Dint’ ô Vasto

Dint’ ô Vasto


I

Aggio apierto ’o balcone… Ê seje â matina
’o cielo è ’na pittura ’e grand’artista…
Peffino don Gennaro, ’o giurnalista,
mettenno a pposto ’e copie d’ ’O Matino

s’ ’o guarda e sisca. È allero. Ll’aria fina
l’à miso ’e buonumore e, comme abbista
c’arape ’a mosta ’o giovane ’e bbarrista

Ce hê fatta ’a grazia… fa ’stu cappuccino
quanno m’aggi’ ’a piglià? Sott’â cuntrora?…
Tenite ’a capa fresca! fa ’o guaglione
…âte aspettà… ce vô ’nu quarto d’ora…

’a machina nun è ghiuta ’mpressione!
Ma ammeno ll’hê appicciata? E che ve pare
E votta ’e mmane…, ca ’o tiempo è denaro!

II

Surzéo ’o ccafè… m’appiccio ’a sigaretta
e me trattengo cca, ’ncopp’ô balcone…
Ancora se rispira… Da ’o puntone
nun spostano nè machine o lambrètte…

’Sta via è quase pulita, quase netta
e i’ nun m’ ’a perdo certo ll’occasione
e m’ ’a gudé primma d’ ’a… prucessione
’e nire, russe…, verde e… vïolette,

cuntrabbandiere, zoccole, pappune
mariuole, cammurriste, scippature
vrenzole ’e dint’ô vasto, cu ricchiune

e femmenielle… insomma ’accuppatura
ca mo, all’ intrasatta, una vutata
se vène a s’apprupià ’e chesta strata!

III

Sto’ esageranno? Vuje nun me credite?
Penzate ca ’sti ccose i’ me ll’ammento?
Embè, quando vi prego ’nu mumento:
venite ad onorarci, favorite!…

E ppo’ parlammo, quanno ve vedite
’mmiezo a cierti zantraglie malamente,
a ttu pe ttu cu cierti ddie ’e fetiente…
e sulo tanno, allora po’ capite

pecché, n’ata mez’ora e me ne traso,
’nzerro porta e balcune e te saluto…
e si pe forza aggi’ ’a surtí d’ ’a casa

temgo ’e preghiere ’mmocca e faccio vute
giacché, chi sa’ qua’ juorno, ’int’ô casino
fernesco o a Puceriale o ê Pellerine!

IV

Dice: E pecché ce staje? Cagna quartiere!…
È na bbella pruposta ca… m’attizza…
e si tenesse ’e llire ’e ’nu schinizzo
l’avria fatto pur’ io chistu penziero…

Ma ’o fatto d’ogge nun è chillo ’ajere:
’na cosa ’affitto? E dateme ’o ’nderizzo…
Diciteme addó sta e v’autorizzo
a cauciarme cu tutto ’o piacere

si nun me trasferisco sott’ô colpo…
Naturalmente senz a foca ’ncanna,
pavanno ’o gghiusto, senza ca me sporpo,

senza ca ce refonno e acqua e rranno…
Ca vaco ascianno ’a luna?… Così è dura?
E allora resto cca, fra chesti mmura!

V

Pure pecché so’ ’nu sentimentale
e a chesta strata me so’ affezzionato:
quanno – tant’anne fa – ce so’ arrivato
pe grazia ’e Ddio se steva nun c’è mmale…

Gnorsí, forse ’nu poco pruvinciale
nun dico ’e no, ma era frequentata
da ggente acconcia: miedece, avvocate
e ’a chella borghesia ch’è ’o vvero sale

ca dà sapore a tutto ’nu quartiere…
E se campava cca tranquillamente
senza paura ’e ascí, quann’era â sera

pe farse ’a pizza o pure sulamente
pe gghí a guardà ’e puteche cu ’e vetrine
tutt’allummate e chiene ’e merce fine!

VI

È doppo ch’è succiesa, ’a tarantella
e s’è avutato, ahimmé, tutt’ ’o canisto!…
’o ssaccio: mo dicite: “Sî razzista!…”
ma ’o fatto sta accussí: ’sta strata bbella

s’è stravisata – e mmo è nu burdello –
’a quanno, tiene cca: vista la svista
so’ asciute ’mmiezo chisti senzacristo
’e ciento razze e cciento tinte ’e pella,

cu ’a famma a ll’uocchie, cu ’e zampitte ô pere
e pronte a tutto p’abbuscà ’a muneta…
e â malavita nun l’ è parzo overo

e s’agguazzà ’mmiezo a chesta muféta;
s’è smossa ’a mòta e so’ venute a galla
tracchie, zuzzimma e scorze ’e purtuallo.

VII

E so’ sguigliate ciento macazzine
ca vennono mmunnezza e paccuttiglia
ca si date ’nu sguardo dint’ê stiglie
ve scenne ’o core dint’ê cazettine…

Ma è ’a merce adatta pe ’sti marrucchine
ca ànno ’a campà e tenono famiglia…
e senza farve troppa meraviglia:
ce sta chi se l’accatta ’sti mmappine!
Pure pecché – faciteme stà zitto… –
’mmiez’â mmunnezza, ê vvote ce truvate
’o ppoco ’e… borotalco!… Chi m’à ditto?

Chi sape ’o juoco… Ma m’ ’o so’ scurdato!
E po’ che ce vô ’a zingara? E nu’ crero!
’A malavita venne… acquasantere?

VIII

Dice: E l’Autorità?… Ma site fesse?
Sulo si scappa ’o muorto se fa sotto…
p’ ’o riesto, votta llà, chi se ne fotte
è mmeglio a nun truvarse… compromesse!

Te miette a ’mparuliarte p’ ’o permesso?
Te miette ’appiccecarte e ffà casotto?…
Pe niente puó truvarte ’mmiez’ ê bbotte!
Chi t’ ’o fa fà?… Nce pô scappà ’o pruciesso

e allora sa’ che ddie ’e scucciature
cu ’o giudice, ’avvocate ’e testimone…
Meglio è girà pe strate cchiù sicure

addó nun puó truvarte a ffà quistione.
Per cui la quale, ormaje ’mmiezo a ’sta via
stammo sultanto dint’ê mmane ’e Ddio!

IX

Sa’ invece quanno ’o ’ncuocce ’nu graduato?
Quanno vo’ fà ’na multa a nu signore
ca nun è guappo o niro… Sulo allora
sponta… l’Autorità e fa ’a sbrasata.
Se leva ’o guanto, te guarda ’ntustato,
piglia ’o libbretto e ’a penna: ’e ccaccia fora
e sfoga tuttu quanto ’o malumore
cu tte, povero ddio ca sî educato

e pure si aje raggione… pave e zzitto
mentre ca – contromano – ’e muturine
d’ ’e… ccarte ’e tre…, a ppazze, ’a manca e dritta

t’arrivano deritte dint’ê rine,
giacché financo ’ncopp’ê marciappiede
venono a secutarte… E isso nun vede!

X

Ma stammo dint’ô Vasto, no â Riviera,
a Piazza Plebbiscito o via Manzoni…
Cca nun ’o truove ’e casa ’o… capezzone
ca sta ô Comune o ca fa ’o cunsigliere:

’e pproprietà ’e ttene ’int’ê quartiere
cchiù rinomate addó manco ’o guaglione
pô scennere p’ ’a via a ghiucà a ppallone
e ’a strata è lustra comme a ’na guantiera!

Stammo ’int’ ô Vasto, stamo a via Firenze
e ce âmmo tené ’a posta: zitte e mute!
Pavammo ’e ttasse senza preferenze

ma nun ce attocca manco tanto ’e ajuto!
Nuje simmo ’e si’ Nisciuno d’ ’a città:
è cchesta ’a sacrosanta verità!
Raffaele Bracale
(dal vol. 'E CCOSE D''O PPASSATO ed. Graus Napoli 2006)