NAPOLI – CAGLIARI (06/05/14) 3 A 0 !!! ‘A VEDETTE ACCUSSÍ

NAPOLI – CAGLIARI (06/05/14) 3 A 0 !!! ‘A VEDETTE ACCUSSÍ Ajeressera ô san Paolo prattica Cagliari risolta guagliú, passianno e ssenza nisciuno prubblema ‘a fora ‘e chillo ‘e Marekiaro ca fove crestiano ‘e sbaglià ‘nu ricore ca ll’êsse permiso ‘e sbluccarse finalmente; e ‘mmece niente ‘a fà; ‘o sbagliaje mannanno ‘o pallone a scugnà ‘o travesagno (traversa). Ma p’’o riesto tutto sciuliaje senza darce preoccupazzione e ‘o Napule ‘e don Rafele facette ‘o vallo ‘ncopp’â mmunnezza.... senza levà stima â mmunnezza...’Nzomma, a ddicerla tutta comme fove, chello ca cuntaje ajeressera nun fove tanto ‘a nichessa" (vittoria) cuana quanto ‘o fatto ca ‘o pubblico napulitano dimustraje granna maturità, nun cadenno dint’ô mastrillo(trappola) d’‘e giurnale e d’’a televisiona nazziunale ca ggià steveno pronte a sbranà e a, definitivamente, cundannà ‘o Napule. ‘Mmece s’êtteno ‘a fà cchiú dinto ‘e dinto ê rine pecché ‘o pubblico napulitano rispunnette tranquillamente ‘a gran signore cu strisciune e ccore pe cCiro Esposito chine d’umanità e ssentimento vero onesto. E ‘a suddisfazziona mia fove chella ‘e puté penzà: Chisto è ‘o tifo napulitano, no chillo ca ce vonno fà vedé! Passammo ê ppaggelle: REINA 6 Serata senza straurdinarie; fremmaje quacche ttiro ‘a fora. E cchesto fove! (dô 46° COLOMBO 6 Trasette pe ddarle ‘a suddisfazziona ‘e timbrà pur’isso ‘o cartellino, ma fove ‘mpignato meza vota e p’’o riesto nun êtt’’a fà niente!) MESTO 6,5 Pantelesamente (Perfettamente) ricuperato dô ‘mpiccio(infortunio) nun cuncedette niente ‘nfase difenziva e ffove priciso cu ‘e diacunale! FERNANDEZ 6,5 Overo ca chille d’’o Cagliari foveno poca cosa, ma ll’argentino dimustraje granna padrunanza a ggestiunà (gestire) quacche situazziona cchiú sseria, nun perdette maje ‘a calma e facette arremarrà (ripartire) ll’azziona ascenno sempe a ccapa aizata; sfresaje (sfiorò) pure ‘a rredda ‘e capa durante ô primmo ajone. BRITOS 6 Atalossa (prestazione) tutto summato pusitiva ‘e ll’ècchese bulugnese ca mettette ‘a musarola a Ibarbo ‘ncopp’ô juoco aveto;pure si sufferette ‘nu poco ‘ntassezza (in velocità)pericule ‘mpurtante dê pparte soje nun n’arrivajeno.S’abbuscaje ‘nu cartellinno jalizzo (giallo) ô finale e francamente se ll’êsse pututo sparagnà! GHOULAM 6,5 Oramaje ‘na certezza; a ppietto ‘e Mesto appressuraje (spinse) cchiú assaje e ffove dô lato suĵo ca nascetteno ll’azzione cchiú periculose. INLER 6+ Me facette ‘ncazzà pecché fove troppo braduso (lento) ma, tutto summato l’atalossa soja fove ‘e sustanza; jucaje ‘nu poco cchiú vvascio d’’o ssolito e forze nun fósse stato nicessario.Cca e lla quacche pprano (errore) pe ffurtuna senza cosequenzie. (dô 63° ZAPATA 6- Trasette bbuono ‘nfullé (in partita) facennose nutà dint’â camma ‘e