FIORENTINA – NAPOLI (C.I. FINALE 3/05/14) 1 A 3 ‘A VEDETTE ACCUSSÍ

FIORENTINA – NAPOLI (C.I. FINALE 3/05/14) 1 A 3 ‘A VEDETTE ACCUSSÍ Ajeressera a ll’Ulimpico ‘e Roma êsse avut’’a essere ‘na granna festa specialmente doppo ca ‘o Napule vattette ‘a Fiorentina cunquistanno ‘a quinta coppa itaglia, ma ‘mmece pure si fovemo cuntente nun ce ‘a sentettemo ‘e fà troppo bburdello doppo d’a nutizia arrivata primma ca accumminciasse ‘o fullé e cciové ca a ccincuciente metre dô stadio ‘nu gruppo ‘e tifuse napulitane era stato appustiato nun se sapette bbuono si ‘a tifuse viola o rumaniste, o lazziale o niente niente… verunese e ttre nnapulitane erano state cuovete a ppistulettate e uno, cuoveto ‘mpietto, steva grave. Ora mo ‘e tifuse napulitane prisente ‘ncurva accumminciajeno a s’aggità e s’erano fatte ‘e ddiece manco ‘nu quarto e ancòra nun se sapeva si se fósse jucato o no e ‘ncampo ffove tutto ‘nu parlamentà ‘e Marekiaro cu ‘e tifuse pe cunvincerle a stàrese calme… e finalmente se riuscette a mmettere ‘a palla a ccentro pure si dint’ a ‘nu silenzio d’’e ccurve ca facette a ccazzotte cu cchella ca êsse avut’’a essere ‘na granna festa. E ttutto chesto mentre chillu cestariello ‘e matteo renzi, chella ciucciuvettola ‘e rosy bindi e ati quatte magnafranche assurtite assettate a ggratisse ‘ntribbuna facevano vedé ca nun erano fatte lloro e se ne futtevano altamente, tirannose ‘a pizza sotto. Ma ‘e chesto nun ne voglio parlà cchiú talmente ca me ne schifaje, mentre me piacettono assaje ‘e sische napulitane riservate a ll’inno nazziunale tagliano ca ‘na sciacquetta ca nun ne saccio ‘o nomme se mettette a ccantà a mmicrofono comme si fossemo state ô festivallo ‘e sanremo. Voglio dicere ‘mmece ca ‘o Napule vincette e ca sinamparco (comunque) ce attocca ‘e spilarla ‘a sciampagna â faccia ‘e tutte ‘e delinquente,â faccia ‘e carlo conti, ‘e chillu cestariello ‘e matteo renzi, ‘e chella ciucciuvettola ‘e rosy bindi e de tutte ll’ ati quatte magnafranche assurtite assettate a ggratisse ‘ntribbuna e soprattutto â faccia ‘e chilli scieme d’’e telecruniste RAI, tifuse viola, ca ce tirajeno ‘e piere pe tutto ‘o fullé, ma ca s’’o pigliajeno dint’ê rine e – fenuto ‘o fullé – tenevano tutte quante ‘o muorto ‘mmiez’â casa! Pirciò, sí, spilammo ‘a sciampagna, guagliú! Ajeressera a ll’Ulimpico ‘e Roma ‘e cuane ‘e don Rafele sfitajeno ‘a scuatra ‘e Muntella e d’’e Della Valle pe ccunquistà ‘o trufeo nazziunale d’’a Coppa Itaglia eppure si nu fove ‘na cammenata, vincetteno, vincetteno p’’a suddisfazziona nosta e dde don Rafele ca ancòra ‘na vota se cunfermaje granne trainerro capace ‘e vencere súbbeto, ggià dô primmo anno, coccosa... E ajeressera foveno ‘e cuane chille ca facetteno ‘e scarpe ê Della Valle e llassajeno ‘o vveleno ‘mpont’ô musso a cchillu franfellicco anarfabbetico ‘e conti carlo e a ttutte ‘e ssecce cestarielle ca vicino o luntano ‘a DeLa, menajeno favette! Sciú p’’a faccia lloro! Spilammo ‘a sciampagna, guagliú! Granne fullé d’’e cuane accummincianno ‘a Lorenzigno ca vedette finalmente ddoje vote ‘a porta, pe ccuntinuà cu Inlerro,cu gGiorgigno e ccu mMarekiaro ca mbruccanno finalmente tutto ‘o fullé assicurajeno chello ca ce vuleva e ciovè ll’epicràtesa (predominio) a ccentrocampo addó ‘a cualità d’’a Fiorentina pure era simànteca (notevole);nun sulo: ‘o Napule avette ‘a meglio pure ‘ncopp’ê ffasce mo cu Henrique e mmo cu Ghoulàmmo ca chiammate a ‘nchiuvà arreto ll’esterne d’’a tràsera (difesa) viola, rispunneteno pusitivamente isulanno ‘e centrocampiste ‘e Muntella. Spilammo ‘a sciampagna, guagliú! ‘A Coppa Itaglia ‘e st’anno è ‘a nosta e ccu chesta d’ajeressera so’ ccinche! Paggelle ‘sta vota nun ne faccio; mecco, pe ringrazziarle d’’o trufeo, mecco nove a ttutte quante, nove e mmiezo ô Pipita, ca custruette ll’azziona d’’o doje a zzero, a Mertenso, ca trasuto ô posto ‘e Marekiaro, azzuppato, ce mettette poco a mmettere dinto ‘a palla ca nchiudette ‘a quistione e ddiece a ddon Rafele, ca ‘ncarraje tutto cosa, e a lLorenzigno ca pe ddoje vote futtette gluriosamente a nNeto, mentre a ll’arbitro Orsato e a ‘e cullabburature suoje nun pozzo dà cchiù ‘e quatto e mmiezo: troppo ‘e maneca larga cu ‘e viola e ttroppo Caíno cu ‘e cuane, pe nun dicere ca pure ‘a rredda ‘e Vargasso s’ êsse avut’’a annullà pe nn’urzo‘ecóse (fuorigioco). E ccu cchesto ve saluto e vve dongo appuntamento, si dDi’ vo’ a mmiercurí va vene doppo d’’o fullé ‘e campiunato contro ô Cagliare. Staveti bbe’ Raffaele Bracale Brak