giovedì 7 gennaio 2016

NAPOLI – TORINO (6.01.16) 2 a 1 ‘A VEDETTE ACCUSSÍ

NAPOLI – TORINO (6.01.16) 2 a 1 ‘A VEDETTE ACCUSSÍ Eccuce cca guagliù, ‘ngrazzianno ô Cielo ce simmo viste n’ata vota e ve pozzo raccuntà chello ca succedette ajeressera ô san Paolo addȯ guagliú arrivaje ‘a primma nichemata (vittoria)cuana ‘e ll’anno â faccia ‘e tutte ‘e cestarielle e d’’e tirapiere ca speravano ca ‘o Napule nun riuscesse a ttené ‘o passo ‘e Fiorentina, interre e juve . Ma s’êtteno ‘a fa cchiú ddinto ‘e dint’ô prozo, pecché ‘o Napule ce riuscette cu ttutto ca chella mmunnezza ‘e ll’arbitro Di Bello¬[2](ca ‘e bbello nun tene niente)cercaje ‘e lle mettere prete ‘e ponte!E fósse pure ora ca finalmente Aurelione se decidesse a pprutestà dint’ô Palazzo, pecché ‘o Napule à dda essere rispettato, ll’arbitre nun ll’ànn’’a rompere ‘o saciccio pe ppartito pigliato i’e jucature cuane ànn’’a essere prutette, pecché accussí nun po’ gghí cchiú annanze!Cca nun se po’ gghiucà ogne mmubbara (partita) nun sulo contro a ll’avverzarie, ma pure contro a ll’arbitre i ‘e cchenche lloro! Ma chisto è n’atu trascurzo. Chello ca conta è ca s’ êv’’a vencere e sse vincette, pure si ‘o risultato fove busciado e ce stette stritto! Passammo ê ppaggelle: REINA 6,5: ‘Nu tadullo (intervento)sulo,ma dicisivo,’ncopp’a ‘na cabbesera (colpo di testa) ‘e Mmerdarella. Poco mancaje ca nun fermasse pure ‘o ricore ca chella mmunnezza ‘e Di Bello rijalaje ô Turino. HYSAJ 7: Che granna mmubbara (partita) d’’o giovane terzino, dànno prova ‘e maturità ‘ncopp’â fascia addȯ appressurje (spinse) assaje ‘nfase uffenziva e ffove acàbbato (perfetto) ‘nchiusura. ALBIOL 6,5: Atalossa (prestazione) senza sfregazze (sbavature); nchiudette a dduvere tutto chello ca passaje dê pparte soje. KOULIBALY 6: ‘A solita roccia difenziva; jucaje ‘na mmubbara (partita) ca pe quase sittanta minute fove acàbbata (perfetta); po ô finale â ‘ntrasatta se scurdaje ‘a palla, arresecanno ‘e rijalà ‘o stuco (gol) a mMaxi Lopezzo, ma pe ffurtuna nosta ‘o turinese sciupaje ll’accasione i ‘o pareggio nun arrivaje! GHOULAM 5: ‘a nota stunata d’’o Napule; praticamente nun appressuraje maje ‘ncopp’â fascia soja e stette sempe ‘nsufferenzia cu cchillu figlio ‘e coperativa ‘e Bruno Peresso.Ė overo ca chella granna fetenzia ‘e Di Bello e d’’a chenca soja ‘mmece ‘e nutizziarlo (ammonirlo)a Bbruno Peresso quanno pe simulazziona se tuffaje ‘ncamma ‘e ricore, abbuccaje comme a ppesce ‘e cannuccia e lle dètte ‘nu ricore can un ce steva…,è overo, ma Ghoulammo êsse pure pututo sparagnarsela chella sciuliata sciaurata ca cunzentette a pPeresso ‘e fà ‘a sceneggiata soja!... LOPEZ 5,5: Sciveto ‘nu poco a surpresa ô posto d’ Allanno, nun riuscette a s’ attebbí (esprimersi) comme êss’avuto ‘a fà. Faticaje soprattutto a ll’epipeto (livello) fisico, e mme parette ca fòsse meno priparato ‘e ll’ ate.Fúbbero (timido) ‘mmiezo ô campo,facette troppi prane (errori) perdenno troppi pallune. (Dô 72' ALLAN 6: Sarri, troppo tarde vedette a Lopezzo a ccurto