GENOA-NAPOLI (8.7.20) 1 A 2 ‘A VEDETTE ACCUSSÍ

GENOA-NAPOLI (8.7.20) 1 A 2

‘A VEDETTE ACCUSSÍ

 E ppure chesta è ffatta guagliú, n’ati tre ppunte dint’â sacca ajeressera quanno ‘o Ciuccio s’appresentaje a Mmarassi contr’ê crifune lucale i ‘e scummaje ‘e sanco, affuzzanno (vincendo)[pure si sulo pe ddoje a uno..] e rinfurzanno ‘o quinto posto ‘ncrassifica, p’’a cuntentezza nosta e dde Gattuso, arrivato, mannaggia ô demmonio scartellato, troppo tarde ca si no tenessemo cchiú d’’e cinquantuno punte ca tenimmo. Cumplessivamente ajere bbona atalossa (prestazione) d’’a scuatra ca asasa (soprattutto) ô primmo ajone (tempo) fove padrone d’’o juoco e d’’a palla p’’o sittanta pe cciento d’’o tiempo allimmeno nsi’ ô mustalà (termine) d’’o prmmo ajone nchiuso ‘ncopp’a ll’uno a zzero pe nnuje cu ll’addaffa (rete) ‘e Ciruzzo ô primmo minuto d’ antijsso (recupero). Turnate ‘ncampo però ‘e oe se detteno ‘na calmata cummettenno quacche fessaria comme ô 48’ ‘nnaccasione ‘e ll’uno a uno d’’e crifune   nato da ‘nu pasiglio a gghí arreto  (retropassaggio) sballato ‘e Ciruzzo ca dâ mità ccampo rijalaje ‘nu tiro ‘e squina (corner) ê lucale i ‘a palla misa ‘mmiezo fove sfruttata a mmestiere  da Goldaniga ca zumpaje cchiú d’’o ‘‘Ntontero e ffuttette ô Lungagnone ca nun ce putette fà niente. E allora Gattuso accumminciaje a sse ‘ngrifà i a strillà e finalmente se decidette a ccagnà coccosa mannanno ‘ncampo ô 63’ Sant’Arcasio e Llozano e ffove proprio  ‘o messicano ô 65’ a sfruttà ‘nu granno lanzo d’Anemalonga truvanno ll’addaffa (rete) ‘e ll’arnassa  (vittoria) vuluta, cercata e mmeretata.

Passammo ê ppaggelle:

MERET[‘O Lungagnone] 6,5  Nun ce putette fà niente ‘ncopp’â cabbesera  (colpo di testa) ‘e Goldaniga, ma primma êva fermato ‘na cunchiusiona  ‘e Pinamonti e, ccu ll’ajuto d’’o palo nata ‘e  Cassata. Fermaje pure, ascennolo ‘ncopp’ê piere a  Ppandev(vo) casinamparco  (comunque) steva‘nnattasallulo (in offside). À dda sulo migliurà cu ‘e piere.

HYSAJ[Mezacucchiara] 6  Taminno (prezioso) e attiento ‘ntrancara (in difesa) nce mettette cegna (grinta) e ssustanza pure si nun sempe fove priciso daimmanno (appoggiando).

 MAKSIMOVIC [‘O ‘Ntontero] 5  Me dispiace ma ll’attocca ‘nu zifo (voto) mancante;poco attiento nun le pozzo perdunà d’esserse fatto fottere ‘e capa  da Goldaniga ca truvaje ll’uno a uno. Aveva ggià smarrunato durante ô primmo ajone (nel primo tempo) rijalanno n'accasiona sapurita   a Ppinamonti.

 MANOLAS[Chitelassa] 6- Meglio d’’o cumpagno ‘e sezziona (reparto); ma ‘o meno ll’attocca pe’nu sfregazzo (sbavatura) ca puteva custarce cara: ‘a fessaria fatta quanno arresecaje ‘e mannà ‘mporta a Ssanabria, mancanno ‘a palla.

Mario RUI 6,5  N’ata bbella atalossa (prestazione d’’o purtuchese ca nun sbagliaje quase maje, attiento nchiusura e ppronto a ffarese vedé annante  mettenno ‘a firma sott’â cannunata  ca dètte ‘a fa a Pperin(ne). Bravo.

Fabian RUIZ[Anemalonga] 7 Prutacunista d’’a munavara (manovra) tra ll’armidanno  (centrocampo) i ‘a  trecquarte; ‘e cchiú  matalo (perfetto)e ttaminno (prezioso) cu cchillu lanzo a zzuco’e caramella ca mannaje ‘mporta a  Llozano [da ll'87' ALLAN s.v.].

LOBOTKA 6,5  Direttore d’urchesta e ‘ngignere; priciso e urdinato scennette ‘ncampo armato ‘e rica, cumpasso e llivella e ppe nnuvanta minute tuccaje ‘nu tummolo ‘e pallune assignannole cu criterio e urdinatamente. Raramente pigliaje sciato.

 ELMAS[‘O Turco] 6,5 Friccecariello e ‘nsaluta jucaje a ccapa sotto pe ttutto ‘o primmo ajone (primo tempo), mannanno ô manicomio ll’armidanno (centrocampo) d’’e crifune; sfurtunato ‘nabvota ‘a  Varra e n’ata vota  Perin(ne) nun lle facetteno pruvà ‘a priezza ‘e ll’addaffa (rete). [da ll'82'  ZIELINSKI s.v.]

 POLITANO 5,5 Miezu zifo (voto) mancante) pecché m’aspettavo ‘e cchiú: sciupaje quase subbeto ‘a palla d’’o ventajo   (vantaggio) e nnun ‘a sfruttaje; po aizaje porvera senza ‘mpressiunà maje.Gattuso s’’o chiammaje ‘mpanca doppo cchiú ‘e n’ora, i’ ll’êsse fatto primma! [dô 63'  LOZANO 7   Trasette ‘ncampo e ddoppo duje minute lassaje ‘o signo. Ch’ato vulimmo?]

MERTENS[Ciruzzo] 6,5  Se fósse mmeretato ‘o sette pecche nun sulo signaje ll’uno a zzero,ma se muvette pe ttutta ‘a linia d’attacco cupulianno cu Lorenzigno jucanno e divertennoce, però  lle levo miezu zifo (voto) pe cchella fessaria ca v’aggiu cuntato. [dô 63'  MILIK[Sant’Arcadio] 5,5 Miezu zifo (voto) mancante pecché trasette senza riuscí a ttruvà cu cchi cupulià (dialogare) e ttuccaje pochi pallune. Peccato!]

INSIGNE[Lorenzigno] 6 Se cercaje truvannose cu Cciruzzo, però nun truvaje maje ‘a porta! [da ll'82'  YOUNES[‘O Mmerecato] s.v.]

all.GATTUSO 7  ‘A scuatra soja dimustraje urganizzazziona, qualità, zarriabbuo (palleggio), tutto n’atu Napule a ppietto ‘e chillo ‘e primma. Fósse venuto cchiú ampressa!  

Arb. MARIANI 5,5 ‘Stu rumano ce porta bbuono e ppure ajere accussì fove, ma troppo pignuolo quacche fetenziella nce ‘a facette.

E bbasta accussí. Ve saluto e ssi ‘o Cielo ‘o vvo’ ce sentimmo llunnerí ca vene pe ccuntareve che facimmo dummeneca ô san Paolo contr’ô diavulo russo e nniro.È ttosta, ma maje dicere maje! Staveti bbe’

R.Bracale Brak