NAPOLI - EMPOLI [C.I.13.01.21] 3 A 2 ‘A VEDETTE ACCUSSÍ

NAPOLI - EMPOLI [C.I.13.01.21] 3 A 2

‘A VEDETTE ACCUSSÍ

Che faticata guagliú! E cchi s’’o ffósse creruto  ca ‘e tuscane ‘e ll’Empoli pe se fà vattere c’êsseno dato tantu ffilo da torcere! Cumme si nun ce vulesse  credere a cchello ca succedette ajeressera ô Maradona… ma ce aggi’’a credere, ce aggi’’a credere ca ’o Ciuccio pe  ppassà ‘o turno êtt’’a sufferí contro a ‘na scuatra ‘e serie B, ma- a ccumme se vedette – pe ccumme joca putesse appaurà  diverze avverzarie pure ‘nserie A. Ajere ‘o Napule pe ddoje vote [18’ cu Ddi Lorenzo e 38’ cu Llozano]passaje ‘mmeizzo ( in vantaggio) e ppe ddoje vote [33’ e 68’ e ssempe cu Bbajrami] ll’Empoli  ll’angappaje e ssulo ô 76’ Petagnone mettette dinto ‘o tre a ddoje ca lle permettette d’affuzzà (vincere) passanno ‘o turno pure si ll’urdumu quarto d’ora ‘o Napule s’êtt’’a difennere strignenno ‘e diente. Sinamparco (comunque)tutto sommato fove na bella mubbara (partita)ô Maradona cu ‘nu  Lozano prutacunista: stuco (gol) e mmissiddo  (assist) p’’o  messicano ca facette vení ‘o male ‘e capa mo a  Zzappella e mmo a Tterzic(cio). Petagna ce levaje ‘e ccastagne dô ffuoco, ma Gattuso nun po’ essere suddisfatto ‘e ‘stu tre a ddoje e asasa (soprattutto) pe chist’atu passo arreto. E cchest’è!

Passammo ê ppaggelle:

 MERET[‘O Lungagnone] 4,5  Nun  piacette.Nun dètte nisciuna  ammanna  (sicurezza) ê suoje, dduje tire arrivajeno ‘mporta e ffoveno ddoje addaffe (reti) mentr’isso partenno sempe tarde ‘ncopp’ê ddojev cunchiusione  ‘e Bbajrami e mmenannose sulo quanno ‘o pallone era trasuto, o addirittura restanno fremmo a gguardà cumm’’o pallone traseva ‘mporta ce facette scennere ‘o core dint’ê ccazette!  

DI LORENZO 6,5  Nun sulo ‘ncopp’â ferza ‘e dritta sagliette e scennette macenanno chilometre, quanno po signaje ‘nu granne stuco (gol) cumme ‘nu vero marcazzo (centrattacco).

 

RRAHMANI 5  ‘Sta vota fessarie nun ne facette, ma quanno tuccaje palla ‘int’â mità ccampo nosta ce facette fa ‘e vierme!  

 

KOULIBALY[‘O Ggialante] 6  Funnamentale liggette sempe bbuono ‘a situaziona difenziva: ‘e stuche (gol) arrivajeno p’itimme (colpe) ca nun foveno ‘e ssoje.

 GHOULAM 5,5  Nunn’è cchiú chillo ‘e ‘na vota; ajere pruvaje a ffarese vedé ‘ncopp’â ferza mancina, ma senza zuco né ccunnimma. Peccato.  

 

 DEMME 6+ Se facette ‘nu mazzo tanto ricuperanno e navianno (smistando) paricchi pallune; peccato ca nun riuscette a essere presente ‘ncopp’ô lemmeto f’’a muntaca (area di rigore) nosta a ffà aculla (diga) difenziva. [da ll'88'  BAKAYOKO[‘O Mammone] 6 Appena trasuto sbrugliaje ‘na situzziona ‘nzipeta!]

LOBOTKA 5  Me dispiace, ma pure Gattuso, sbaglianno, pretenne ‘e farelo fà chello ca nunn’è: ‘o matirro (regista); nurmale ca nun riesce a ffà lume lla ‘mmiezo! [dô 71'  RUIZ [Anemalonga] 5 Piezzo e ppejo, perdette subbeto ‘nu pallone periculuso e ccuntinuaje senza darece ammanne  (sicurezze);bunariello sulo ‘nu tiro ‘a fora.]   

 

 POLITANO 5  Cercaje sí a mmancina lla ‘nnante ‘e mettere ‘ndifficultà ll’avverzario ‘e turno, ma lle mancaje sempe diciannove sorde p’apparà ‘na lira e asasa (soprattutto) quanno turnaje nun riuscette a ffà aculla (diga) ‘ncopp’ô tiro ‘e Bbajrami. [dô 61' INSIGNE 5  Ce mettette sí ll’azzaja (l'impegno) nicessaria, ma nun riuscette maje a ttruvà ‘o bberzaglio d’’a porta! E cche saciccio!]

 ELMAS[‘O Turco] 5,5  Mettette ‘ndifficultà ll’epata difenziva (la fase difensiva) d’’e tuscane, ma lla ‘nnante pe ddoje vote fallette ddoje accasione, una retissante (una clamorosa). [dô 71' ZIELINSKI 5,5 Nun lle riuscette ‘e fà chello ca vuleva Gattuso: ‘o cagno ‘ zurea (cambio di ritmo).]

 LOZANO 7  Dicisivo cu ‘nu stuco (gol) e ‘nu missiddo (assist) risultanno taminno (prezioso). A dritta o a mmancina zumpaje a cchi capitaje.

 

 PETAGNA 6,5  Però sulo p’avé menato dinto ‘a palla dicisiva pecché p’’o riesto se muvette poco  passanno pallune  troppo bbateje (lenti) frissa (preda) d’’e madaffie (difensori) avverzarie. [da ll'88'  LLORENTE[‘O Spetaccuso] 4 Inutile, appena tornano o Caromecosta o Ciruzzo ‘stu mammuoccelo ‘o campo s’’o scorda!.

all.  GATTUSO 5 – Nun lle pozzo perdunà d’avé mannato ‘ncampo ‘na scuatra senza ‘nu veru juoco, ggente ca tiraje a ccampà jucanno a ppalla fa’ tu, signo ca paricchie d’’e suoje nun ce stanno cu ‘a capa e isso  nun riesce a mmetterce ‘na pezza o a  ffarele capace.

arb.: GIUA 6 Tutto summato facette ‘o duvere suojo cu ssulo quacche sfregazzo (sbavatura) senza cusequenzie.

E bbasta accussí. ‘Nzomma ‘e riffe o ‘e raffe s’affuzzaje (si vinse) E gghiammo annante… Mo si ‘O Cielo ‘o vvo’ se torna a gghiucà p’’ocampiunato e ddummeneca ô Maradona a ll’ora sconceca ‘e ll’apritivo arriva ‘a Fiorentina. Ve ne parlo llunnerí e spero ‘e farele cu ‘o pizzo a rrisa! Staveti bbe’. R.Bracale Brak