Va’ cchiú chiano!

Va’ cchiú chiano!


I

’O sto’ guardanno, ’o stongo riflettenno:
chistu rilorgio va ch’ è ’nu piacere…
Comme cammina, tié, allero allero
e allaccia e corre… Ma addó sta jenno?

Addó penza ’e arrivà? E, va sapenno,
chestu truttà affannato ’e ’sta manera
a che s’ ammette?… ’Stu girà d’ ’e sfere
tène quacche custrutto?… ’Sta facenna

’e nun fermarse manco ’nu mumento –
tittí tittà, minuto pe minuto –
le porta a ’stu rilorgio giuvamento

ll’ è de sgarrupo o pure ll’ è d’ ajuto?
…Ma che nce ’o spio a ffà?!… Corre, va ’e pressa
e nun me vo’ sentí, poveru fesso!

II

E i’ ’nvece ’o vularria farlo capace
ca ’o ccorrere è ’na grossa fessaria…
Si me stesse a ssentí le diciarria:
Acchiànete ’nu poco…, datte pace!

Ca ’a corza ca tu faje, tanto tenace,
tène ’na meta sola, arrassusia!
È ’a morte!… Chesto è ttutto, gioja mia…
Sultanto ’a morte oj ni’… piace o nun piace!

E vuó correrle ’mbraccia a ’sta… signora?
Te pienze d’ ’o mancarlo ’appuntamento?
No, nun avé paura: quanno è ll’ ora

te vène a pezzecarte certamente!
Pirciò nun ’a fà ’a corza…, tiene ’mmano
e arruóbbate ’e minute… Va’ cchiú cchiano!
Raffaele Bracale
(dal vol. 'E CCOSE D''O PPASSATO ed. Graus Napoli 2006)