sabato 8 dicembre 2012
STAMMO A NNATALE!
STAMMO A NNATALE!
I.
Nce simmo! Pochi juorne e è ggià Natale/
ma a cquanto pare ‘st’anno ‘un è dde mèle...,/
anze ‘sta festa ‘e st’anno sape ‘e fèle!/
Pe ccomme ‘e fatte stanno, è nnaturale//
ca, si ‘assaggiammo, assapurammo ‘o ssale/
e ‘un ce spassammo cchiú cu ‘a parentela/
nè ll’ allummammo a ttavula ‘e ccannele.../
Chist’anno, mare a nnuje, fernesce a mmale//
visto ca a fforza ce ànn’ ‘a cardà ‘o pilo/
a nnuje cchiú puverielle e cu ‘a mazzola/
farce assaggià ch’è amaro assaje ‘o milo/
ca ce âmm’ ‘a rusecà... Eh cazzarola/
chist’ anno ‘e ccerto ll’âmm’ ‘a piglià ‘nculo/
annure, senza scarpe nè pedúle!//
II.
Pe ccuje la quale tu che vuó fà festa/
che vuó appruntà cenone e ppinto arrusto?/
Qua’ cresemisse allere o chine ‘e gusto?/
Tutto abbulito e scòrdate ‘a menesta!//
e ttutto ‘o riesto appriesso!.. E cche ne rresta?/
‘O riesto ‘e niente! Scòrdate ’aligusta/
e nun spilarlo ‘o vino ‘a dint’ô fusto/
ca addó ll’appuje si mo è vvacante ‘a cesta//
‘e chello ca ‘e ‘sti juorne steva a bbista/
e mmo ll’ànnu sfrattato d’ògne pposto?.../
Addó ’appujamo ormaje si ‘a dint’â lista//
âmm’ ‘a cassà ògni ccosa e ccaro costa/
pure sulo ‘nu piatto scarzo ‘e pasta/
senza lupine o vongole e nce avasta?//
III.
O ce âmm’ ‘a fà avastà.... pecché chist’anno/
Monti e ccuverno chesto sta dicenno/
c’âmm’ ‘a scurdarce ‘e jí facenno/
‘e grannezzuse ca scialanno vanno...//
Âmm’ ‘a fà penitenza e ttutte ‘o ssanno.../
Pure ‘e Natale? ‘E ‘sta festa sulenne?/
E sissignore! Sí è cchisto ‘o crenno/
è cchesto ahimmé ca ‘a nuje mo vanno /ascianno!//
è ‘a nuje, surtanto ‘a nuje, ca ormaje ‘o vvonno/
e nun le fotte ormaje ch’è asciutta ‘a zinna/
e ànno voglia ‘e zucà cchiú nun risponne/
e nun sazziasse cchiú manco ‘nu ninno/
‘o ppoco ‘e latte ch’esce quanno ‘nfunno/
nce ppoco d’assummà e mette’ a ssunna!///
nota
crenno= cren, aroma amaro
a ssunna= a regola
Raffaele Bracale
(dal vol. CANZONA MUTA Ed. f. c. Napoli 2012 )
Iscriviti a:
Commenti sul post (Atom)
Nessun commento:
Posta un commento