venerdì 17 ottobre 2008

'E SETTE PECCATE CAPITALE

’E sette peccate capitale
1971


Ira

Te chiammano: ’o fiammifero, e a raggione
si’ ’a tipa ca nun manca maje ’accasione
’e farse vení ’o ppoco ’e pazzaria.
T’allumme pe ’nu niente, ah mamma mia!

E chesto che cos’è?
calmammece ’nu poco, picceré!
Ca si tu sî nervosa,
i’ so’ ’nu tale
ca manco è ddoce ’e sale!


Invidia
(’Mmidia)

Tu tiene ’ncopp’ a ll’asteco
sulo ’a vasenicola
e te magne cu ll’uocchie
’e ppiante d’ ’a signora
ca tiene facciaffronte.

So’ rrose, so’ ggeranie
so’ ggiglie ’e Sant’Antonio,
murtella, gesummine…
me pare ’nu ciardino.
Ma comme – t’addimanne –
pigliano tutte quante,
e sulo a mme ’sti tteste
stanno sempe vacante?

E tanto ll’hê guardate,
cu st’uocchie malamente,
ca sî stata cuntenta
sulo quanno seccate
ll’hê viste tutte quante!…

Ma quanno ’ncopp’ a ll’asteco,
pe t’arracquarte ’a pianta,
sî gghiuta stammatina,
ch’hê visto? Una ruvina!

E fronne scamazzate,
’a terra sparpagliata
e ’a testa sfrantummata!

E mmo che ce vuó fà?
Pecché te piglie pena?
Sarrà ca a quaccheduna
manco ’a vasenicola
vuleva farle bbene!…


Lussuria

P’ ’o cavero ’o balcone hê spalancato
e t’hê affacciata fora ’e pressa espresso.
Puorte sulo ’o suttanino
– ciento gramme, suppergiú –
ma pe quante fosse fino
ggià nun’ ’o suppuorte cchiú!…
E si nun fosse ca ’sta gente sparla…
’a cuollo te l’avisse ggià tirato!…

(E ’nu male penziero me martella:
Votta a ’nfucà cchiú fforte
’a calandrella!)


Avarizia

V’aggio visto arridotta pelle e ossa
pecché nun v’accattate manco ’o ppane
e site bbona ’e stà, jurnate sane…,
sulo cu ’a Cunneniona…

Jate vestuta comme a ’na ciandella
cu ’a stessa vesta ’ncuollo a mmise e anne…
ma zeffunnate chello ca ve danno
pe ’e quarte c’affittate…

Dinto a tant’anne maje ’nu sfizio… maje!
’A casa, ’a chiesia e po‘ p’ ’o riesto, niente:
vuje nun sapite ch’è ’o divertimento,
vuje zeffunnate e basta!

Nè ’na granita quanno ’nfoca austo,
nè ’nu rusolio quanno vierno ’ngrogna…
nun canuscite ch’è ’o bburro, ’a ’nzogna:
’nu filo d’uoglio appena…

I’ mo vurria sapé: ma a cchi ’e llassate
tutte ’e denare vuoste?… M’ ’o ddicite?
nemmanco ’nu parente,
a chi ’e llassate? O pure ve penzate
ca ’mparaviso v’ ’e purtate appriesso
e cu san Pietro ve levate ’a sghessa
fatta ’na vita sana?


Accidia

Te saccio d’ ’e sette â matina
cunfromme ’o sole è spuntato
annanze ô balcone sdrajato,
cu ’a tazza ’e cafè
ca pienze sultanto pe tte!
T’arape ’o giurnale
nun ggià pe sapé
che caspita a mmunno succede
ma sulo pecché,
t’ ’o portano tutte ’e matine…
e allora, sapite cumm’è!

Te saccio d’ ’e sette â matina
finquando ’o sole è calato,
ca passe ’a jurnata sdrajato,
cu ’a pippa e ’na tazza ’e cafè…

Cadesse ’stu munno,
muresseno ’a ggente
tu niente!
Nun smuove ’nu dito,
nun spuoste ’na seggia…
Annanze ô balcone sdrajato
tu pienze pe tte!
Sfuglianno ’nu fuoglio,
fumannote ’a pippa,
zucanno ’o ccafè!…
Gola

Te piaceno ’e cannuole,
vaje pazza p’ ’a pastiera…,
te guarde ’e sfugliatelle
cu ’na faccella ’e céra,
ca llà pe llà sperisce
e si siente l’addore d’ ’a cassata
poco ce manca ca nun ne svenisce.

Si magne ’o sanguinaccio
t’allicche pure ’e ddete…

S’intende ca po’ tiene ’o diabbete!


Superbia

Pecché papà è ffiglio ’e titolato
pecché tiene ’automobbile cu ’autista
seje case e ddoje villette a Bbellavista
e ’o portafoglio assaje bbuonu ’mpurpato,
cammine ca me pare t’hê aggliuttuta
’na mazza sana sana!

T’êsse fotografata
’a faccia toja ’ncazzata,
quanno sî sciuliato
addò io êvo sputato
e hê fatto una caduta a ppiro nizzo
annanze a tutta ’a ggente d’ ’o palazzo!



Raffaele Bracale
(dal vol. 'E CCOSE D''O PPASSATO ed. Graus Napoli 2006)

Nessun commento: