domenica 26 agosto 2018

NAPOLI – MILAN (25.8.18) 3 a 2 ‘A VEDETTE ACCUSSÍ



NAPOLI – MILAN (25.8.18) 3 a 2
‘A VEDETTE ACCUSSÍ
Bbona jurnata guagliú! E ringrazziammo ô Cielo!Ajeressera ummaría musmí (debutto stagionale) d’’o Napule d’’o Jancone e nnichemata (vittoria) da zumpà dê ppultrone p’’o Napule ca vattette pe ttre a ddoje ‘e demmonie ‘e Gattuso asbedallannole (rimonantandoli) e sse mettette a sseje punte ‘ncrassifica ‘nzieme â vecchia zoccola.
Chille d’ajeressera foveno tre ppunte cauzante e assaje ‘mpurtante p’’e cuane [finalmente cu ‘a maglia luvarda(azzurra)!...] soprattutto pe comme arrivajeno e ppe ccumme s’erano mise ‘e ccose: cumminfatte ‘a serata parette ca nun prummetteva niente ‘e bbuono dàtose ca pe ddoje vote, cu bBonaventura ggià ô 15’e ppo cu cCalabria ô 49’, ‘e demmonie ‘e Gattuso ce facetteno fà ‘a trezza d’’e vierme cu ‘o san Paolo ca lle scennette ‘a lengua ‘ncanna e ppure ‘ntribbuna-divano parette ca da ‘nu mumento a ll’ato fósse succieso ‘o llutto...’mmece bbello e bbuono s’avutaje ‘o canisto e cce penzaje Zielinski a ssistemà ‘a facenna adderezzanno ‘a varca cu ‘na pareglia (doppietta) [ô 53’ i ô 67’]ca ce cunzentette d’appararce e ffurtunatamente finalmente ‘o Jancone se decidette a cchiammarese ‘mpaca a mMarekiaro ca pareva ll’aseno ‘mmiez’ê suone [5 e ppo ve dico]pe ffà trasí a cCiruzzo ciovè n’ata nassía (punta) p’accumpagnà a lLorenzigno,a ssant’Arcadio i a pPeppe ‘a ‘nguenta; nun se trattaje però ‘e disperazziona, ma nicessità ‘e cagnà ‘e ccarte ‘ntavula e ccumminfatte proto cu cchillu quatto- dduje – quatto ‘o Napule truvaje ‘o ggiavarro (bandolo) d’’a matassa e ttiraje ‘o capo ‘nterra! E ffove proprio Ciruzzo ca a ll’80’ mettette a ffrutto ‘na granna palla d’’o Ncrifato [‘o meglio d’’o mazzo e ppo ve dico] firmanno ‘o tre a ddoje cunchiusivo ca facette ‘mpazzí ‘e cuntentezza tutta Napule ca sulo mez’ora primma teneva ‘a faccia ‘e ll’Addulurata! Chest’è ‘o pallone guagliú! Passammo ê ppaggelle:
OSPINA[Pastacrisciuta] 4 I ‘o vuó mettere ‘e cchiú a uno ca nun fove maje chiammato ‘ncausa e ca 'e sule dduje tire arrivate ‘int’ô parlànfaccia d’’a porta soja e ffacette addeventà ddoje addaffe (reti) senza tentà ‘e fà coccosa?! Nun ce simmo, m’aspettavo ‘e meglio! Vulite vedé ca, tutto summato, è mmeglio ‘o Creco?E nun mme venite a ddicere ca ‘o tiro ‘e Bonaventura fove ‘mpruvviso e nnun se ll’aspettaje… pecché chillo ‘e Calabria fove appriparato e sturiato e isso manco facette ‘nu cacchio!
HYSAJ[Meza Cucchiara] 5,5 Miezu zifo (voto) mancante pe bbia ca facette quacche prano (errore) ‘e troppo ‘ncopp’â curzia soja, però nun tenette respunzabbilità ‘ncopp’a ll’addaffe (reti).
ALBIOL[‘O Masto ] 6 Forze êss’avut’’a tentà coccosa ‘nnaccasione d’’o stuco (gol) ‘e Bonaventura, ca però steva sulo; ‘ncumpenso facette ‘na granna cosa a ll’arrancua (ripresa) quanno fermaje a cchella lota d’’o cainno (traditore). Cosa ca conta forze cchiú ‘e n’addaffa (rete)!
KOULIBALY [‘O Gialante] 6 – Fove isso ca pruvaje a ttené auta ll’araclachía (morale) d’’e cumpagne pure quanno ‘e ccose nun gghietteno bbone i ‘o ffacette facennose vedé annante pure si cu ppocu zuco; p’’o riesto nun ce facette correre nisciunu periculo!
MARIO RUI 5,5 - Miezu zifo (voto) mancante pe bbia ca se purtaje ‘ncopp’â cuscienzia ‘o stuco (gol) ‘e Calabria, però se dètte da fà appressuranno (spingendo) assaje e sse fósse abbuscato pure ‘nu ricore a ffavore quanno Calabria lle se menaje ‘ncuollo cumme a ‘nu zimmaro carriannolo ‘nterra ‘int’â muntaca (area di rigore) rossa e nnera, sempe ca ‘o masto ‘e festa Valeri [4 e ppo ve dico] êsse vuluto vedé! [Dô 73’ LUPERTO 6 Trasuto ô posto d’’o purtuchese ammaccato da Calabria, êtt’’e ‘a fà ‘nu mestiere ca nunn’è ‘o suojo, ‘o terzino, e sse dimustraje a ll’ardezza.]
ALLAN [‘O ‘Ncrifato] 7,5 Nicessario cumm’ô ppane pe ttutt’’e nuvanta e cchiú mminute fove overamente ‘o cchiú pusitivo d’’o mazzo e cce mettette cegna (grinta) corza e artacca (energia) azzannanno ê feliette 'e ll’avverzarie e ffacenno arremarrà (ripartire) ‘a manovra; soja ‘a palla pe cCiruzzo ca ‘a facette addeventà chella d’’o tre a ddoje!
HAMSIK[Marekiaro] 5 Me dispiace, ma ‘o capitano ajere me parette ll’aseno ‘mmiez’ê suone: maje ‘na jucata ca appicciasse ‘a luce, maje ‘na mana â trasera o ‘nsertannose ‘nnante; ‘nzomma ggiraje a vvacante e ppe mme ‘o Jancone ‘o levaje troppo tarde! [Dô 63’ MERTENS[Ciruzzo] 7 Trasette súbbeto ‘int’ô juoco spaccanno ‘a trasera d’’e demmonie e ffove isso ca se truvaje ô posto justo, ô mumento justo pe ssignà ‘o stuco (gol) ca ce dette ‘e tre ppunte!]
ZIELINSKI 7,5 Forze se fósse mmeretato pure miezu zifo (voto) ‘e cchiú pe ccumme adderezzaje ‘a varca signanno ‘a pareglia (doppietta) ca v’aggiu ditto, però durante ô primmo ajone (tempo), forze pe nnun lassà sulo Marekiaro, facette quase niente sbaglianno assaje; però pe ffurtuna a ll’arrancua (ripresa) fove tutta n’ata museca e vve dico ca nun c’’e scurdammo cchiú chillu dritto e cchillu mancino ca nce ‘o mettetteno a ppitoffio a dDonnarumma. Pare ca ‘o guaglione sta pe ffirà ‘o rinnovo. ‘Assa fà ô Cielo! [Dô 72’ DIAWARA 6,5 - Bravo a ddiriggere ll’urchesta.]
CALLEJON [Peppe ‘a ‘nguenta] 6 Se dètte da fà appressurarro (spingendo) cu ccustanza e ccercanno ‘a parta.
MILIK[Sant’Arcadio] 6 – Lassato sulo lla ‘nnante durante ô primmo ajone sulo ‘na vota avette ‘na palla decente e riuscette a ‘mpignà a dDonnarumma.
INSIGNE 5,5 Miezu zifo (voto) mancante pe bbia ca ajere tenette ddoje facce: durante ô primmo ajone sbagliaje cchiú ‘e ‘na vota dô lato suĵo senza ‘mmentà niente; migliuraje ‘nu poco a ll’arrancua (ripresa) quanno finalmente se decidette a gghiucà, ma nun lassaje l’alamma (segno).
all. ANCELOTTI 6 Pecché se vincertte, ma ‘o Napule durante ô primmo ajone (tempo) nun piaceva giacché nun quagliava soprattutto pe bbia ca Marekiaro nunn’era isso i ‘a scuatra arrancava dimustranno quacche ddifficultà ‘e troppo.Pe ffurtuna ca po se decidette a ccagnà pusizzione a cquacche gghiucatore i a cchiammarese ‘mpanca ‘o capitano lassanno libbero a zZielinski. Scigliesse meglio ‘o purtiere!
arbitro VALERI 4 Arsciadiddo e arastedadío (severo e autoritario) cumme se fósse stato isso ‘o signore d’’o munno facette ‘o rre cummanna-scoppole siscanno a capa ‘e saciccio e vvulenno vedé sulo chello ca vuleva vedé facenno ‘ncacchià a ccane e ppuorce e soprattutto a mMario Rui accrastato, cumme v’aggiu ditto, da Calabria senza ca isso vedesse coccosa!
E ffermammoce cca! Ddoje nichemate (vittorie) ‘ncopp’a ddoje nunn’è ppoca cosa, ma ‘o juoco à dda migliurà, i ‘a trasera (difesa) à dda riggistrà coccosa, accumincianno dô guardaporta, pecché nun putimmo essere custrette a vvencere asbedallanno (rimontando) ògne vvota! Facitece stà cuiete e ssenza parpetazzione ‘e core. E si ‘o Cielo ‘o vvo’ ce sentimmo pe llunnerí tre settembre doppo d’’a nacchèlla (trasferta) a gGenova contr’â Sampedoria.
Staveti bbe’ R.Bracale Brak

Nessun commento: