SALERNITANA -NAPOLI [31.10.21] 0 A 1 ‘A VEDETTE ACCUSSÍ

 

SALERNITANA -NAPOLI [31.10.21] 0 A 1

‘A VEDETTE ACCUSSÍ

E cch’ato jammo ascianno guagliú? Chella d’ajere ‘nmmerzo ê sseje a ll’Arechi ‘e Salierno  contr’ê lucale fove

dinto a unnece jurnate, ‘a decima arnassa  (vittoria) d’’o Ciuccio ca se mettette dint’â sacca tre ppunte assaje pesante, facenno sujo ‘nu sibbacco (match)  “spuorco e mateleco (cattivo)” contro a  ‘na Salernitana ca nun se vuleva arrennere, ma nun tenette ‘a forza ‘e ce fà male [cu ttutto ca ll’ucummo (arbitro)[4 e ppo ve dico]tentaje ‘e darele ‘na mana ] Over’è ca se facetteno sèntere ‘o fatto ca nun ce steva Caromecosta, miezo acciaccato, i ‘a decisione ‘e fà arrepusà ô capitano, ma dalle e ddalle ‘o cucuzziello addeventa tallo e ‘ncapo ‘e ll’ora ll’addaffa (rete) arrivaje e ccu essa ll’arnassa (vittoria)  appena doppo ca trasetteno  Petagnone i ‘o Turco,ca  pigliajeno parte a ll'azziona dicisiva i ‘a Salernitana e ll’ucummo se ll’êtten’’a piglià cchiú ddinto ‘e dint’ô prozo! Peccato sulamente ca po a ttarda sera ‘a Roma se facette vattere dô diavulo russo e nniro,si no mo stessemo primme ‘ncrassifica ‘nsulitaria e nno ‘ncumpagnia. Però damme tiempo ô tiempo!

Passammo ê ppaggelle:

OSPINA[Ecchesepastacrisciuta] 6,5 – Nunn’êtte ‘a fa cape d’angelo, ma chelli tre o quatte vote ca fove chiammato a sse spurcà ‘e guante dimustraje ammanna (sicurezza) e pruntezza: ô primmo ajone ( nel primo tempo) abbrancaje ‘na cunchiusione ‘e  Bonazzoli. A ll’arrancua (nella ripresa) spiccecaje ‘nu pare ‘e facenne ‘ngarbugliate ‘mbagarra  (in mischia) e ‘na tacatarrassa  (un colpo di testa)periculuso ‘e Strandberg(o); è overo ca ‘int’ô niajo (nel finale) Di Lorenzo, appustiato ‘ncopp’â linia ‘e porta lle dètte ‘na mana a repuzà(respingere) ‘nu tiro ‘e timmurria (punizione ‘e Ribery, ma isso ca s’era menato dimustraje ca ce fósse arrivato! Cumprimente.

 DI LORENZO 6,5 Chiammato a ffà ll’istinaje  (gli straordinari), nun se facette vedé annante; bbona ‘a ficra (ll’idea) d’appustiarese ‘ncopp’â linia ‘e porta ‘nnaccasione d’’a timmurria (punizione) ‘e Ribery, ma ‘o purtiere nuosto nce fósse chiaramente  arrivato.

 RRAHMANI 5,5  Bbona atalossa (prestazione) nsi’ â fessaria ‘e nun chiurere a ttiempo ‘ncuollo a Rribery, custringenno ô Ggialante a usà ‘e mmane pe ffermà Simyca però nunn’ aveva recoveta ‘a palla ‘e Ribery.

 KOULIBALY[‘O Ggialante] 5 Pe pparicchiu tiempo nunn’êtte fa quase niente, po s’accuntentaje ‘e fa  ll’urdinario, ma ‘mpruvvisamente fove arzacco    (ingenuo) quanno ausaje ‘e mmane pe ffermà a Simy,ca nunn’era arrivato ‘ncopp’â palla ‘e Ribery e mmaje nce fósse arrivato i a ccunto fatte sbagliaje ll’ucummo ca – revulamento ‘mmano- nunn’ ll’êsse avuto menà fora!

RUI 6  Sta attraverzanno ‘nu bbuonu  mumento  i ‘o ddimustraje pure ajeressera!

  ANGUISSA[‘O ‘Ntussecuso] 6,5  ‘Na certezza:quantità e cqualità lla ‘mmiez’ô campo piglianno mazzate, ma facennose rispettà.

 RUIZ[Anemalonga] 6  Pur’isso pavaje ‘nu primmo ajone (primo tempo) cumpricato, quanno ‘o Ciuccio nun truvaje ll’affarache (spazi) nicessarie.

 ZIELINSKI 7 Miezu zifo mancante (Mezzo punto in meno) pe bbia ca sciupaje ô 5’ ‘na granna accosione ch’êsse trasfurmato ‘o sibbacco (match), ma se facette perdunà ô 61’ mettenno dinto ‘a palla ‘e ll’arnassa (vittoria). Napoli che sa anche essere tosto, solido e concreto. [Dô 95’  ZANOLI – sz.]

 POLITANO 6  Uno d’’e poche  ô primmo ajone  (nel primo tempo) a ttentà coccosa, tanto ca se jucaje sempe dâ ferza soja  (dal suo lato).Cercaje ‘e mettere bboni ppalle ‘mmiezo, ma nun ce steva chi zumpassee prerecaje a vvacante [da ll'80' JUAN JESUS sz].

 MERTENS 5,5  Poca rrobba; quacche vvota cercaje ‘a palla, ma nun ce ‘a detteno e pp’’o riesto nun riuscette a ttruvà ‘o juoco ‘a fà e lle mancaje sempe ll’urdemu pasiglio (passaggio) (dô 60' PETAGNA 7  Trasette cu ‘o pere justo e ffaticanno p’’a scuatra,  ccagnaje ‘a faccia uffenziva d’’o Napule  Sulo contro a ttutte tenette palla ô niajo (nel finale) facenno risciatà ê cumpagne mentre ‘o tiempo passava. Cumprimente!

 LOZANO 5,5  Ggiraje a vvacante aizanno porvera, senza cegna e ficre (grinta ed idee). Peccato.. [Dal 60’  ELMAS[‘O Turco] 6,5 – ‘Nchietta cu Ppetagnone purtaje ficre (idee) e llettura ‘e juoco ggià cu ‘o primmo pallone tuccato; po cercaje a Zzielinski’int’all'azzione sprellungata ca nce purtaje a ssignà e dint’ô niajo aniato (sofferto) fove ‘fra ‘e cchiú masculle (lucidi)].

all. Luciano SPALLETTI 6,5  Pure ajere ‘a scuatra soja sapett’essere tuosto e ccuncreto, ma senza Caromrecosta êtte ‘a cagnà coccosa e isso aspettaje cchiú ‘e n’ora pe ppiscà ‘e cagne juste e ssubbeto venettemo a ccapo d’’a facenna  lanzqanno ‘nu signale chiaro e ppriciso, anze pattio (definitivo) â serie A.

arb: FABBRI 4 Vecchia carta canusciuta pure ajere pe ppartito pigliato nce siscaje contro caputianno carí (falli), nchiudenno ll’uocchie pe nun vedé cumme ‘e lucale cauciavano ô ‘Ntussecuso e ati fetenzie assurtite, ma ‘a cchiú grossa ce ‘a facette jettanno fora ô Ggialante addó ca ttiermene ‘e revulamento nun s’’o mmeretava, pe nun dicere ca fove Bbanti a cchiammarselo pe ffarlo casticà a Kastanos(se) ch’êva dato ‘ncuollo ô ‘Ntussecuso.

E fermammoce cca. Sperammo ‘e cuntinuà a ppigliarece tre ppunte e mmo, si ‘o Cielo ‘o ppermette ce sentimmo viernarí ca vene pe pparlà d’’o sibbacco (match) ‘e cuppetta iurupea ‘e ggioverí a ssera contr’ô Legia Varsavia.

‘E cchiú, ‘e cchiú, ‘e cchiú Ciuccio fa’ tu!

Staveti bbe’ Raffaele Bracale Brak