VERONA NAPOLI [24.1.21] 3 A 1 ‘A VEDETTE ACCUSSÍ

VERONA NAPOLI [24.1.21] 3 A 1

‘A VEDETTE ACCUSSÍ

E cche priatorio guagliú, che fetenzia! Nun se po’ credere chello ca succedette ajere ô Bentegodi ‘e Verona contr’ê pariente ‘e chella zoccola ‘e Giulietta addó ‘o Ciuccio jucaje sulo pe ‘nu quarto d’ora e ppo sparette dô campo cullezziunanno forze ‘a peggia mubbara (partita) nsi’ a mmo  d’’o campiunato e tturnanno  â casa cu ‘na vranca ‘e mosche ’mmano e ccu ‘a bbellezza ‘e tre ppallune dint’ô sacco. E ddicere, vuje ce penzate ?..., ca s’accumminciaje ‘o sibbacco (match) cu ttutt’ati pruspettive datose ca nunn’erano passate diece siconne i ‘o Napule, cu Llozano, s’era miso ‘ncopp’a ll’uno a zzero facennoce credere chi sa’ che.. E ‘mmece – cumme v’aggiu ditto - dô sidicesimo minuto e nsi’ ô niajo (fine) ‘a scuatra nosta sparette lassanno campo e gghiuco ê verunese ca ce cardajeno ‘o pilo pe ttre a uno.  Che priatorio guagliú, che fetenzia! Nun se po’ crerere, ma ‘nu fatto è ccerto: ‘e nuoste nun tenetteno perzunalità e dô 33’ quanno ‘o Verona se mettette ‘ncopp’a ll’uno a uno accusajeno ‘a bbotta e nnun ne venetteno cchiú a ccapo, tanto ca ‘o Verona ce ne facette n’atu paro e ppo ve dico p’itimma (colpa) ‘e chi. Anze me levo súbbeto ‘a mola e vv’’o dico súbbeto ca ll’itimma fove ‘e Gennaro Gattuso ca mannaje ‘ncampo ‘na scuatra ca nun se putette vedé e gghiette a fferní ca cumme si nun fósse avastata ‘a delusiona ‘e miercurí passato ajere nce attuccaje n’ata: passate ‘nventajo ( in vantaggio)   a ffriddo cu Llozano doppo appena nove  siconne, ‘e nuoste se facetteno rimuntà  da Dimarco ô 34, da Barak(che) ô 62’ e dda Zaccagni ô 79’. Tiranno ‘o tutale succedette ca  ‘ncrassifica  ‘o Napule sciuliaje ô sesto posto. Che fetenzia! E ppassammo ê ppaggelle:

MERET[‘O Lungagnone] 4,5  Nun tenette itimma (colpa) ‘ncopp’â primma addaffa (rete), ma ‘ncopp’â siconna i asasa (soprattutto) ‘ncopp’â terza êsse avuto fà coccosa ‘e cchiú; p’’o riesto nun dette ammanna (sicurezza) â sezziona (reparto).

 

 DI LORENZO 4,5  Jurnata no, frasturnato nun facette ‘a catàra  (diagonale) ‘ncuollo a  Dimarco cunsentenno ô madaffio  (difensore) ‘e fottere ô Lungagnone senz’essere cuntrullato. P’o riesto jucaje cu ‘o freno a mmano tirato.  

 

 MAKSIMOVIC[‘O ‘Ntontero] 4  ‘Na statua di sale. Nun servette né ppe frijere, né pp’arrostere; mancaje ‘e pricisione, zureja (velocità) e pruntezza ggiranno a vvacante.  

 

 KOULIBALY[‘O Ggialante] 5  Nervuso e ppoco lammajo (brillante) pur’isso ajere facette cchiú ‘e ‘nu sfregazzo (sbavatura)  e sse facette nutizzià (ammonire). Che peccato!

 

 HYSAJ[Mezacucchiara] 5  Cumme a ll’auti cumpagne ‘e sezziona   (reparto) arreto sufferette ‘o ssustà (l’incalzare) d’’e pariente ‘e Giulietta i annanze se vedette assaje poco e ccu ppocu zuco.

 

 DEMME 6,5  Se cunfermaje pedina  ‘mpurtante lla ‘mmiezo; uno d’’e pochi pusitivi d’’e cuane (azzurri) nun sulo p’’o missiddo (assist) doppo pochi sicunne , ma pure pe n’addaffa sfresata (rete sfiorata) e ttanta, tanta fatica  cumbattenno cu ccegna (grinta) i azzaja (impegno).  [Dô 65’ POLITANO 5 Trasette, ma nun fove pusitivo: sulo ‘nu paro ‘e cusarelle senza maje rennerse periculuso.

 

 BAKAYOKO[‘O Mammone] 4 Jurnata nera: troppo  bbatejo (lento) i a ccurto ‘e  ficre (idee), sufferette ‘a corza e ll’asciute ‘e primma d’’o Verona, facennose pure piglià p’’o prozo dô taglio ‘e Barak(che) ca purtaje ô stuco  (gol). [Da ll’82’  ELMAS[‘O Turco] – sv.]

 

 LOZANO 6,5 ‘Nzieme a Ddemme fove uno d’’e poche a sse sarvà risultanno ‘o cchiú mascullo  (brillante) ‘e ll’epata uffenziva (della fase offensiva) cuana: nun sulo ll’addaffa (rete) a ffriddo ma pure tanti accasione criate puntanno e zzumpanno ll’ommo. Peccato ca prerecaje dint’ô zarrà (deserto)!

 

 ZIELINSKI 4,5  Nun se vedette, né se sentette cumme si nun ce fósse stato; ‘mpratteca inutile! [Da ll’82’  LOBOTCKA  sv.]

 

 INSIGNE 4   Dette sulo ‘a ‘mpressione d’essere sciso ‘ncampo diciso a scancellà chello ca ll’era succieso ‘nSupercoppa, ma ‘a mubbara (partita) soja, doppo pochi minute fove tutta ‘mpennenza i a scennere cu ttanti, troppe arcatte (errori) e ttantu fummo. Però êtt’’a passà n’ora primma ca Gattuso ‘o ccapesse e ss’’o chiammasse ‘mpanca!  [Dô 60’  MERTENS[Ciruzzo] 5 Ancòra nunn’è isso e sse vedette: peccato murtale chillu pallone suĵo perzo ca purtaje ‘e verunese ‘ncopp’ô tre a uno. ]

 

 PETAGNA 5,5  Carimmo (generoso) cumme a ssempe faticaje p’’a scuatra luttanno dint’â muntaca (area di rigore) d’’e lucale pe ffarese spazzio ma, troppo sulo,  nun ne cacciaje nisciunu  periculo uffenzivo. [Dô 65’  OSIMHEN[Caromecosta] 5 Finalmente turnaje ‘ncampo i ‘o ffacette cu ‘o ggenio ‘e spaccà ‘o munno, però tuccaje sulo ‘nu paro ‘e pallune e  nnun cumbinaje ‘nu saciccio! Ll’âmm’âspettà ancòra!

 

all. GATTUSO 4  Nunn’’o pozzo perdunà d’avé miso ‘ncampo ô ‘Ntontero  e d’avé preferito ô Lungagnone a Ppastacrisciuta. Chest’è  intiarro(suicidio).Tiffiddà  (perdere) ‘nu sibbacco (match) ca se sta affuzzanno (vincendo) ggià dô primmo minuto è ffaddiaso (scandaloso).’Na mubbara (partita) cu n’addaffa ‘e meizzo (di vantaggio) êsse avut’’a rennere cchiú semprice ‘a facenna p’’o Napule ca ‘mmece sbracaje, abbettiaje (rallentò) e sse facette mettere sotto. Itimma (colpa)  soja si ‘a nuoste so’ ‘na scuatra pazzoteca (schizofrenica) ca po’ ffà granni mubbare (partite), ma pure sibbacche (match) senza capo né ccóra. Ce sta tanto e ttanto da faticà e isso s’à dda decidere a ffà jucà sulo a cchille ca ‘o pponno i ‘o vvonno fà i à dda tené ‘o cuorio ‘e levà dâ scuatra chi nun sta a ll’ardezza fósse pure ‘nu granne nomme o  va a fferní ca lle levano ‘a seggia da sotto e nn’’o cacciano!

arb. FABBRI 5,5 Sempe vicino a ll’azziona siscaje cchiú o meno a mmestiere, peccato ca ‘e vvote nchiudette ll’uocchie pe nnun vedé.

E bbasta accussí agliuttimmoce st’atu muorzo amaro e gghiammo annante; mo si ‘o Cielo ‘o vvo’ ce sentimmo viernarí pe ccuntareve ch’è ssuccieso ggioverí ô Maradona cu ‘o Spezia p’’o stibbacco (scontro) ‘e Coppa Itaglia speranno ‘e levarece ‘e pacchere ‘a faccia pigliate ‘ncampiunato. Staveti bbe’ R.Bracale Brak