sabato 21 gennaio 2012

SPEZZATO ‘E PURCIELLO ô TIESTO

SPEZZATO ‘E PURCIELLO ô TIESTO

chello ca serve pe 6 perzone
‘nu chilò e duiciento ‘e spalla ‘e purciello tagliata a piezze ‘e cm. cinche pe tre e pe ddoje,
miezu chilò ‘e pummarole ammature lavate, scuttate, spellate e tagliate a ffarinule,
600 gramme ‘e patane vecchie lavate, asciuttate e tagliate a ffarinule,
ddoje cepolle ndurate ‘e Muntoro ammunnate e ntretate,
‘nu bicchiere d’uoglio ‘auliva dunciglio,
‘nu cucchiaro d’arecheta secca spullecata,
farina, sale fino e ppepe niro mmacenato a ffrisco q.n.s.

comme se fa:

Auntà cu ‘nu paro ‘e dete d’uoglio ‘na cummedità p’ ‘o tiesto pruvvista ‘e cupierchie e sistimarve dinto ‘e piezze ‘e spalla lavate e ‘nfarenate; agnadirve tuorno tuorno ‘e ffarinule ‘e patane, chelle ‘e pummarole e ‘o ttrigliato ‘e cepolle, derrammarve ‘ncoppa ll’arecheta, ‘o ssale, e ‘o ppepe e rricà tutto cu ‘o riesto ‘e ll’uoglio e cu ‘nu bicchiere d’acqua cauda; attappà ‘a cummedità cu ‘o cupierchio e metterla dint’ ô tiesto callentato a 180° e lassà cocere pe vinte minute tuiglianno ògne ttanto cu ‘na cucchiarella ‘e lignammo. Serví súbbeto caudo ‘e tiesto ‘stu spezzato gurmante. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve e cunzulàteve ‘o vernecale!
Raffaele Bracale

Nessun commento: