INTER – NAPOLI 9.12.12 2 A 1 ‘A VEDETTE ACCUSSí

INTER – NAPOLI 9.12.12 2 A 1 ‘A VEDETTE ACCUSSí Maledizzione guagliú..., maledizzione! Ajeressera a mMilano contr’â scuatra ‘e Stramaccione ‘o Napule perdette n’atu treno. Ànno voglia ‘e dicere, Mazzarri e troppi pennarule ca lle songo amice, ànno voglia ‘e dicere ca ‘o Napule détte ‘na lezziona ‘e pallone a ll’Interre... Ce azzeccammo arret’â capa... ‘a lezziona! I’ saccio sulo ca ajeressera ce ‘ntussecajemo e ca ô prazzo (alla fine) d’ ‘o fullé ce truvajemo cu ‘na vranca ‘e mosche ‘mmano... Saccio sulo ca ajeressera mentre lloro ‘e sparajeno , nuje sentettemo ‘e bbotte e a ll’abblativo sciuliajemo dô siconno ô terzo posto ‘ncrassifica e mmo tenimmo ‘ncopp’ô cuollo ‘o sciato nun surtanto d’ ‘a Fiorentina, ma pure d’ ‘a Roma ‘e Zemàn(no).... E ffètono d’aglie e ccepolle! Nun servetteno cuorne, vrancate ‘e sale,asso ‘e mazze,sciacarí e sciacarà ...,ajeressera ‘o pallone d’ ‘o pareggio nun vulette proprio trasí! Steva scritto ca ll'Interre êva vencere e vincette pure cu ‘a benedizziona ‘e chillu cesso ‘e Rizzoli vecchia carta canusciuta ca ajeressera decidette ‘e nun vedé no una, ma tre falte ‘e mane dint’â camma ‘e ricore d’ ‘e milanise..., mentre ‘e culleche suĵe chi nun parlava e cchi nun senteva e nisciuno s’accurgette d’ ‘a falta dint’â camma ‘e ricore ‘ncuollo a mMaggio! Ma mo nun ce avvelimmo... ‘o campiunato è ancòra luongo e ‘o siconno posto è ancòra a ppurtata ‘e mano. A ppatto ca nun se fanno grossi fessarie perdenno punte ‘mpurtante ‘ncasa o contr’ê dirette cuncurrenti ‘ncasa e ffora. Passammo ê ppaggelle: DE SANCTIS 4,5 Quanno ‘na scuatra tira sulo ddoje vote ‘mporta e ssegna ddoje rredde, certamente ‘o purtiere ch’ ‘e ppiglia quaccosa ‘ncopp’â cuscienza ‘a tène pe fforza. E ppure ‘o pirata ‘a tenette: ‘a primma rredda ‘a pigliaje ‘ncopp’ô palo suĵo e ‘ncopp’â siconna êsse pututo fà assaje ‘e cchiú! GAMBERINI 6 + ‘O meglio d’ ‘a sezziona (reparto) arretrata luvarda; cu ttutto ca chillu delinquente ‘e Cassano lle rumpette a ssanco ‘o naso cu ‘na manata, ll’ècchese difenzore viola nun perdette ‘e vista nè a mMilito nè a cCassano ca s’allargajeno assaje e isso fuje chiammato a metterce ‘na pezza quanno Cannavaro o Britos(so) fujeno superate. ( dô 46° PANDEV 5 Atalossa ‘a scurdà! ‘O giuvinotto nun fuje ‘ncundizziona decente e se vedette!). CANNAVARO 5 Atalossa scadente; troppo nervuso e casinista; dint’a ll’uccasiona d’ ‘a siconna rredda se perdette a mMilito lassannole spazzio pe cuntrullà ‘a palla e tirà ‘mporta! BRITOS 6 ‘Ncopp’ê ppalle avete fuje ‘mbattibbile e ghiette a anticipà ll’avverzarie ca applazzàvano (rinviavano), addirittura ‘ncopp’â linia d’ ‘o centrocampo.Sbagliaje quaccosa, ma poco!..., sulo ô finale, stracquato dâ fatica. MAGGIO 4 Nun m’ ‘o facite vedé cchiú! Patetico. Sotto porta sbagliaje ddoje palle ‘mpurtante e ‘mmece d’appressurà ‘ncopp’â curzia se preoccupaje sí e nno ‘e nun lassà troppu spazzio a Pereyra. INLER 5 Peccato! Pure p’ ‘o turco-napulitano, ca nun trasette maje ‘mpartita, atalossa ‘a scurdà! (Dô 57° DZEMAILI 5,5 Chiammato a ffà ‘na parte ca nun è d’ ‘a soja, êsse avuto appiccià quacche tracco, ma nun ce riuscette!). BEHRAMI 7 Atalossa terasca (prestazione mostruosa) d’ ‘o centrocampista sguizzero. Currette pe tre o quatto tanto ca ggià ô primmo aione perdette ‘o cunto d’ ‘e pallune ricuperate da ll’ècchese viola.’Na cumferma ‘mpurtante p’ ‘e cuane. ZUNIGA 5 Quantu fummo e cquanta porvera aizaje! I Nagatomo ‘o costrignette a mmesurarse ‘a palla! HAMSIK 6+ Accumminciaje a gghiucà quase súbbeto, sbarianno pe tutt’ ‘o fronte uffenzivo senza dà punte d’anàfora (riferimento) a ll’Interre. Pruvaje quacche cumbinazziona ‘nteressante cu Insigne e cu Cavani ma nun truvaje maje ‘o demmarraggio niceforo (spunto vincente) (38° MESTO s.v.). INSIGNE 6,5 – Fuje ll’ommo cchiú periculuso d’’o Napule allarmanno a Handanoviccio cchiú ‘e ‘na vota cu ‘e tire suĵe. CAVANI 6,5 – ‘A fotò d’ ‘o fullé suojo fuje ‘na rincorza ‘e ciento metre fatta pe gghí a ricuperà ‘nu pallone ‘ncuollo a Guarín(no) ‘O Matadòrro se sacrificaje assaje riuscenno a truvà ‘a rredda d’ ‘a speranza dinto a ‘na bagarra (mischia). ALL. MAZZARRI 5- - Certo forze ‘o risultato è busciardo, ma (comme quann’uno vence ave raggione, accussí quanne se perde, ave tuorto) nun po’ avé ‘nu bbuonu voto soprattutto pecché se ‘nfessette a utilizzà jucature ca stanno fora cundizziona e nun sapette truvà remmedie. Certo pe tutto ‘o fullé mettette pure ‘ndifficultà tatticamente ll’Interre, ma po a ll’abblativo recugliette scorze ‘e lupine e sperammo ca fernesce ampressa ‘sta tempurata e Wallerettino Erode piglia n’ata strata! Arbitro RIZZOLI 4 Vecchia carta canusciuta arbitraje ‘ncapa a isso facenno ‘o ‘ngrese, ma ‘o ffacette sempe a bbrabbé (scàpito) d’ ‘o Napule nun vulenno vedé tre falte ‘e mane ‘e ll’interiste dint’â camma ‘e ricore, nè ‘nu cuntatto Juan Jesusso – Maggio cu ‘o cuano affussato!Pe nun dicere po d’ ‘o vizzio ca tenette ‘e metterese sempe ‘ncopp’â linia d’ ‘a palla custrignenno ‘e cuane a rallentà ll’azziona o addirittura a scartarlo! E cu chesto ve saluto. Ce sentimmo, si dDi’ vo’, llunnerí ca vène. Staveti be’! R.Bracale Brak