NAPOLI – PARMA (14.12.19) 1 A 2 ‘A VEDETTE ACCUSSÍ

NAPOLI – PARMA (14.12.19) 1 A 2

‘A VEDETTE ACCUSSÍ

Guagliú cagna ‘o direttore d’urchesta, ma ‘a museca è ssempe ‘a stessa i ‘a facenna è nnera peggio ‘e chella fetenzia, iettatoria muntazzimma (divisa) nera  ca ajeressera ‘mmerz’ê sseje, ô san Paolo se mettetteno ‘ncuollo, ‘mmece ‘e chella bbella maglia luvarda (azzurra) ch’è ssempe stato ‘a tinta nosta. E ccumme jette a ffení? Fenette malamente  ‘a primma asciuta ‘e Gattusa ‘mpanca cuana (azzurra:

‘o Parma vattetto ô Ciuccio  ô San Paolo pe ddoje a uno e ssuccedette ‘e tutto a Fforerotta; ‘o Parma ‘ncapo ‘e quatto minute ggià passaje annante pe bbia ‘e ‘na granna fessaria d’’o Ggialante ca addirittura pisciaje ‘na palla dànno via libbera a  Kculusevski ca jette a ffottere ô Lungagnone, mentre ‘o Ggialante avette ascí giacché ‘nnaccasiona  d’’a fessar  se jurraje  (infortunò) cadenno malamente. ‘e nuoste cercajeno ‘e adderezzà ‘a varca, ma sbagliajeno assaje sotto porta cruciata cusicché êttemo ‘aspettà ‘o 64’ quanno sant’Arcadio russimaje  (pareggiò) ‘e cunte mettenno a ffrutto ‘a bbella palla misa ‘mmiezo da Ciruzzo [trasuto ô 63’ ô posto d’’o ‘Ncrifato ca nun steva facenno ‘nu saciccio] ma nun fenette lla pecché mentre ‘e nuoste cercavano ‘e pigliarese tutta ‘a puglia ancòra ‘mmaddaddo (in contropiede) ‘a rocchia  (banda) ‘e D'Aversa, apprufittanno ‘e ‘nu sciuliamazzo ‘e Zielinski  ca, senza cazzimma, ‘mmece d’o menà ‘nterra lassaje palla a   Ggervigno ca ce facette chiagnere signanno ô 93’ ‘o doje a uno p’’e cruciate ca mo ce ànnu passate ‘ncrassifica. Eppure, che v’aggi’’a dicere? Cu ttutto ca abbuscajemo ‘e nuoste nun ghiucajeno malamente ‘a fora ‘e ‘nu paro: Lorenzigno i ‘o ‘Ncrifato e ‘a fora d’’e fessarie d’’o Ggialante e dde   Zielinski, ma sbagliajeno troppo sotto porta ‘na vota cu Zielinski e asasa (soprattutto) ddoje vote cu Llorenzigno ca sant’Arcadio, cu ddoje perne, êva miso ‘nnante a Ssepe. Cunchiusione? Ajere rummanettemo cu ‘na vranca ‘e mosche ‘mmano

fermate ‘ncrassifica a  21 punte; quindi perindi poi tu qua’ quarto posto e cquarto posto: cca ce âmm’’a stà accorte a cchi nce sta arreto e nno annante!

Passammo ê ppaggelle:

 MERET[‘O Lungagnone] 7  Avette poco ‘a fà, ma se facette truvà pronto quanno fove chiammato a spurcarese ‘e guante, facette dduje granne tacculle (interventi)durante ô primmo ajone, ma nun putette fà niente ‘ncopp’a ll’addaffe (reti) cruciate signate troppo da vicino.

G DI LORENZO 6,5  Riuscette cchiú ‘e ‘na vota a ttené a  Ggervinho, pure cuntinuanno a gghí e a vvení ‘ncopp’â ferza ‘e dritta.

 MANOLAS[Chitelassa] 6,5  Facette bbona guardia arreto e spisso se facette vedé ‘int’â muntaca (area di rigore) parmigiana senza però maje essere periculuso ‘e capa.

 KOULIBALY[‘O Ggialante] 4  Me chiagne ‘o core e mmaje me fósse aspettato ca ll’êv’’a mettere quatto. Ma ll’aggi’’a fà pecché ajeressera ‘o Ggialante fove ‘o peggio d’’o mazzo e dint’a cquatto minute facette ddoje fessarie , ‘a primma senza cunsequenzie, ma ‘a siconna ce custaje cara e amara. Pe gghionta ‘e ruotolo se facette pure male e avette ‘ascí! [Dô 4'  LUPERTO 6: Doppo quacche minuto ca fove disculo(difficile) facette ‘o ssuĵo e, ppigliate ‘e mmesure nun tenette prubbleme.]

Mário RUI 5,5 Se vedette daffà (spingere) cuntinuamente ‘ncopp’â ferza mancina, ma fallette ‘int’ô maddaddo (contropiede) dicisivo ô niajo (nel finale).

ALLAN[‘O ‘Ncrifato] 4,5  Nun se vedette ‘mpratteca maje e ffove ‘o peggio ‘e ll’armidanno (centrocampo) cuano (azzurro), sempe fora dô juoco.Gattuso ‘o tenette troppo ‘ncampo! [Dô 63'  MERTENS[Ciruzzo] 6,5: Assaje meglio d’’o ‘Ncrifato, trasette e mmettette ‘mmiezo ‘na granna palla ca sant’Arcadio mettette a ffrutto, po cercaje spisso ‘e farece affuzzà (vincere).]

 RUIZ[Anema Longa] 6  Êsse pututo fà ‘e cchiú; facette quacche bbella jucata, ma pure quacche fessariadint’â mità ccampo nosta.

 ZIELINSKI 5,5   Tutto summato putimmo dicere ca duranteô primmo ajone (nel primo tempo) fove ‘o meglio d’’e suoje cu cchiù ‘e n’accasione criata, sse ne scennette a ll’arrancua e nnun lle perdono ‘a mancanza ‘e cazzimma  quanno ô ’92 doppo ‘nu sciuliamazzo pigliato, ‘mmece d’’o carrià ‘nterra,  lassaje palla a Ggervigno ca ce futtette.

 CALLEJÓN[Peppe ‘a ‘nguenta] 5 Jette bbuono ‘ncopp’â ferza, ma no dint’â muntaca (area di rigore) cruciata addó nun fove maje periculuso; sciupaje malamente n’accassione ‘mpurtante. Peccato

INSIGNE[Lorenzigno] 4,5  Currette assaje e e ccercaje ‘e fà coccosa, ma sbagliaje dojje accasione retissante (clamorose) e nnun c’’e ppozzo perdunà! ‘O subbissajeno ‘e sische quann’ascette  e bbuono facetteno. [Dô 78’  LOZANO s.v.: Avette pochi pallune da jucà, nè s’’e gghiette a ccercà!]

 MILIK[Sant’Arcadio] 7,5  Fove ‘o meglio d’’e suoje nun sulo pe ll’addaffa (rete) signata ma pure pecché nun sciupaje nisciunu pallone jucanno p’’e cumpagne e ffacenno cchiú ‘e nu missiddo (assist). Avesse pure pututo signà ancora si ‘nu figlio ‘e zoccola cruciato nun ll’êsse spustato sotto porta ‘e chellu ttanto p’’o fà mancà ‘a palla e ttutto chesto senza ca ll’ucummo (arbitro) se nn’addunasse!

All.  GATTUSO 5,5  Priparaje ‘o sibbacco (match) dint’0a ppochi juorne e ttutto summato ‘a scuatra, cumme v’aggiu ditto, nun se fósse mmeretato d’abbuscà. Dammole ‘o tiempo ‘e faticà cu cchisti jucature p’’e ffà truvà pricisione, cegna (grinta), cazzimma e assaja (cattiveria) nicessarie.

Arb. DI BELLO 5 ‘Stu pugliese nun ce purtaje bbuono; Ce ll’êvemo ‘aspettà!

E ffermammoce cca cu ll’amaro ‘mmocca.

Mo, si ‘o Cielo ‘o vvo’ ce sentimmo pe ll’anteviggilia ‘e Natale doppo d’’a nacchella ‘e dummeneca ca vene contr’ô Sassuolo e sperammo ‘e nun ce ‘ntussecà ‘o Santu Natale.

Staveti bbe’ R.Bracale Brak