PARMA-NAPOLI (22.7.20) 2 A 1 ‘A VEDETTE ACCUSSÍ

PARMA-NAPOLI (22.7.20) 2 A 1

‘A VEDETTE ACCUSSÍ

E cche ne parlammo a ffà guagliú. Ajeressera ô Tardini ‘e Parma addó ce fossemo aspettate ca ‘o Ciuccio facesse ‘a guapparia, avettemo n’ata delusione i ‘o Napule asseccaje n’ata fijura marrò [assaje p’itimma (colpa) soja datose ca nun riuscette a ssignà e n’atu ppoco pecché ll’ucummo (arbitro) ce mettette ‘a jonta…rijalanno dduje ricure dicisive ô Parma]. Certo si è ca ‘oParma turnaje  a ppigliarese tre ppunte  doppo ‘na  crisa longa  i ‘ o ffacette justo  contro a nnuje, mannaggia ô demmonio scartellato!Votta a fení ‘stu campiunato senza zuco né ccunnimma e sperammo ca chillo ca vene fósse, pe nnuje meglio ‘e chisto ca ce à dato troppi vuccune amare. Ajere Caprari sbluccaje ‘a fecenna da ll’armanno  (dischetto) ô terzo minuto d’ antijsso (recupero) d’’o primmo ajone (tempo) pe ‘nu ricore favezo ca ll’ucummo (arbitro) rijalaje ê lucale e ssempe  da ll’ armanno (dischetto) ô 54’ Insigne russimmaje (pareggiò) ‘sta vota pe ‘nu ricore sacrusanto ca ll’ucummo (arbitro) siscaje doppo ca ‘a Varra ‘o pigliaje pe ‘na recchia; ma nun fenette lla pecché a ll’87’  ce  penzaje Kulusevski primma a prucurarese n’atu  ricore favezo [taglianno ‘a strata ô Ggialante e ppo menannose ‘nterra…]; avuto ‘o ricore ‘o signaje e ccunzignaje tre ppunte d’oro a Dd'Aversa.

  Sinamparco (comunque) chella d’ajere fove ‘na bbrutta mubbara (partita), overo brutta, senza spettaculo e ssenza emuzzione, cu ‘nu paro ‘e ricure [chille rijalate ô Parma] guardanno ‘o rilorgio ògne ttanto, aspettanno ca fenesse ‘o strazzio. Votta a ffení ‘stu campiunato!

Passammo ê ppaggelle:

  MERET[‘O Lungagnone] 5,5  Pe pparicchiu tiempo se guardaje ‘a mubbara (partita) datose ca  ‘o Parma nun tiraje maje ‘mporta; êsse avut’’a fa coccosa ‘ncopp’ê duje ricure e ‘mmece se facette spiazzà ddoje vote.

DI LORENZO  6- ‘O meno pecché durante ô primmo ajone ()tempo) sufferette contr’a Ppezzella; pe ffurtuna migliraje a ll’arrancua (ripresa).

MAKSIMOVIC [‘O ‘Ntontero] 5,5  Miezu zifo(voto) mancante pecché fove prutacunista necativo pe ‘na retissante (clamorosa) ‘ndicisiona [facennose zumpà da Karamoh] ‘ncopp’ô daimmo a gghí arreto   (retropassaggio) d’’o ‘Ncrifato. Meglio quanno ‘mbastette ‘o juoco.

Kalidou KOULIBALY[‘O Ggialante]] 6,5 Miezu zifo(voto) mancante pecché a ll’ 86' addivintaje ‘nu maccarone ‘e casa facennose cartià da Kulusevski. Nsi’ a cchillu mumento fove matàlo (perfetto) e  ògne ppallone fove ‘o suojo, fermanno a cchi capitaje capitaje; pure ‘e cumpagne ‘o cercajeno cuntinuamente. Me dispiace, ma maje me fósse aspettato ca se fósse fatto jucà dô svedese… Che peccato!

Mario RUI 6 Meglio quanno jette ‘nnante ca quanno difennette, però ‘ncopp’ô ricore avuto contro nun tenette itimme (colpe).

Fabian RUIZ[Anemalonga] 6- M’aspettavo ‘e cchiú asasa (soprattutto) quanno cercaje ‘a porta senza essere priciso; p’’o riesto gestiunaje (gestí) a mmestiere ‘a palla.[Dô 77'  ZIELINSKI 6,5  Trasette pruvanno a rrennerse appacciucuso (utile)’ncopp’â mediana pigliannose quacche ccarí (fallo) e cquacche caucio.]

Diego DEMME 5 Me dispiace ma ll’aggi’’a mettere ‘nu zifo(voto) mancante pecché ajere fove ‘nu luntano parente ‘e chillo visto primma: ‘nzomma jucaje malamente e nnun se vedette maje ‘int’ô juoco. [Da ll'86'  LOBOTKA s.v. traette troppo tarde pe ddarele ‘nu zifo (voto).

 ALLAN[‘O ‘Ncrifato ] 4,5 E ttanto ll’attocca! Sturduto, cunfuso nun ne ‘ncarraje meza sbaglianno assaje e nnunn’azzeccanno ‘nu pasiglio (passaggio)! [Dô 65'  ELMAS[‘O Turco] 5,5  ‘Nu poco meglio d’’o ‘Ncrifato, ma pur’isso se vedette pocon e nnun fove cercato dê cumpagne.].

Matteo POLITANO 5,5 Miezu zifo(voto) mancante pecché nun riuscette a ffarese nutà jucanno senza n’acuto o ‘nu punto ammirativo. [Dal 65'  CALLEJON[Peppe ‘a ‘nguenta] 5,5 Miezu zifo(voto) mancante pure a isso ca nun facette niente ‘e cchiú ‘e Politano.]

LOZANO 5,5  Me dispiace ma ll’attocca pure a isso miezu zifo(voto) mancante pecché sí pe ccorrere, currette, ma spisso a vvacante ‘mpignannose assaje ma senza zuco e ddimustranno ca nunn’ èì ‘nu nove pure si favezo

[Da ll'86'  YOUNES[‘O Mmerecato ] 5  E ll’attocca ‘nu zifo (voto) mancante pecché tuccaje una palla [‘nu ricore ‘mmuvimento]i ‘a sbagliaje menannola ‘ncopp’â loggia d’’o palazzo ‘e rimpetto! Fósse stato cchiú ffacile metterla dinto.]

INSIGNE 6,5 Tutto summato uno d’’e meglie d’’e nuoste: spisso truvaje ‘a jucata bbiona e mmettette dinto ll’uno a uno. Fove ll’urdemo ca s’arrennette.

all. GATTUSO 5,5  Facette ‘o ppussibbile, ma s’êtt’arrangià i ‘a scuatra mustraje ‘e nun ce stà cu ‘a capa. Però fove pure jellato e abbuscà pe dduje ricure faveze ponno fa pure perdere ‘a pacienza.  

Arb.: GIUA 4 E ll’aggiu trattato! Scadente, scadente scadente assaje se vedette ca nun tene ‘sperienzia e nun capeva ‘na mazza ‘e chello ca steva facenno; risulta ch’è ssardagnuolo, ma ‘ntribbuna-divano ce penzajemo ca venesse da ‘o Cottolengo ‘e Turino.Nutizziaje (ammoní) ‘o ‘Ncrifato pe ssenza niente e rijaklaje dduje ricure ô Parma. ‘nserie A nun se po’ ucummà (arbitrare) cu ttanti fessarie!

E bbasta accussí. Mo si ‘o Cielo ‘o vvo’ ce sentimmo dummeneca ca vene pe ccuntareve che facimmo sapato a nnotte  ô san Paolo contr’ô Sassuolo, scuatra assineja (satellite) d’’a vecchia zoccola . Sperammo ca ve conto bboni ccose. Staveti bbe’.

R.Bracale Brak