canzone 'e 'na vota

Canzone ’e ’na vota


I

E mo addó state? Justo dint’ê penziere
canzone bbelle d’ ’o tiempo passato,
mutive ca ’stu core v’ à cantate
’e tutt’ ’e juorne, all’epoca d’ajere

quanno ogni vocca nun fuje maje sincera,
ma a tutte le credette e ’nnammurato
facette sempe curnuto e mazziato,
ma nun se ne ’mpurtaje ’e chello ch’era…

ca, p’ògni tradimento, ’na canzone
passava dinto a ll’ aria, e pure ’amaro,
ca le lassava ’mmocca ’a delusione,

sapeva ’e doce e le fuje sempe caro
giacché ce steva sempe ’nu pianino
ca le spatriava ll’ anema e ’o cammino…

II

E i’ pigliavo lena e arditamente
facevo punto e accuminciavo ancora…
e ghienno annante me sentevo ’ncore
’a voglia ’e pruvà sempe, ore e mumente,


mettennoce ’o gulio e ’o sentimento,
mettennoce ’a passione ’ngannatora
ca ogge, tale e cquale comm’âllora,
m’ abbaglia llà pe llà si tengo mente

duje uocchie nire, ’na vocca ’e granato
’na faccia ’e madunnella o pure ’nzista
e ’na trezza curvina avvellutata…

Ma mo nun è cchiú ’o stesso: nun so’ chiste
’e juorne bbelle d’ ’e canzone bbelle
ca so’ cagnate, ahimmé, e nun so’ chelle?

III

Nun parlano cchiú ’e ammore… Qua’ puete!?
So’ paruliere chiste ’e mo: prutesta,
pulitica, denunce ’e cartapesta
(ca a farle è bbuono pure ’anarfabbeta…)

chiacchiere e ttabbacchere: ’na mufeta
fatta pe ’mbruglià ll’acqua… ’o manifesto,
’e scemità cchiú sceme e, ’nfunno â cesta,
crusca e muniglia, ’a zoza cchiù completa…

Cheste, ’e parole!… E ’a musica? Staje frisco!
’Nu zerrizzerro fatto p’ ’o casino:
piatte, tammurre, strille, allucche, sische

burdello cu sassofono e clarino…
e tutto tale e cquale: ’nu remmore
ca ’nzallanisce e strazzia recchie e ccore!


IV

E so’ canzone ’a puté dà ’na mano
a cchi à perduto ’ammore?… l’hê truvato!
Facitelo pe dDio… addó ’e cercate,
dinto a chist’arrevuoto, a chesta frana

’nu vierzo ’e mèle o ’a musica ruffiana
capace ’e cunzulà ’nu scunsulato,
capace a cchi sta triste e scunfurtato
’e dí: Nun ’mporta… me’ pienze a dimane!

…E che vuó fà! Chesto ce apporta ’a vita…
Pure ’a canzone, ’o bbi’, è gghiuta a cascetta
e senza darle manco ’o benservito

âmmo accurciato ancora ’stu … sunetto…
E ce âmm’ ’a rassignà… Ma quanto è triste
a nun sentí cchiú ’a musica ’e n’artista!

Raffaele Bracale
(dal vol. 'E CCOSE D''O PPASSATO ed. Graus Napoli 2006)