NAPULE

Napule…


Nun te cunosco cchiú, paese caro
ca poco â vota, ahimmé te sî cagnato…
Nun te cunosco… mo sî addeventato
’o stesso ’e ciento, ’e mille… paro paro.

E cchella nustalgia cucente e amara
ca me pigliava ’ncore p’ ’o ppassato
quanno stevo luntano… s’è arrassata
e nun ’a sento cchiú… Mo Marechiaro

Pusilleco, ’a Riviera, Margellina
so’ nnomme ca nun diceno cchiú nniente…,
nun danno cchiú ’nu palpito! E peffino,

finanche ’o mare, comme a cchesta ggente
nun se cunosce cchiú e chianu chiano
nun pare manco cchiú napulitano…

II

È mmeglio? ’O ssape Ddio… I’ so’ sicuro
ca quanno penzo a pprimma e paragono
chello ca mo tu sî, me fa impressione,
me sento chistu core scuro scuro

’o stesso core, l’istessa paura
’e chi tant’anne fa, cu ’na canzona
ggià se chiagneva Napule e ’e perzone
ca s’erano cagnate… E te figure
si te vedesse mo? Che scrivarria?
Addó ’e truvasse mo ’e pparole adatte
pe raccuntarla tutt’ ’a pucuntria

’e ’stu paese tanto scuntraffatto?
Nun ’e truvasse… è ccerto. E zzitto e mmuto
restasse comme a mme: triste e avveluto.
Raffaele Bracale
(dal vol. 'E CCOSE D''O PPASSATO ed. Graus Napoli 2006)