d'ussiggeno e sse decidette a mmettere dinto forze fresche ca cunzentetteno ô Napule ‘e chiudere ‘a mmubbara (partita)’nzaveramiento, senza subbí ‘o pareggio!). HAMSIK 7: Finalmente ‘o Capitano!Antraffa (partita) ‘e sustanza,soprattutto comme carà (collante) ‘nfra ‘o centrocampo e ll'attacco. Se truvaje troppo bbello cu Insigne e ‘o Pipita,ma soprattutto mettette dinto ‘o stuco (gol) ca rijalaje ô Napule ‘na nichemata (vittoria) funnamentale. (Da ll'88 CHALOBAH 6 ‘e stima). VALDIFIORI 6,5: Scennette ‘ncampo sotto usservazziona e superaje ll'esame senza prubbleme. Aiutato assaje dê cuntinue muvimente d’’e cumpagne, urtizzaje (verticalizzò) a dduvere, dimustrannose bbuonu direttore d'urchesta. CALLEJON 7: Pedina funnamentale d’’o Napule,pure ajeressera fove assolutamente dicisivo; jucatore ‘e granna ‘nteliggenza tattica, forze êsse ‘a vedé cchiú assaje ‘a porta, ma quanto e cquanto è utile ‘o spagnuolo ô juoco d’’a scuatra! HIGUAIN 7: Nun signaje,ma cumbattette comme a ‘nu lione braccato, abbracciato e cuntinuamente mazziato dê difenzure turinese, senza ca chella mmunnezza ‘e ll’arbitro Di Bello facesse ‘na chieja. Pozzo dicere ca sinamparco (comunque) ll’atalossa (prestazione) ‘e ll'argentino comme custante spina dint’ ô scianco d’’a trasera (difesa) avverzaria fove cratista (ottima)! INSIGNE 7,5: Stuco (gol),ajuda (assist) e granni ghiucate da campione; ‘nzomma ajeressera pe Llorenzigno se trattaje ‘e ‘na mmubbara partita fenomenale allimmeno pe ttutto ‘o primmo ajone (primo tempo) quanno isso e ll’attacco cuano funzionajeno a mmaraviglia; peccato ca a ll’arrancua (ripresa) calajeno, comme a ttutto ‘o riesto d’’a scuatra. (Dô 67' MERTENS 6: Trasette quanno ‘o Napule calaje e faticaje a rennerse periculoso. Ll'accasione bbona ll’avette cu ‘nu bbellu diacunale ca facette ‘a bbarba ô palo luntano!). All. SARRI 6,5: Teneva paura d’’o ritorno ‘ncampo doppo cchiú ‘e quinnece juorne cu ‘e ffeste e ‘o ppappatorio p’’o miezo, ma ô prazzo (alla fine) avette bboni risposte dâ scuatra ca ghiucaje ‘na primma mez’ora overamente zicatta (superlativa); peccato ca nun chiudette ampressa ‘a mmubbara definitivamente, pure pe sfarma (colpa) ‘e ll’arbitro e ccalaje a ll’antraffa (nella ripresa).Sinamparco (comunque) la classifica, pure cu ‘o ritorno periculuso d’’a juve ce fa ‘o pizzo a rrisa e vva bbuono accussí; mo s’à dda sulo cuntinuà apprufittanno pure d’’e stuche (reti) d’’e cumpagne d’’o Pipita ca pure quanno nun segna rummane fonnamentale p’’o juoco uffenzivo! ‘E chella mmunnezza ‘e DI BELLO e d’’a chenca soja[2] v’aggiu ggià ditto. E ffermammoce cca,cuntente p’’o mumento ca ‘o Napule sta ê piane aute d’’a crassifica cunfermannoce cu ‘sta Pifania (e i’ nun me mecco paura ‘e ddicere) ca ,corne facenno, pure st’anno ce putessemo fa ‘o suonno d’’o scutetto. Sempe si ll’arbitre e ttanti cestarielle ce lassano ‘mpace. Accussí sperammo e ssi dDi’ vo’ ce sentimmo llunnerì ca vene doppo d’’a trasferta a Frusinone. Staveti bbe’. R.Bracale Brak

Nessun commento: