sabato 7 aprile 2018

OVA Â MUNACHINA


OVA Â MUNACHINA
Chello ca serve pe sseje perzone
otto  ova toste(sode),
treciento gramme  ‘e  ricotta rumana,
cinquanta  gramme ‘e furmaggio pecurino rattato,
noce muscata quanto ne piace,
abbunnante uoglio pe frijere,
ddoje ova  sbattute cu ‘nu pizzeco ‘e sale,
farina janca quanto ne serve,
pane rattato quanto ne serve,
sale fino e ppepe janco quanto ne serve.
Prucedimento
Ammunnà ll’ova tosta, sciacquarle ee tagliarle a mmità p ‘ ‘a lunghezza; dividere ‘e russe dê janche da tené a pparte.  stemperà ‘e russe  cu  ‘na furchetta e mpastarle cu ‘a ricotta, ‘o ppecurino rattato, ‘o ssale, ‘o ppepe e ttanta noce muscata quanto ne piace  .Sistimà  cu ‘nu cucchiarino ‘a café ‘o  cumposto dint’ê janche cercanno ‘e dà   a ll'impasto ‘na forma bumbata; ‘nfarenà chesti mmeze  ova, ‘nfonnerle dinto a ll’ova sbattute, passarle delicatamente dint’ô ppane rattato facenno attenzione a  mantenerne ‘a forma; frijerne poche pe vvota dinto a pparicchio uoglio pe ffrjere vullente e prufunno finché  nun addeventano  ndurate. Appujarle ‘ncopp’ a ‘na carta asciugante  e servirle caude comme antipasto ‘nzieme a furmagge piccante e fellate assurtite.
Brak

Nessun commento: