BORUSSIA DORTMUND- NAPOLI (amich. 7/08/18) 1 A 3 ‘A VEDETTE ACCUSSÍ

BORUSSIA DORTMUND- NAPOLI (amich. 7/08/18) 1 A 3

‘A VEDETTE ACCUSSÍ

Ajeressera,  a ssan Gallo [Sguizzera] , contr’ô bBorussia Dortmund(e)  siconna ammestosa (amichevole) ‘nternazziunale d’’o Napule d’’o Jancone ca, a ppietto d’’a scutuliata cu ‘e ‘ngrese d’’o Liverpooll(e), ammiscaje cumpletamente ‘a scuatra d’’o primmo ajone (tempo) mannanno ‘ncampo  ‘o Vampiro, Maksimoviccio, Mario Rui, Diawara, ‘a bBelva, Ounas(se) e vVerdi e sse chiammaje ‘mpaca ô Masto,ô gGialante,a  lLuperto,a mMarekiaro, a ll’Anema longa, a pPeppe ‘a ‘nguenta i a lLorenzigno; uno tra ‘e poche cunfermate fove  sant’Arcadio ca ggià ô 7’ purtaje ‘nvantaggio ê suoje, jennose a ppiglià palla ‘ncopp’â trecquarte e doppo dduje, tre mmetre ‘a mettette ‘mporta cu ‘nu priciso càtaro(diagonale) fa fora muntaca (area di rigore), facenno alliccà ‘e mustacce a dDela ca ggià penzaje ‘e s’’o vennere!

Se vedette súbbeto    ca nun tutt’’e mise so’ ‘e trentuno e ca contr’ê terische ‘o Napule nun era ‘ntenziunato a ffà ‘a scuatra-matarazzo e anze era diciso, truvannose a ssan Gallo a ffarele isso ‘o mmerletto e ccumminfatte doppo d’avé ô 12’ cuncesso a dDahud(de) ‘e sfresà ‘o russimmo (pareggio)schiggianno ll’afachía (traversa) cu ‘nu tiro dô lemmeto, arrivate ô 28’ ‘oNapule mutajffaje (raddoppiò) cu   mMaksimoviccio,ca mettette ‘mporta cu ‘nu priciso tacatarrassa (colpo di testa)sfruttanno a mmestiere ‘nu tiro ‘e squina (corner) ‘e Verdi. Arrivate a ll’arrancua (ripresa) ô Jancone lle prurette ‘o mazzo e sse mettette a a ffà cagne ‘e jucature a vvienetenne addirittura custringenno ô Vampiro a ffà ‘o terzino ‘e dritta ô posto ‘e Meza Cucchiara, asciuto nun se capette pecché , mentre a ll’ata bbanna Luperto, atu centrale,fove custretto a ffà ‘a parte ‘e terzino mancino ô  posto ‘e  Mario Rui e gghiette a ffení ca ô  64’ ‘o Borussia Dortmund(e) accurciaje ll’armafaje  (le distanze) cu Philipp(e) ca sfruttaje ‘nu tozzi-tozze d’’o pallone ‘nfacci’ô pere ‘e Luperto, mannaggia ê cane ‘e cancielle! A ll'88'  ‘e terische avetteno accasione ‘e russimà (pareggiare), ma pe ffurtuna nosta ‘o Creco dicette ‘e no  a pPulisiccio salvanno ‘o nattija (risultato).Ô 90' ll’arbitro sguizzero Hanní [5] ‘mmece ‘e siscà ‘o mustalà (fine), assignaje duje minute ‘e ricupero, ca nun ce steva e gghiusto ô 91’ Peppe ‘a ‘nguenta nchiudette definitivamente ‘a facenna cu ‘nu bbellu tiro a ggiro sfruttanno ‘na bbona palla da mancina ‘e ll’Anema longa. ‘Nzomma ‘o Napule cancellaje ‘a mazziata pigliata  dô Liverpool(le) vattenno ‘o Borussia Dortmund(e) pe ttre  a uno e ffurnenno, tutto summato ‘na bbona atalossa (prova) currenno quanno attaccaje e ttenenno ll’uocchie apierte quanno se difennette e ddurante ô primmo ajone (tempo) ‘o bBorussia Dortmund(e)  nun riuscette a ttruvà spazzio pe bbia d’’o culaturo mumazzo ( filtro ottimo ) ‘e Diawarà e dd’’a bBelva .A mme me piacette cchiú ‘o Napule d’’o primmo ajone (tempo), ma pure chillo ‘e ll’arrancua (ripresa)  coccosa ‘e bbuono facette vedé e cumplessivamente ‘o Jancone fove suddisfatto d’’o juoco d’’e cuane (azzurri).

Passammo ê ppaggelle:

KARNEZIS [‘O Creco] 6 -  Fósse stato difficile fà ‘e stessi fessarie fatte cu ‘o Liverpooll(e) e mmune male ca nun succedette e ttutto summato  riuscette a ffà scurdà ‘a serata marrò cu ‘e ‘ngrese.

HYSAJ [Meza Cucchiara] 6  Jucaje cu ‘o curtiello ‘mmiez’ê diente e sse vedette! [dô 64' ALBIOL[‘O Masto] 6,5 ‘Nu muro taminno (prezioso)].

MAKSIMOVIC 6,5  Miezo zifo (voto) ‘e cchiú, ma sulo pe ll’addaffa (rete) signata pecché arreto fove respunzabbile ‘e quacche sfregazzo(sbavatura) quanno surtette ascenno.

 [dô 64' KOULIBALY [‘O gGialante] 6  Pulisiccio fove ‘nu brutt’ accunto, ma ‘o nuosto lle mettette ‘a musarola e ssulo ‘na vota lle cunzentette ‘e rompere ‘o saciccio ô Creco.]

CHIRICHES [‘O Vampiro] 6,5  cumplessivamente ‘o meglio d’’a sezziona arretrata pure quanno êtt’’a fà ‘o terzino. [da ll'82' FABIAN RUIZ [Anema longa] 6 ‘e stima].

MARIO RUI 6,5   Ce mettette cegna (grinta) e attenziona i accumpagnaje cu cqualità a Ounas(se).[dô 64 LUPERTO 6 Jellato ‘int’ô tozzi-tozzo d’’a palla ca cunzentette  a Philipp(e) ‘e fottere ‘o Creco, ma p’’o riesto niente ‘a puterele dicere.]

ALLAN [‘O ‘Ncrifato] 6  Facette ‘o ssuĵo cu cqualità e cquantità; nun capette pecché ascette [dô 46' GRASSI 6 -  Atalossa (prova) pusitiva,cu cquacche ricupero ‘nteressante.]

DIAWARA 6 B Ausaje a mmestiere rica e cumpasso, ma se facette apprezzà pure ajutanno ‘e centrale cu ccegna (grinta) e asciarra (cattiveria) nicessarie.

[dô 64' HAMSIK[Marekiaro] 6+ Quacche ccagno ‘e juoco, triangulanno cu ll’arcagíe (esterni), difennette pur’isso ô niajo (al finale).] 

ROG[‘A bBelva] 6  Corza,cegna (grinta) e pressiona auta ricuperanno tanti pallune pure cu asciarra (cattiveria).Tutto summato granna sustanza.

OUNAS 6  Facette chello ca putette sia annante ca arreto partecipanno ô juoco.

[dô 64' INSIGNE[Lorenzigno] 6  Meglio ‘e ll’urdema vota cercanno ‘a porta da fora; però ancòra sbagliaje coccosa.]

MILIK[Sant’Arcadio] 7,5  ô ssolito lassato troppo sulo e mmaje cercato o servuto a dduvere, se jette a ccercà ‘a palla bbona i ‘a mettette dinto cu ‘nu mancino priciso, putente e ssistimato sbluccanno ‘o sibbacco(match) quase súbbeto.Se ‘mpignaje pure a ddifennere palla sulo ‘nfra ê centrale terische. [dô 64' INGLESE 6  Tuccaje pochi pallune trasuto quanno oramaje ‘o Napule nunn’attaccava cchiú difennenno cumpatto.]

VERDI 6  Bbona atalossa (prova) ‘e ll’ecchese murtadella [pure senza palla ‘ncampo apierto] ca pittaje ‘o tiro ‘e squina (corner) p’’o doje a zzero ‘eMaksimoviccio. [dô 64' CALLEJON[Peppe ‘a ‘nguenta] 6,5   Tanta corza pe pressà auto rallentanno ‘a manovra teresca; ‘e cchiú, ‘na pennellata ‘e mancino pe ddarece ‘o tre a uno ca nchiudette ‘a facenna.]

All. ANCELOTTI [‘O Jancone] 5,5 Miezo zifo (voto) mancante pecché  nun me piacette cumme ggestiunaje (gestí) ‘e cagne, chiammanno ‘mpanca  ggente ca steva jucanno bbuono, senza metter ô posto lloro ggente adatta, abbituata ‘mmece  a gghiucà a n’ atu pizzo  e custrignennole a ffà ‘nu juoco, pe lloro streuzo e ttutto chesto p’’a smania ‘e fà jucà a  ttutte quante! E cche ccacchio!

E ccu cchesto ve saluto e cce sentimmo, a dDi’ piacenno, p’’o sibbacco (match) ‘e sapato ca vene contr’ô Wolfsburg(o)  speranno ca pozzo cuntareve d’avé vinciuto n’ata vota! 

Staveti bbe’. R.Bracale Brak