giovedì 16 gennaio 2014

NAPOLI - ATALANTA (COPPA ITALIA15/01/14) 3 A 1 ‘A VEDETTE ACCUSSÍ

NAPOLI - ATALANTA (COPPA ITALIA15/01/14) 3 A 1 ‘A VEDETTE ACCUSSÍ ‘Assa fà â Maronna, guagliú! ‘Assa fà â Maronna!Ògne ttanto ‘na bbona nutizzia! E cchella d’ajere fove ca ‘o Napule vincette e ghittaje fora dâ coppa itaglia a ll’Atalanta, ‘na scuatra ca tenco ‘ncopp’â ponta d’’o vernecale (dello stomaco) pe dduje mutive, uno spurtivo e n’ato storico-pulitico: chillu spurtivo è ca ll’Atalanta è ‘na scuatra travante (satellite) d’’a juve e ggià fósse ‘nu bbuonu mutivo pe mm’’a fà schifà pe mmane ‘e légge..., ma po ce sta ‘o mutivo storico-pulitico ch’è ancòra cchiú cauzante visto ca (pe cchi nun ‘o sapesse) ll’uttantacinche pe cciento d’’e delinquente, mariuole, senz’arte nè pparte, venute ô millottucientosissanta appriesso a garibaldi giuseppe a rromperce ‘o pasticciotto cca bbascio fóveno bergamasche! Pirciò che granna suddisfazziona ghittarle fora dâ coppa itaglia a chilli quatte zappielle scise dâ muntagna d’’o ssapone! E tte futte, te futte si ‘a nichessa napulitana arrivaje doppo ‘nu fullé cumplicato cu n’esipotio( ‘a rredda d’Insigne) ca facette discutere e facette ‘ncazzà a ll’atalantise... Te futte, te futte; si tu Del Grosso sî ffesso nun t’’a puó ppiglià cu ll’arbitro e ccu ‘e signalinie; te futte, te futte! ‘E cunte se fànno sott’ô lampione e lla ssotto, ô prazzo (alla fine) d’’o fullé, ‘o Napule, reculamento ‘mmano, avette raggiona! Passammo ê ppaggelle: RAFAEL 6 Nun ce putette fà niente ‘ncopp’â rredda ‘a duje passe ‘e De Luca. P’ ‘o riesto urdinaria amministrazziona cu quacche asciuta e ppoco ato. MAGGIO 6- Quacche ‘mprecisione ‘nchiusura ma cunfermaje tutto summato ‘e stà ‘ncriscenza. Appressuraje (spinse) quanno putette, ma mettette ‘mmiezo raramente quacche pallone ‘nteressante. ALBIOL 6- ‘Ncopp’â rredda atalantese dètte a mmancina troppu spazzio a Livaja.P’ ‘o riesto quacche bbona chiusura, ma penzaje bbuono ‘e nun ascí palla ô pere. BRITOS 5,5 Atalossa (prestazione) negativa ‘e ll’ècchese bulugnese:détte via libbera a dDe Luca a ccentro ‘e camma ‘nnaccasiona d’’a rredda atalantese. Soprattutto ô primmo ajone quanno ll'Atalanta avette cchiú spazzio fove troppo ‘mpriciso. REVEILLERE 6,5 Atalossa (prestazione) pusitiva d’’o difenzore francese. Fisicamente migliurato avette cchiú cunfianza (fiducia) p’ accumpagnà ll'azziona comme quanno pennellaje ‘nu scicco bbassurero ( suggerimento) ‘ncopp’a cchell’ ata curzia p’’a primma rredda ‘e Cagliecònno. INLER 6- Avettemo aspettà ll’arrancua (ripresa) pe vederlo guvernà a mmestiere quacche ppallone dint’â trecquarte avverzaria, facennose perdunà ‘e tanti jerre fatte precedentemente, durante ô primmo ajone, cu ‘nu paro ‘e bbuoni bbassurere ( suggerimenti) comme a cchillo fatto a Cagliecònno p’’a terza rredda. RADOSEVIC 6,5 ‘E ‘ncuraggiamento.Esurdiente ‘nmaglia luvarda (azzurra) ‘stu guaglione d’’o nuvantaquatto mustraje bbona perzunalità comme cane ‘e presa e cchiú ‘e ‘na vota guvernaje bbuono pallune ‘mpurtante. INSIGNE 6,5 ‘A chiena e ‘a vacante, anze ‘a vacante e ‘a chiena: nfi’ ô 62°, quanno sfurtunatiello cugliette ‘o travesagno ccu ‘nu bbellu tiro ‘e punizzione,êva fatto poco o niente, ma po, sempe leso e ppronto, nun perdette ‘accasione quanno ô 71° Del Grosso lle ricalaje senza vulerlo ‘a palla p’ ‘o doje a uno! PANDEV 6- Pruvaje sí a gguvernà ‘o pallone dint’ô ‘mbruoglio d’’a ‘mbrugliata, ma nun fove ‘nserata e ppoco â vota venette meno dint’ê mmecce; fósse stato a don Rafele ll’êsse levato primma ‘e quanno ‘o levaje. (dô 59° HAMSIK 6,5 Turnato ‘ncampo doppo cchú ‘e ‘nu mese e mmiezo mustraje ‘e tené ggenio d’’o ffà e ddètte granna qualità â manovra uffenziva cullabburanno a tante azzioni e de primma poco mancaje ca signasse!) CALLEJÓN 8 Atalossa diapresa e spetillante (prova sontuosa e spumeggiante) d’’o spagnuolo ca cu fantastico tiro ‘e dritta a ‘ncrucià ‘e primma ‘ntenziona sfruttaje ‘nu granne bbassurero ‘e Reveiglié adderezzanno ‘ncopp’a ll’uno a uno ‘a varca cuana. Nchiudette po ‘o fullé ‘ncopp’ô tre a uno quanno signaje ‘a dudicesima rredda staggiunale ‘nfilannose ê spalle d’’a difesa recuglienno ‘nu bbassurero d’Inlèrro e mettenno ‘o pallone ‘nfra palo e ppurtiere. Pe tutt’’o fullé currette senza stancarese maje,avasciannose pe ddà qualità â manovra, attaccanno ‘mprufunnità o dànno ‘na mana quanno s’êtte ‘a redubblà (raddoppiare) ‘ncopp’a ll’esterne.(da ll’84° BARITI sv) DUVAN 5 Troppo braduso (lento), pesante e ccumplicato (macchinoso) facette poco cupulianno (dialogando) pure poco cu ‘e cumpagne dint’ô stritto e rassignannose sulo a difennere ‘e poche palle ca avette. (dô 71° HIGUAIN 6,5 Facette ggirà a mmestiere ‘o pallone ‘nfase uffenziva; sulo a vvederlo dint’â camma ‘e ricore ll’atalantise se facetteno dint’ô cazone...Del Grosso(tre vvote bbuono) se spaventaje talmente ca, perduta ‘a tramuntana,mentre ‘o Pipita steva fremmo ‘mpusizziona d’urzo’ecose (fuorigioco) passivo, ‘mmece ‘e respingere ‘o pallone lanzato da Inlerro, se facette rimbalzà ‘a palla ‘ncopp’ê spalle e senza vulerlo ‘a dètte a Insigne ca facette ‘o doje a uno.) BENITEZ 6,5 Ll’aveva ditto â viggilia ca ‘o fullé nun fosse stato facile,e nun fove facile; cu ‘nnu rutizzio (turnover) a ll’uso ‘e mazzarri cu nnove o diece cagne c’êsse pututo scappà ‘o llutto comme cu ‘o Bologna bis conzideranno ll’atalossa pusitiva d’’a scuatra ‘e Colantuono, ma don Rafele è de n’ata pasta, sape chello ca fa, tenette ‘mmano, avette pacienza, s’accuntentaje ‘e pochi cagne e ‘o risultato lle dètte raggiona... ll’arbitro DE MARCO 6 Ma sulo p’avé applicato a dduvere ‘o recolamento, cunvalidanno ‘a rredda d’Insigne, strafuttennose d’’e ppruteste sceme ‘e ll’atalantise. P’’o riesto ‘stu sischetto ‘e Chiavari aumentaje ‘a ddose d’’e diebbete ca tene cu ‘e cuane nun siscanno paricchi jerre (falli) maligne fatte da ll’atatalantise. E fermammoce cca.Dummeneca ca vene se torna a gghiucà p’’o campiunato e ppirciò si dDi’ vo’ ce sentimmo llunnerí ca vene speranno ca putesse cuntarve ca ‘o Napule fósse turnato a vvencere ‘ncasa ‘e ‘nu bbrutto accunto (cliente),’o Bologna! Staveti bbe’. R.Bracale Brak

Nessun commento: