SPARTAK MOSCA – NAPOLI [E.L.24.11.21] 2 A 1 ‘A VEDETTE ACCUSSÍ

 

    

SPARTAK MOSCA – NAPOLI [E.L.24.11.21] 2 A 1

‘A VEDETTE ACCUSSÍ

Niente ‘a fà guagliú, mannaggia bbubbà! Doppo la scutuliata pigliata ‘ncampiunato dâ Bbisciona a Mmilano ajere a Mmosca contr’ô Spartak(che) pigliajemo ‘na carocchia pe ddoje a uno  e ccullezziunajemo ‘o siconno sciuliamazzo iurupeo sempe cu ‘a soccia scuatra ca ce aveva  vattute pure a settembre ô Maradona.Êssem’avuto pirciò ajere levarece ‘e pacchere ‘a faccia e ‘mmece chi t’’o ddà? Ma pe fforza, pe fforza! Nun se po’ ffà a mmeno ‘mparanza ‘e jucature cumme a Ccaromecosta,Anguissa, Demme acciaccate e cquacch’ate pe sparagnarsele o farle arrepusà…Pe ghionta ‘e ruotelo ajere nunn’erano passate tre minute ca Lobotka trasenno ‘e corza dint’â muntaca (area di rigore) nosta jette a scarpesà uno d’’e lucale ca n’apprufittaje pe mmenarse ‘nterra i ‘a varra dicette a ll’ucummo   ch’êv’’a siscà ‘o ricore ca Sobolev(vo) mettette dinto spiazzanno ô Lungagnone e ssempe ‘o nummero sette d’’e lucale ô 28’ cartiaje ô purtiere nuosto signanno ‘o doje a zzero. A ‘stu punto ‘e nuoste tentajeno ‘e fa coccosa, ma chillu paro ‘e vote ca riuscetteno a ccentrà ‘a porta aratirramente (pericolosamente) truvajeno pronto ô purtiere lloro i ‘o primmo ajone se cunchiudette ‘ncopp’ô doje a zzero p’’e lucale. Tutt’ata musica a ll’arrancua (nella ripresa) quanno ‘o Napule jucaje, cu ‘o sanco a ll’uocchie, sempe dint’â mità ccampo lloro  e aramadde (finalmente) ô 64’ ‘O Turco riuscette a ssignà mettenno a ffrutto ‘nu granne missiddo (assist) ‘e Petagnone. Però cchiú ‘e n’addaffa (rete) nun fovemo crestiane e nne caccià e gghiette a ffení ca ‘o Spartak(che) angappaje  ll’uommene ‘e Spalletti ‘ncimma ô jauallo (girone) a zzamma  (quota) 7 doppo cinche jurnate, aspettanno ‘a tarra (sfida) d’ogge ‘nfra Leicester(re) (5 punte) e Llegia Varsavia (6).

Sperammo ca fenesse cu ‘nu russimmo (pareggio e ppassammo ê ppaggelle:

 MERET[‘O Lunganone] 5  Lassammo perdere ‘o ricore, ma ‘ncopp’ô doje a zzero êsse avuto ‘a tentà coccosa e nnunn’’o ffacette!

DI LORENZO 6  Meglio a ll’arrancua (ripresa) doppo ‘nu primmo ajone cu pocu zuco e ccunnimma!

 JESUS 5,5  Nun facette fessarie, ma fove troppo bbatejo (lento) e ppe recogliere o passà ‘na palla nce vulette ‘a mana d’’o Cielo!

 KOULIBALY[‘O Ggialante] 5,5  Me dispiace, ma ll’aggi’’a levà miezu zifo (voto) pe bbia ca se facette surpassà dâ palla d’’o doje a zzero. Peccato!

Mario RUI 5,5 Miezu zifo (voto) mancante pecché sufferette troppo ‘o muvimento i ‘e gghiucate ‘e Moses(so) cumme ‘nnaccasione d’’o doje a zzero.

Stanislav LOBOTKA 5 Ll’attocca  ‘nu zifo (voto) mancante pecché rijalaje  ‘nu  ricore a Promes(so) doppo 40 sicunne ‘e juoco e pp’’o riesto lla ‘mmiezo, sulo i abbandunato sufferette e criaje poco o niente. Peccato! [Dô 78’  RRAHMANI – s.z.]

ZIELINSKI 5,5  Pure a isso ll’attocca miezu zifo mancante pecché ggiraje a vvacante senza maje truvà ‘na bbona jucata ca fruttasse coccosa!

 

 LOZANO 5,5  Miezu zifo mancante pecché Facette justo justo quacche cusarella senza maje fa nascere coccosa ‘e ‘mpurtante.

Dries MERTENS[Ciruzzo] 6  Pur’isso fove poco mascullo (brillante), però allimmeno jucaje ‘na bbona arrancua (ripresa) ‘mpignannose assaje.

 ELMAS[‘O Turco] 6,5  Tutto summato, ‘nzieme a Ppetagna fove ‘o meglio d’’e suoje e nun sulo pe ll’addaffa (rete), ma pure pecché cu cquacche bbona cumbinazione cchiú ‘e ‘na vota facette faticà a Sselikhov(vo).

 PETAGNA 6,5  Nun signaje,ma faticanno ‘e bbannía (fisicità), piglianno mazzate cercaje ‘e tené ‘ntucuessa  (in apprensione) ‘a trasera (difesa) russa. A zzuco ‘e caramella ‘o missiddo ô Turco p’’o stuco nuosto.

all.  SPALLETTI 6  Cu ttanti jucature ‘mpurtante acciaccate o stracque e dda pruteggere facette chello ca puteva mettenno ‘ncampo ‘na scuatra ca sinamparco (comunque)  fove cumpetitiva ch’êtt’’a fa ‘e cunte pure cu ‘a cazzimma russa.

arb. TURPIN 5,5 Facette perdere troppo tiempo ê lucale senza dicere niente e ffove troppo ardurabbio (troppo fiscale) cu ‘e nuoste!

E ppacienza guagliù, pacienza… Dammoce n’atu pizzeco ‘ncopp’â panza e tturnammo a ppenzà ô campiunato ca dummeneca a ssera  ô Maradona arriva ‘a Lazzio ‘e Sarri e ssi ‘o Cielo ‘o ccuncede ve ne parlo llunnerí ca vene e, ccorna facenno, spero ‘e cuntarve cose bbone…

‘E cchiù, ‘e cchiù, ‘e cchiù Ciuccio fa’ tu!

Ve saluto.

Raffaele Bracale Brak