'A SCARPETTA

’A scarpetta


I

Va bbe’ nun dico ’e no: so’ scustumato,
nun tengo educazzione, sí ll’ammetto…
ma, che ce pozzo fà?…, a ’na scarpetta
nun ce rinunzio manco si… sparate!

È assaje cchiú fforte ’e me, e ’a che so’ nnato
so’ asciuto sempe pazzo p’ ’a… zuppetta
e ffatta a mmano sa’… senza furchetta
si no fernesce ’o sfizzio ’e ll’ azzuppata…

E appena c’aggio a ttaglio ’o palatone
e ’o zuco ca… s’ ’o chiamma, ve cunfesso
ca i’ nun m’ ’a perdo certo… ll’occasione,

pecché so’… scustumato, ma no fesso!
E ca sia piatto, tiella o scafaréa
nce dongo sotto, allicco e mm’arrecreo!…

II

Dice: “Ma nun è ffino, nun è bbello
ca ’nu… signore cu ’nu piezzo ’e pane
s’accocchia ’o zuco ’e sott’ê mulignane,
o va aunanno, cu ’na mullechella


ll’urdimi puparuole dint’â tiella…”
Rispongo: “Ma che fósse cchiú ’a crestiano
sciupà ’a grazzia ’e Ddio ’e sott’â tiana
addò à pappiato ’o ppoco ’e curatèlla

o pure ’na lardiata o ’nu zuffritto?…
Ma chi à smammato chesta fessaria?
Chi s’ ’à ’nventato, neh… ma chi ll’à scritto?

Justo ’nu ciuccio senza fantasia!
Pecché, si nn’ ’o ssapite, o cruro o cuotto
’o meglio muorzo è proprio chillo ’e sotto!…”

Raffaele Bracale
(dal vol. 'E CCOSE D''O PPASSATO ed. Graus Napoli 2006)