ROMA - NAPOLI (COPPA ITALIA 05/02/14) 3 A 2 ‘A VEDETTE ACCUSSÍ

ROMA - NAPOLI (COPPA ITALIA 05/02/14) 3 A 2 ‘A VEDETTE ACCUSSÍ Nun ce pozzo credere guagliú! ‘O vvedette e ancòra nun ‘o ccrero. Nun è gghiusto! Nun ce ‘o mmeretajemo d’essere scunfitte; no no e nno! Ajere ssera ‘o Napule ‘e don Rafele ‘ncoppa itaglia a ll’Ulimpico ‘eRoma fove chiammato a ffà scurdà ‘a bbrutta fijura fatta cu ll’Atalanta‘ncampiunato e ppoco mancaje ca nun ce riuscesse turnanno cu ‘nu bbellu pareggio dint’â sacca. Mancaje poco pecché ‘a Roma vincette sulo a ll’88° e ppe scagno. Cumminfatto doppo ‘nu primmo ajone scunfurtante cu ‘o mierco d’’a primma rredda rumanesa signata ‘nnurzo’ecóse (in fuorigioco) da Gervigno,e doppo d''o dubblato (raddoppio) rumanese, ce fove ‘na granna riaziona cuana ca, cu ‘nu juoco arzillo e spettaculare,sapette a ll’arrancua arapí n’ata vota ‘nu fulléca pareva nzerrato.E si nun se fósse esaggerato, tentanno addirittura ‘e vencere, ‘o pareggio ce ll’avessemo purtato â casa. Pe ffurtuna ca ‘e rredde segnate‘ntrasferta contano ‘o ddoppio e a ccomme stanno ‘e ccose nce po’ avastà vencere miercurí ca vene p’uno a zzero p’apprudà â finale ‘e coppa itaglia. E accussí ssia! Passammo êpaggelle: REINA 6 Salvaje ‘o Napule dâ ruvina ‘ncopp’a ‘nu tiro ‘e Ljajic(cio)e a n’ato ‘e Totti. Sicuro cchiú ‘e ‘na vota cu pprese difficultose, ma putette fà poco e nniente ‘ncopp’ê rredde d’’a Roma: ddoje signate ‘a Gervinho sempe troppo ‘a vicino e cchella ‘e Strootman(no) cu ‘na mbomma ‘a luntano, ma justo dint’ô sette. MAGGIO 5 ‘A chiena e ‘a vacante: quacche bbona chiusura, ma pure troppe sfregazze (svarioni) ca prucurajeno pericule.P’ ‘o riesto appressuraje (spinse) poco e mmalamente. FERNANDEZ 6- Nun facette ggrossi fessarie, ma forze – almeno isso - êsse pututo tentà coccosa ‘e cchiú ‘ncopp’â cunchiusione ‘a luntano ‘e Strootman(no) lassato libbero e ffranco ‘e tirà ‘a tutte ‘e mediane. ALBIOL 5 ‘Nu passo arreto a ppietto ‘e ll’urdemi fullé: ‘ncopp’â primma rredda êsse avut’ ‘a radduppià ê spalle ‘e Reveigliè e nun ‘o ffacette e ‘ncopp’â terza rredda se facette piglià ‘mmiezo dâ triangulazziona rumanesa. RÉVEILLÈRE 5 ‘Ndifficultà ‘a súbbeto se facette superà ‘ntromma e ssenza prubbleme ‘a Gervinho ‘ncopp’â primma rredda rumanesa. Ascette pe ‘nu ‘mpiccio (infortunio)muscolare.(dô 25° GHOULAM 6 Trasette súbbeto e bbuono ‘nfullé e dimustraje granna padrunanza ‘e tiro ‘ncopp’ê ppunizzione.) INLER 6 ‘A surpresa!Jucaje comme maje êva fatto nfi’ a mmo, cumbattenne comme a ‘nu lione; certo quacche sfregazzo ce fove, ma cumplessivamente restaje bbuono ‘nfullé nfi’ ô prazzo a ffà chello ch’êv’ ‘a fà! JORGINHO 6 Jucaje ‘na cifra ‘e pallune e ttutte cu cqualità e ‘nteliggenza; quacche prubblema ll’avette ‘nfase ‘e trancatura (interdizione).Mullaje ‘nu poco ô finale. CALLEJON 6- Currette assaje assicuranno ll’isurrupío (l’equilibrio) nicessario; arravaje però tarde ‘ncopp’a ‘nu pallone ‘a menà sulo dinto! HAMSIK 5- Nun ‘o ricunuscette: ‘o Marekiaro ca ce servesse è ancòra luntano e ll’âmm’ ‘a aspettà ancòra; atalossa scadente cunnita ‘a troppi prane (errori) ca lassajeno ‘o signo. Eppure, p’’o ricuperà ‘o guaglione à dda jucà.’O dicette don Rafele e ll’âmm’ ‘a credere! (dô 65° MERTENS 7 Ll’arillo ca ce serveva! Trasette a mmestiere súbbeto ‘nfullé; se zucaje cu ‘nu surzo a cCastànno e superaje a dDe Sanctísso rialannoce ‘o mumentaneo doje a ddoje. Ah! Si fósse trasuto primma!) INSIGNE 6,5 – Mettette ‘ndifficultà n’ accunto (cliente) difficile e scamuso comme a mMaicònno. S’ avasciaje spisso pe favurí ‘o sviluppo d’ ‘a manovra. ‘E pericule cchiú ‘mpurtante p’’e rumanise arrivajeno dê pparte soje.Fove isso ca se ‘nventaje ‘a palla ca ‘o Pipita mettette ê spalle ‘e De Sanctísso. Higuain 7,5 Durante ô primmo ajone se sacrificaje assaje jucanno spalle â porta pe ccrià spazzio p’’e cumpagne. Signaje ‘a rredda ca arapette n’ata vota ‘o fullé e participaje pure a ll’azziona d’’o siconno.(da ll’84° BEHRAMI sv) BENITEZ 6,5 Vulesse avé a ppurtata ‘e mano chi ‘int’â semmana êva sparato a zzero ‘ncopp’a don Rafele, ‘ncopp’a cchello ca sape e ppo’ ffà, ‘ncopp’â priparazziona atletica e ll’urgoglio d’’a scuatra cuana; ‘e vvulesse a ppurtata ‘e mano pe dirle dint’ê mustacce ca ànnu fatto ‘na fijura ‘e seje sorde! Ajere ‘o Napule pigliaje sí tre rredde, ma tenette cchiú ‘e ‘na scusante:’a forza ‘e ll’avverzario, ll’ urzo ‘ecóse ( fuorigioco) ‘e Gervigno ca Bergonzi nun sanziunaje, ‘o campo pesante ca permettette a Strootmanno ‘na ‘mbomma ‘a trenta metre. E cchesto nfi’ ô doje a ddoje; nun ce scurdammo po ca fove ‘a voglia ‘e vencere ca ce custaje ‘o tre a ddoje. S’à dda ricunoscere però ca ‘e cuane jucajeno sempe penzanno auto e guardanno luntano sia stanno ‘nsotto ‘e doje rredde, sia quanno ‘o risultato fove ricuperato. ‘Na cosa se po’ ddicere e ciovè ca cunzideranno comme se cumpurtaje Ghoulàmmo, don Rafele s’êsse pututo sparagnà ‘e fà jucà a rReveigliè. Pruvaje a ffà ‘o taliano facenno trasí a bBehrami ô posto d’’o Pipita, ma ‘a mossa nun avastaje pe mantené ‘o risultato. Ma niente è pperduto: miercurì ca vene, ô san Paolo, ce avasta ‘e vencere pe n’uno a zzero e se va a gghiucà ‘a finale ‘e coppa itaglia. Arbitro BERGONZI 4 Chisto è meza cazetta comme ô riesto ‘e tutte ll’arbitre italiane e, pe gghionta ‘e ruotolo, se porta ancòra appriesso ‘o pisemo d’ ‘e critiche ca avette p’’e duje ricure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e cuane, sisca sempe contro e ‘nzerra tutte ‘e dduje ll’uocchie cunzentenno(senza piglià pruvvedimente) a ll’avverzarie d’ ‘o Napule ‘e ppeggio fetenzie;e cchesto succedette ajeressera,ca primma ‘e tirà fora ‘nu cartellino jalizzo (giallo) ‘nfaccia a ‘nu rumaneso, ce penzaje diece vote ‘a coppa e ppo nun ‘o cacciaje… Ma soprattutto, isso e ‘o cullabboratore suĵo ‘e dritta nun vuletteno vedé ll’urzo’ecóse (fuorigioco) ‘e Gervigno e cunvalidajeno ‘a primma rredda rumanese. Dice: ma chillo ll’urzo’ecóse fove quistione ‘e centimetre e ppo fove ‘e spalla e nno ‘e pere! Chi se ne fotte! È ppoco o è assaje, è de pere, ‘e spalla, ‘e culo, ‘e denucchio, ll’urzo’ecóse s’à dda siscà soprattutto quanno ne surtisce ‘na rredda ca cagna ‘o fullé! Purtroppo tutte ll’arbitre italiane so’ meze-cazette e ce avimmo ‘a tené ‘a posta visto ca Dela dint’ô Palazzo nun è nnisciuno e ‘o Napule po’ essere trattato ‘na chiaveca ‘a ll’arbitre! E cu cchesto ve saluto e si dDi’ vo’ ce sentimmo ‘a prossima vota , speranno ca ve pozzo cuntà bbelli ccose! Staveti be’. R.Bracale Brak