a palla ‘e ll’uno a uno. Ah! Fósse trasuto primma! ) INLER 6,5 Tutto summato, padrone d’’o centrocampo cuano; pure si cu troppa surnía (lentezza) mettette ordine e nun sbagliaje ‘nu pasiglio (passaggio), cercanno pure ‘a porta ‘a luntano, ma senza furtuna. CALLEJON 5,5 Pe mmoverse se muvette, ma cu ppocu zuco e nun lle riuscette maje ‘e mettere paura a Sportiello. (dô 66° MERTENS 5 Nun lle riuscette ‘e fà cagnà faccia a ll’antraffa (partita)cosa ca fósse stata nicessaria e ca don Rafele i ‘e tifuse se fósseno aspettate, anze stranamente fove poco priciso sbaglianno cuntrolle e ppasiglie [passaggi]). GABBIADINI 6 – Pe cquase n’ora tentaje ‘e scappà ê spalle d’’e centrocampisti avverzarie,tiranno ‘mporta, ma senza truvà ‘o stuco (gol) Po calaje nfi’ a cche fove sustituito. (dô 70° HAMSIK 6,5 - Ancòra ‘na vota trasette dâ panca e sse facette apprezzà cunfezzionanno ll’ajuda (assist) pe zZapatone e cercanno, senza sciorta, ‘o stuco(gol) d’’o doje a uno.) DE GUZMAN 5 Sant’Antonio s’annammuraje d’’o puorco, don Rafele ‘e ‘st’ ulandese ca pure ajere mancaje ‘e precisione e vvisione ‘e juoco, aizanno porvere pe bbona parte ‘e ll’antraffa (partita). A ll’arrancua (ripresa) apprufittanno ‘e stà unnece contro a ddiece, lle capitaje ll’accasione ‘e cercà ‘a porta ‘a fora, ma cugliette ‘o palo. HIGUAIN 6 Ê vvote esaggeraje a vvulé fà tutto isso, ma fove sempe ‘o periculo nummero uno:jette a ppigliarese ‘o pallone, ‘o difennette e ttiraje, ma pe ddoje vote Sportiello lle dicette ‘e no, nijannòle ‘o vantaggio. Che peccato! A nNapule tutte ‘e purtiere cacciano ‘a scienza! All. Rafa BENITEZ 4,5 – ‘A fissazzione è ppeggio d’’a malatia. Sbagliaje furmazziona ‘nfessennose cu De Guzmànno, cu mMaggio e cCagliecònno...; nun sfruttaje ‘o vantaggio ‘e puté jucà pe cchiú ‘e mez’ora cu ll’ommo ‘e cchiú; pe ffurtuna ca ‘ncarraje a ffà trasí a zZapatone ca lle levaje ‘e vverole dô ffuoco pariggianno n’antraffa (partita) cumprumessa, ma ll’uno a uno finale è troppo poco pe ‘nu Napule oramaje sciuliato ô quinto posto ‘ncrassifica a ccinche punte dâ terza. arbitro CALVARESE 3 E ll’aggiu trattato!Ce scuntentaje malamente dimustrannose scadente e ppoco priparato...Ausaje dduje pise e ddoje mesure e cchelle p’’o Napule foveno sempe scarze.Pe nun ddicere d’’e tanti cartelline jalizze (gialli) sventulate ad capocchiam sott’ô naso d’’e cuane E nun me facite trasí dint’ê particulare si no aggi’’alliscià quacche ttre contro a ‘stu teramano e ccontro a cchelli scuatre (juve, roma e llazzio) ca nun vonno ‘a moviola ‘ncampo, ca si ce fósse stata, forze ajere ‘o Napule nun êsse pavato ‘e pperecotte: ‘o Pipita êsse avuto ‘nu ricore a ffavore, ‘o stuco (gol) ‘e Piniglia fósse stato annullato eccetera eccetera! E ccu cchesto ve saluto e ce sentimmo, si dDi’ vo’,mo nun saccio quanno; spero sulo ‘e cuntarve ca finalmente ‘o Napule fósse turnato a vvencere, macare largo e ssenza sprecà.Staveti bbe’. R.Bracale Brak

Nessun commento: