NAPOLI – FIORENTINA [17.1.21] 6 A 0 ‘A VEDETTE ACCUSSÍ

NAPOLI – FIORENTINA [17.1.21] 6 A 0

‘A VEDETTE ACCUSSÍ

Che Piererotta guagliú e cche ssuddisfazziona. Ajere ô Maradona a ll’ora ‘e ll’apritivo, ‘ncopp’â rota ‘e Napule ascette ‘na cinquina cu ‘a jonta e ll’aranajara  (valanga) luvarda (azzurra) teddussiaje (travolse)  pe sseje a zzero chill’unnece profuche ‘e Prandelli scise ‘ncampo cu ‘na maglia rossa cu ttanto ‘na croce janca, manco fosseno state ‘a Sguizzera…  Robba da pigliarle a ppernacchie… cosa ca facettemo ‘ntribbuna-divano ggià ô 45’ quanno fenette ‘o primmo ajone (primo tempo) ‘ncopp’ô quatto a zzero e i’ dicette: “Allimmeno n’atu paro ‘e ffacimmo!” E accussí fove!  Che suddisfazzione piazzarse ô terzo posto ‘ncrassifica a pparo cu ‘a Roma, ma cu ‘nu sibbacco (match) mancante.

‘E nuoste ajere forze jucajeno ‘a meglia mubbara (partita)  d’’a caracuddamma (stagione)e ffacette pesà tutta ‘a putenza uffenziva d’’a scuatra e d’’o juoco sciampagna d’’e nuoste  e nne facette ‘e spese chella povera Fiorentina poco attienta e troppo trabballante ‘A festa accumminciaje ggià ô 5’ cu  Insigne,po ô 36’ ce penzaje Demme e subbeto doppo  ô 38’  Lozano i ô 45’  Zielinski nce purtaje ‘ncopp’ ô  quatto a zzero. Turnate ‘ncampo,  ô 72’ Insigne mettette a ffrutto ‘nu ricore sacrusato e gghiusto a ll’ 89’  Politano facette cifra tonna accussí cumm’avevo ditto! ‘Nzomma cu ttutto ca ‘a Fiorentina dint’ê primme quarantacinche minute era partuta forte, ma facennoce ‘nu baffo,  ‘a scuatra cuana, se scurciaje subbeto ‘e mmaneche  e riuscette subbeto a mmettere ‘e ccose ‘nchiaro,  attraverzo ‘a qualità d’’e jucature nuoste scanzanno ‘a pressiona (pressing) ‘e ll’ avverzario e arrivanno periculosamente dê pparte ‘e Dragowski ca a ccunte fatte sott’ô lampione s’avette acalà seje vote a ppiglià ‘a palla dint’ ô sacco suojo, mentre ‘o Napule ringrazzianno a Ppastacrisciuta mantenette ‘a porta nosta acrata (inviolata). Che ssuddisfazziona!

Venimmo ê ppaggelle:

 

OSPINA[Pastacrisciuta] 8:Cchiù ‘e n’azziona periculosa partette dê taggille (rinvii) suoje e pp’’o riesto  fove sempe pronto, priciso e ssicuro cu ‘e piere o ascenno auto cu una o ddoje mane o cu ‘e punie.  Se superaje ‘ncopp’a ‘na malegna cunchiusione ‘e Ribery allungannose ‘nterra a ddritta e devianno fora ‘a palla ‘ncaucio ‘e squina (calcio d’angolo mantenenno ‘a porta acrata (inviolata); e lle vulite dà cchiù ppoco?

HYSAJ[Mezacucchiara] 6: Sagliette passanno ‘e minute, ma partette ‘nnarsubbatta (in difficoltà), cu Gattuso ca cuntinuamente ‘o cazziava. E bbuono fove!

 

MANOLAS[Chitelassa] 7: Ancercaje (anticipò)cu pricisiona e perzunalità chillu scassambrello ‘e Vlahovic(cio)e ‘e ‘na manera o n’ata fermaje paricchi jabbre (cross) avverzarie dê ccurzie; facette partì ll’azziona  e mmettette ‘a musarola pure a   Kcouamè trasuto ô posto d’’o scassambrello.

 

[dô 79′ RRAHMANI s.v. … e menu male!]

 

KOULIBALY[‘O Ggialante] 7,5: Tentaje spisso ‘a jucata prufonna p’’e nassie (attaccanti) e lle riuscette. ‘E cchiù salvaje ‘ncopp’â linia d’’a porta ‘nu tentativo ‘mpruvvisato ‘e Vlahovic(cio). Applavuse!

 

RUI 6,5: Nun se vedette troppo ‘int’ê primme minute e cce mettette tiempo pe ddeciderese a scennere ‘ncopp’â ferza, ma po ncumbinazziona cu Ddemme accumminciaje ll’azziona d’’o quatto a zzero.

 

DEMME 7,5: Se dannaje ll’anema currenno tampunanno  ccupulianno (dialogando) e signanno; uno sfregazzo (una sbavatura) ô lemmeto d’’a muntaca (area di rigore) nosta perdenno ‘nu pallone periculuso, ma pe ffurtuna soja e nnosta Pastacrisciuta nce mettette ‘na guappa pezza!

 

BAKAYOKO[‘O Mammone] 7: Se facette truvà a ddritta i a mmanca, ‘ncopp’ e ssotto duminanno ll’armidanno  (centrocampo) i ascenno palla ô pere ‘nnammanna (in sicurezza). Ascette a cchisittú e cchisonghí cu ‘nu malo accunto (cliente) cumme Amrabat(te) e affuzzaje (vinse). S’abbuscaje pure ‘o ricore  miso a ffrutto da  Insigne.

 

LOZANO 7,5: Se magnaje ‘a ferza ‘e dritta e ffove ‘o prubblema nummer’uno p’’a trasera (difesa) toscana. Se facette vedé sùbbeto mettenno ‘mmiezo ‘na granna palla ‘nnaccasione ‘e ll’uno a zzero , po dètte sempe ‘na bbona mana a ll’azziona nsi’ a ttruvà’a priezza persunale mettenno ‘mporta ‘o tallamiò (suggerimento) d’ Insigne.

 

[Dô 60′ POLITANO 6,5:  Trasette diciso a spaccà ‘o munno, ma sulo a ll’89’ truvaje ll’accasione adatta e pparticipaje ô festino signanno.]

 

ZIELINSKI 7,5:  Alicante e ccustruttivo ‘ncopp’â trecquarte se facette apprezzà pecché nun se tiraje maje arreto e mmustraje granna qualità ‘nnaccasione d’’o quatto a zzero quanno abballanno se faticaje ‘o pallone quase accarezzannolo e ppo ‘o mettette ‘mporta cu ‘a riga i ‘o cumpasso dô lemmeto d’’a muntaca (area di rigore).    Applavuse!

 

[Dô 73′ ELMAS[‘O Turco] 6 sulo ‘e stima pecché pure pruvannoce nun se rennette maje overamente periculuso.

 

INSIGNE 9: Ajere sí ca fove ‘o capitano ca vulimmo:urchestraje spisso ‘a munavara (manovra) uffenziva cuana (azzurra) da mancina, ricuperaje tanti pallune e ccu dduje accumminciaje ddoje azzione mise a ffrutto. ‘E cchiù truvaje sùbbeto ll’addaffa (rete) cu ‘na pricisa rasulata â primma accasione e ppo ‘nnaccasione d’’o tre a zzero mettette ‘mporta a Llozano doppo d’esserse véppeta tutt’’a trasera (difesa) d’’a Fiorentina e cunchiudette ll’opera trasfurmanno cu ammanna (sicurezza) ‘o ricore d’’o cinche a zzero.

[Dô 79′ CIOFFI 6 ‘e ‘ncuraggiameno pe ‘stu guaglione ca tocca bbuono ‘o pallone]

 

PETAGNA 7: Nun signaje, ma dètte ‘na bbona mana a ll’arnassa (vittoria) cu dduje missidde(assist): ‘ncopp’a ll’uno a zzero jucanno  ‘mmiez’ â muntaca a ffà sponna p’Insigne ca centraje ‘a porta; ancora meglio ‘nnaccasione d’’o doje a zzero quanno dètte a Ddemme ‘na palla a zzuco ‘e caramella da mettere sulo dinto. 

 

[Dô 73′ MERTENS[Ciruzzo] 6:Foveno minute ‘mpurtante p’uno ca turnava doppo n’additto (infortunio)].

 

all. GATTUSO 7,5: Mannaje ‘ncampo ‘na scuatra sistimata e ccu ‘e fficre (idee) chiare, ‘na scuatra ca ritruvaje armassa (entusiasmo) e ttaccheja (energia),cose funnamentale p’’o juoco sciampagna. Ajere pure ‘a trasera (difesa) se cumpurtaje a dduvere…, meglio d’ati vvote.

arb: CHIFFI i ‘a chenca soja 5 Scadente, nun ce capette quase niente; ‘e cchiú nun vuletteno vedé ‘nu ricore [ca ‘mmece ce steva!]] ‘ncuollo a Insigne addirittura nutizziato (ammonito) pe ffauzaría; menu male ca vedetteno  chillo ‘ncuollo a Bbakayoko.

E ffermammoce cca, alliccammoce ‘e bbaffe e guardammo annante. Mo si ‘o Cielo ‘o vvo’ ce sentimmo ggioverí ca vene però no p’’o campiunato ma p’’a supercoppa tagliana ca miercurí a ssera ‘o Ciuccio joca a Rreggio Emilia contr’â vecchia zoccola. Sperammo ca ‘o Ciuccio joca cumme facette ajere e pputimmo féstiggià! Staveti bbe’. R.Bracale Brak