NAPOLI-SPAL (28.6.20) 3 A 1 ‘A VEDETTE ACCUSSÍ

NAPOLI-SPAL (28.6.20) 3 A 1

‘A VEDETTE ACCUSSÍ

Tutto a pposto guagliú! Tutto a pposto! Ajere nujaute ‘ntribbuna-divano senza bbannere, ma dicenno a auta voce:”’E CCHIÚ, ‘E CCHIÚ, ‘E CCHIÚ CIUCCIO FA’ TU!” ce spassajemo a vvedé n’ata atalossa (prova) pusitiva d’’o Ciuccio capace d’accavallà  (imporre) ‘o juoco suĵo, ma  pure ‘e  sufferí affuzzanno (vincendo) e ppurtannose â casa  ‘a zuppa  cu ttre addaffe (reti) fatte [3’ cu Cciruzzo, 36’ cu Ppeppe ‘a ‘nguenta e 78’ cu ‘o Mmerecato] e una sola pigliata, e ffove ‘na zuppa ca ce permettette ajeressera ‘e purtarce ‘ncrassifica  a ttre ppunte dê pecurare rumanise e ddô quinto posto ca a ccunte fatte p’’o mumento è ‘o mmeglio pussibbile. Passammo ê ppaggelle:

MERET[‘O Lungagnone] 6 Una o doje vote chiammato ncausa da lontano se facette apprezzà e ‘ncopp’a ll’addaffa (rete) ‘e Petagna nunn’avette itimma  (responsabilità).

 HYSAJ[Mezacucchiara] 6 Atalossa ( prestazione) a ttente chiare e scure pe ll’udé  (terzino)arbanese ca currette assaje ma fove ‘mpriciso a ll’epata ‘e muitto (in fase di impostazione) d’’o juoco. Po’ ffà ‘e cchiú.

 MAKSIMOVIC[‘O ‘Ntontero] 5,5 Cunfermaje ‘o mumento pusitivo, ma, e mme dispiace se mmereta miezu zifo mancante pecché, mmerzo â mez’ora  lassaje libbero a Ppetagna ca ce futtette! Peccato.

 KOULIBALY[‘O Ggialante] 6,5  Sibbacco (match) ca nun lle dette troppe apprenzione  (preoccupazioni):mettette ‘a musarola a Ccerri iê vvote facette a spurtellate cu  Ppetagna. [Da ll’80’  MANOLAS[Chitelassa6 ‘e stima.]

 RUI 6,5 : Atalossa (prestazione) ‘e granne sacrifiggio pe ll’udé purtuchese ca daffaje (spinse) assaje ‘ncopp’â ferza mancina currenno p’uttanta minute.

[da ll’80’ GHOULAM 6 ‘e stima].

 RUIZ[Amemalonga] 7  Fove isso ‘o prutacunista d’’a serata d’’o Ciuccio; fove ‘o padrone d’’a linia mediana e ddirettore d’urchesta dettanno tiempe e àsteme  ‘e pasiglio  (righe di passaggio), ‘e cchiú dduje missidde (assist) a zzuco ‘e caramella!

 LOBOTKA 6,5 Artachio (tecnico), ‘nteliggente e ppreciso fove pur’isso assaje pusitivo cunfermanno ca  Gattuso nun se sbagliaje mannannolo ‘ncampo dô primmo minuto ô posto  Demme ca ajere s’arrepusaje.

ELMAS[‘O Turco] 6,5 Ggiraje a mmestiere truvanno pure ‘na bbella palla pe Ppeppe ‘a ‘nguenta ca signanno adderezzaje ‘a varca dopp’’o russimmo (pareggio) ‘e Petagna.

CALLEJON [Peppe ‘a ‘nguenta ] 7,5 Lle cunziglio ‘e se taglià chilli mustaccielle ca ‘o fanno assumiglià a ‘nu sorice ‘nfuso ‘a ll’uoglio, ma se mmeretaje ll’applavuso d’’a tribbuna-divano  pecché fove ‘o  jucatore serio ca a dduje juorne dô mmaturarse ‘e cuntratto facette n’atalossa (prestazione assje pusitica currenno ‘ncopp’a ttanti pallune e ttruvanno d’addaffa (rete) overamente ‘mpurtante! [Dô 78’  YOUNES[‘O Mmerecato] 7 Trasette e ccumme lle succere spisso ‘o primmo pallone tuccato ‘o mannaje ‘nfunn’ô sacco. Applavuso!

 MERTENS [Ciruzzo] 7  Ce facette arrecrià purtannose a 123 addaffe (reti) cumplessive cua ‘a maglia luvarda (azzurra): n’addaffa (rete) quase subbeto pe mmettere ‘e ccose ‘nchiaro,’nu missiddo  (assist) [po’ inutile] pe Llorenzigno i ‘a dimustrazziona ca sta passanno ‘nu bbellu mumento cu ‘a maglia e ccu ‘a città [Dal 64’ MILIK[Sant’Arcadio] 6 ‘e stima  Trasette e sse facette vedé addó fove nicessario, ma nunn’avette accasione.]

 INSIGNE[Lorenzigno ] 6,5 ‘A varra ca cunzola â zia monaca ‘e Pairetto lle levaje ‘a priezza ‘e avé signato, ma p’’o riesto fove friccecariello e ppusitivo cumm’ê cumpagne ‘e sezzione (di reparto) [Dô 65’  LOZANO 6+ Trasette e ddimustraje subbeto ‘e tené ggenio currenno a ccapa sotta e ddannose da fa. Se vedette ca vulesse jucà ‘e cchiú!]

all.  GATTUSO 7  Cinche arnasse (vittorie) cunzecutive ‘n ‘nSerie A E nun so’ cchiacchiere cheste, s’ nummere ca ‘o Napule nun truvava da paricchio; ‘a scuatra soja, cumme v’aggiu ditto, jucaje urdinata, cu fficre (idee) chiare, sapenno addó vuleva arrivà e nnun ghiette ‘int’ê chiavette manco doppo ‘e ll’addaffa (rete) ‘e Petagna sott’â mez’ora.

 Arb. PAIRETTO 5,5 Grossi fetenzie nun ce ne facette, ma   troppo pignuolo, ògne vvota ca ‘o Ciuccio signaje chiammaje chille d’’a varra pe ffà cuntrullà quacche saciccio e ttanno fove cuntento quanno   se facette mettere ‘e ppurpette ‘mmocca e ce annullaje n’addaffa  (rete) p’uno o duje  centimetre ‘e  spalla. Esaggerato!

E fermammoce cca. Mo, si ‘o Cielo ‘o vvo’ ce sentimmo viernarí ca vene pe ccuntareve chello ca succede a Bbergamo ggioverí ê sette e mmeza. Statevi bbe’ e  Alluccate ‘nzieme a mme: E CCHIÚ, ‘E CCHIÚ, ‘E CCHIÚ CIUCCIO FA’ TU!”

R.Bracale Brak