LL'URDEMA CARRUZZELLA

Ll’urdema carruzzella


I

Addó stive annascosta, ’a do’ sî asciuta
oj carruzzella antica?… ’A qua’ ritratto
tu sî zumpata fora all’intrasatta
e a ’stu puntone tu sî accumparuta?

Ce staje? O puramente m’ è paruto
sultanto a mme, ch’è overo chistu fatto
ca, a mantice aizato, quatto quatto
chistu cavallo ammocca ’sta sagliuta?…

Chi ’o ssa’? Ma si sî overa, oj carruzzella,
ritornatenne â casa, ’int’ â rimessa…
’Sti strate nun so’ cchiú p’ ’a passiatella

mo è ’o tiempo d’ ’o mutore ca va ’e pressa…
E, ’ncopp ’asfardo, tu daje sulo ’mpiccio
ca te ntallije, invece ’e jí ’e spiccio!

II

Sî fora moda… e dimme: nun t’ adduone,
cu ’sti cuscine e cu ’sta lanternella
ca rappresiente ormaje ’na scartapella
bbona pe copp’ ’ô cippo ’e sant’Antuono…

Pirciò torna â rimessa… ’Stu frastuono
’e chesta via ’ntasata, ’stu maciello
nun so’ ffatte pe tte! Lella palella
sparisce ’int’ ê ricorde… i’, buono buono,

te venarraggio appriesso cu ’o penziero
arricurdanno ll’ epoca passata
’e quanno me purtave p’ ’a Riviera

assieme a chi saje tu… E m’ à lassato!
E lassame tu pure e lassa ’o core
a sfrennesià sul’ isso, ’int’ ô remmore!
Raffaele Bracale
(dal vol. 'E CCOSE D''O PPASSATO ed. Graus Napoli 2006)