ricore e cquacche vvota ‘ncopp’a ll’esterno, ma essenno ‘nu matarazzo ‘e sbreglie, risultaje ‘mpacciato e machinuso, tant’ è vvero ca ‘a duje passe nun riuscette a mmettere ‘mporta ‘nu pallone ‘mmitante! ) DZEMAILI 6,5 Turnato titulare,cu ‘o Cagliari nchiuso dint’â mità ccampo soja,facette valé ‘e cqualità ssoje uffenzive e nun mancaje ll’appuntamento cu ‘a rredda sfruttanno ‘na respinta corta d’Avramòvvo. CALLEJON 6,5 – Cu ‘o Cagliari ca nun lassaje spazzio, faticaje a ttruvà cheseme (varchi) e cquanno lle capitaje, ‘e cumpagne nun ‘o servetteno. Se sacrificaje ‘ncuollo a Ibarbo e ffove soja ll’ajuda (assist) p’’a rredda ‘e Pandèvvo. HAMSIK 6,5 Miezu punto mancante p’’avé sbagliato ‘o ricore mannanno ‘o pallone a scugnà ‘o travesagno (traversa). ‘O guaglione nun se riesce a sbluccà: è ‘na jastemma menata. P’’o riesto però ll’atalossa d’’o sluvacchio fove cratista (ottima), soprattutto dint’ô dessarrollo (sviluppo) d’’a manovra, e ‘o san Paolo ll’accumpagnaje pe tutto ‘o fullé, chiammannolo pe nnomme. MERTENS 7 Pruvaje sempe ‘a jucata justa; perdette sí quacche ppallone ma dètte sempe ‘a sensazziona ‘e puté fà male; fistiggiaje ‘o cumplianno quanno sfruttaje a mmestiere ‘o rialo lassatelo da Marekiaro mettenno dinto cu ppricisione e ffreddezza ‘o ricore d’’o vantaggio; a ll’arrancua cuntinuaje a ccrià prubbleme â tràsera (difesa) isulana. PANDEV 7,5 Fove ‘nserata e sse vedette addivintanno ‘o prutacunista d’’o fullé (match): se prucuraje ‘o ricore ca sbluccaje ‘a prattica, mettette dinto ‘o pallone d’’o dubblato (raddoppio), se prucuraje n’atu ricore [cu ll’affastamiento (espulsione) d’’o purtiere Silvestri] ricore ca però Marekiaro sbagliaje e participaje pure a ll’azzione ca purtaje â terza rredda. (dô 74° RADOSEVIC 6 Trasette súbbeto e bbuono ‘nfullé (in partita) facenno ‘o cane ‘e presa e menannose dinto quanno oramaje ‘o Cagliari nun ne tenette cchiú.) BENITEZ 7,5 – Nun cuntento d’’a nichessa (vittoria) ‘nCoppa e cu ttutta ‘a mutria (muso lungo) ‘ngiro p’’a preoccupazione d’’o tifoso sparato ‘o Napule scennette ‘ncampo diciso a ffarese valé e ‘o ffacette cu ‘na retumbante (strepitosa) cundizziona fisica. Giustamente cuncedette ‘a passarella a cchi êva jucato ‘e meno, premianno pure ‘a fatica ‘e Colombo,Zapata e Radosevíccio. ll’arbitro GHERSINI 6 Troppo guaglione e cu ppoca ‘sperienzia,’stu bancario ‘e Genova scennette ‘ncampo ‘nu poco preoccupato, ma cchiú d’’o cagno d’’e pannuline ca d’’e tifuse ca ‘o guardavano.Però nun se facette cundizziunà ‘a niente e nun guardaje ‘nfaccia a nnisciuno e siscaje chello ca s’êv’’a siscà! Bravo accussí se fa! Sperammo ca nun se guasta p’’a via! E ccu cchesto ve saluto e vve dongo appuntamento, si dDi’ vo’ a llunnerí va vene doppo d’’a penurdema ‘e campiunato contro â Sampedoria. Staveti bbe’! Raffaele Bracale Brak